ရောင်နီ (NSS) - မတ် ၂

          သီတင်းတစ်ပတ်ကို ဒိန်ချဉ် အနည်းဆုံး နှစ်ခွက် သို့မ ဟုတ် သုံးခွက်ခန့်ပုံမှန်စားခြင်းဟာ အမျိုးအစား ၂ ဆီးချိုရောဂါ ဖြစ်နိုင်ခြေကို လျှော့ချနိုင်တယ်လို့ အမေရိကန် အစားအသောက်နဲ့ ဆေးဝါးကွပ်ကဲရေးဌာနက သောကြာနေ့(မတ်လ ၁ ရက်) မှာ ပြောကြားခဲ့ပါတယ်။ 

        "ဒိန်ချဉ်စားသုံးခြင်းဟာ ကျန်းမာရေးကို အကျိုးပြုစေတယ်" ဆိုတဲ့ Harvard School of Public Health ရဲ့ အာဟာရဌာနမှ သုတေသီများ ထုတ်ဝေတဲ့ ၂၀၁၄ ခုနှစ်လေ့လာမှုကို ကိုးကားပြီး ဒိန်ချဉ်ကုမ္ပဏီ Danone က FDA ကို လျှောက်ထားခဲ့ရာမှာ အမျိုးအစား ၂ ဆီးချိုရောဂါ ဖြစ်နိုင်ချေကို လျှော့ချပေးနိုင်တယ်ဆိုတဲ့ အချက်တွေ့ရှိခဲ့ခြင်း ဖြစ်ပါတယ်။ ထုတ်လုပ်သူ အများအပြားဟာ ဒိန်ချဉ်ထဲကို သကြားထည့်ထုတ်လေ့ရှိပေမယ့် သုတေသနပြုချက်အရ ဒိန်ချဉ်မှာ သကြားပါသည်ဖြစ်စေ၊ မပါ သည်ဖြစ်စေ ဆီးချိုရောဂါအတွက် ကောင်းကောင်းလျှော့ချပေးနိုင်တယ်လို့ ဆိုပါတယ်။ ဒါပေမဲ့လည်း  သကြားများများထည့်ထားတဲ့ ဒိန်ချဉ်တွေကို သောက်သုံးခြင်းဟာ ကယ်လိုရီတိုးစေဖို့ အကူအညီဖြစ်မှာ စိုးရိမ်မိတယ်လို့ FDA က ဆိုပါတယ်။

       လေ့လာချက်များအရ ဒိန်ချဉ်ဟာ ရောဂါဖြစ်နိုင်ခြေကို ဘာကြောင့် လျော့နည်းစေတယ် ဆိုတာကို အတိအကျ မဖော်ပြထားပေမယ့် ဒိန်ချဉ်ထဲမှာ အသက်ရှင်နေထိုင်ကြတဲ့ ကျန်းမာ ရေးအကျိုးပြု ပိုးမွှားလေးတွေကြောင့် ဖြစ်နိုင်တယ်လို့ သိရပါတယ်။