သန့်ဇင် (NSS) - မတ် ၅

ရန်ကုန်တိုင်း၊ စမ်းချောင်းမြို့နယ်တွင် ဆယ်ကျော်သက်အရွယ် သမီးရည်းစား(၂)ဦး စကားများရန်ဖြစ်ပြီးနောက် ဟိုတယ်တစ်လုံး၏ (၇)လွှာမှ အမျိုးသားဖြစ်သူခုန်ချမှုဖြစ်ပွားခဲ့ကြောင်း စမ်းချောင်းအရန်မီးသတ်တပ်ဖွဲ့ထံမှ သိရသည်။

ဖြစ်စဉ်မှာ ယမန်နေ့(မတ်လ ၄ ရက်)၊ ည ၇ နာရီဝန်းကျင်အချိန်တွင် စမ်းချောင်းမြို့နယ်၊ မုဒ်တောင်ရပ်ကွက်၊ ကျွန်းတောလမ်းရှိ (121)ဟိုတယ်၌ ဖြစ်ပွားခဲ့ခြင်း ဖြစ်ကြောင်း သိရသည်။

“ည ၇နာရီလောက်က ကောင်လေးကကောင်မလေးကို စကားပြောစရာရှိလို့ဆိုပြီး ဟိုတယ်ကိုခေါ်သွားတယ်။ သိရတာတော့ ကောင်မလေးကို သတ်ဖို့ကြိုးစားရင်းနဲ့ လုံးထွေးပြီး ကောင်မလေးက အောက်ကိုပြေးဆင်းလာ တယ်။ ကောင်လေးကတော့ (၇)လွှာက ပြတင်းပေါက်ကနေ အောက်ကိုခုန်ချတယ်ပေါ့။ ရန်ပြုတဲ့အချိန်မှာ ဓားတစ်ချောင်းပါတယ်လို့ ကောင်မလေးက ပြောပြတယ်” ဟု စမ်းချောင်းအရန်မီးသတ်တပ်ဖွဲ့မှ တာဝန်ရှိသူတစ်ဦး က NP News ကို ပြောသည်။

အဆိုပါဖြစ်စဉ်စဉ်တွင် အသက်(၁၉)နှစ်အရွယ်အမျိုးသားမှာ ဟိုတယ်ပေါ်မှ ခုန်ချခဲ့သည့်အတွက် ဒဏ်ရာများရ ရှိခဲ့ပြီး ၎င်းထိုးကြိတ် ရန်ပြုခဲ့သော အသက်(၁၆)နှစ်အရွယ်သာရှိသေးသည့် အမျိုးသမီးတွင်လည်း မျက်နှာ ဖူးယောင်ဒဏ်ရာများရရှိခဲ့ကြောင်း သိရသည်။

“ကောင်မလေးကတော့ ဒဏ်ရာကြီးကြီးမားမားမရှိဘူး။ လက်သီးနဲ့အထိုးခံထားရတာဆိုတော့ နှုတ်ခမ်းမှာ ဖူးယောင် ဒဏ်ရာရှိတယ်။ ကောင်လေးကတော့ ခုန်ချပေမယ့် ဘာမှသိပ်မဖြစ်ဘူး။ ဆေးရုံပို့ပြီးတော့ ထိုင်နိုင်တဲ့ အခြေအနေမှာတောင်ရှိတယ်။ ဒီလိုဖြစ်စဉ်တွေနဲ့ ပတ်သက်ပြီးအကြံပြုရရင် လူငယ်တွေကို အခုလိုမျိုးတွေ မဖြစ်အောင် မိဘတွေအနေနဲ့ကြပ်မက်ပြီး ဂရုစိုက်သင့်တာပေါ့” ဟု ၎င်းက ဆက်ပြောသည်။

ထို့ကြောင့် ထိခိုက်ဒဏ်ရာရရှိခဲ့သည့် အမျိုးသားနှင့်အမျိုးသမီးကို ရန်ကုန်ပြည်သူ့ဆေးရုံကြီးသို့ ပို့ဆောင်ပေး ထားပြီး ဖြစ်စဉ်နှင့်ပတ်သက်၍ သက်ဆိုင်ရာက စုံစမ်းစစ်ဆေးနေလျက်ရှိကြောင်း သိရသည်။

အလားတူ ပြီးခဲ့သည့် ဖေဖော်ဝါရီ ၂၇ ရက်တွင်လည်း ဖြူးမြို၌ သမီးရည်းစားစုံတွဲတစ်တွဲ စကားများရန်ဖြစ်ရာမှ အမျိုးသားက အမျိုးသမီးကို ဓားဖြင့်သတ်ဖြတ်ခဲ့သည့် ဖြစ်စဉ်ဖြစ်ပွားခဲ့ဖူးကြောင်း သိရသည်။