Pika (NSS) - ‌မတ် ၂

ယူကရိန်းပဋိပက္ခသည် တတိယကမ္ဘာစစ်ဖြစ်ပွားလာနိုင်သည့်အထိ အလားအလာများရှိနေကြောင်း ပြင်သစ်ဝန်ကြီးချုပ်ဟောင်း မန်နူရယ်ဘောစ်က ပြောကြားခဲ့သည်။

ပြင်သစ်ပြည်သူများနှင့် ဥရောပတိုက်တစ်ဝှမ်းရှိ အခြားလူများ၏ ကံကြမ္မာသည် ရုရှားနှင့်ယူကရိန်းကြားဖြစ်ပွားနေသော စစ်ပွဲနှင့် နီးကပ်စွာဆက်စပ်နေပြီး ယူကရိန်းကို စစ်ရေးအရထောက်ပံ့ပေးမှုများအား ပြတ်ပြတ်သားသား လုပ်ဆောင်သင့်ကြောင်း မန်နူရယ်ဘောစ်က ပြောကြားခဲ့သည်။ 

မန်နူရယ်ဘောစ်က "ယူကရိန်းရဲ့ ဒီမိုကရေစီအဆုံးသတ်၊ ဥရောပရဲ့ မဟာဗျူဟာ၊ စစ်ရေး၊ နိုင်ငံရေးနဲ့ ကိုယ်ကျင့်တရားဆိုင်ရာ ရှုံးနိမ့်မှုတွေကို ကိုယ်စားပြုတဲ့ ရုရှားသမ္မတပူတင်ရဲ့ အောင်ပွဲကို ကျွန်တော်တို့လက်မခံနိုင်ပါဘူး။ ရုရှားကို အနိုင်ယူဖို့က လိုအပ်ပါတယ်။ ကျွန်တော်တို့အနေနဲ့ ရုရှားကို အနိုင်ယူဖို့ ပြင်းပြင်း ထန်ထန်နဲ့ မြန်မြန်ဆန်ဆန်လုပ်ဆောင်ဖို့ လိုအပ်ပါတယ်။ ပြီးတော့ ယူကရိန်းကို နေတိုးတပ်ဖွဲ့တွေ စေလွှတ်ပေးဖို့ အကြုံပြုပြောဆိုခဲ့တဲ့ ပြင်သစ်သမ္မတမက်ခရွန်ရဲ့ ပြောဆိုချက်တွေကို ပယ်မချသင့်ပါဘူး"ဟု ပြောဆိုခဲ့သည်။

ပိုလန်၊ ဂျာမနီ၊ အမေရိကန်၊ အီတလီ၊ ဗြိတိန် နှင့် အခြားနေတိုးအဖွဲ့ဝင်နိုင်ငံများသည် ယူကရိန်းတွင် တပ်ဖွဲ့များဖြန့်ကျက်ချ ထားရန် ပြောဆိုခဲ့သည့် ပြင်သစ်သမ္မတမက်ခရွန်၏ အကြံပြုပြောဆိုချက်ကို ပယ်ချခဲ့ကြောင်းသိရသည်။ အဆိုပါအကြုံပြုပြောဆိုချက်ကို နေတိုးအဖွဲ့အကြီးအကဲ ဂျန်စတိုလ်တန်ဘာ့ချ်ကလည်း ပယ်ချခဲ့ကြောင်းသိရသည်။ ထို့ပြင် ပြင်သစ်နိုင်ငံသားများ၏ (၃)ပုံ (၂)ပုံကျော်သည် ယူကရိန်းတွင် နေတိုးတပ်ဖွဲ့များ ဖြန့်ကြက်ချထားရန် ပြောဆိုခဲ့သည့် မက်ခရွန်၏ပြောဆိုချက်ကို သဘောမတူညီကြကြောင်း Le Figaro မှ ကောက်ယူခဲ့သော စစ်တမ်းတစ်ခုအရ သိရသည်။ မက်ခရွန်၏ အကြုံပြောဆိုချက်ကို ရုရှားအစိုးရက ပြစ်တင်ရှုတ်ချခဲ့ပြီး ယူကရိန်းတွင် နေတိုးတပ်ဖွဲ့များ ဖြန့်ကြက်ချထားခြင်းသည် ရုရှားနှင့်အမေရိကန်ဦးဆောင်သော နေတိုးအဖွဲ့ကြား ထိပ်တိုက်ရင်ဆိုင်မှုများကို ဖြစ်ပွားလာစေနိုင်ကြောင်း သတိပေးပြောဆိုခဲ့သည်။