မြူနစ်/သန့်ဇင် (NSS) - မတ် ၂

ရန်ကုန်မြို့တွင် မတ်လ ၁ ရက် ညပိုင်း၌ ဗုံးပေါက်ကွဲမှုများ ဖြစ်ပွားခဲ့ရာ လူ(၄)ဦးထက်မနည်းသေဆုံးခဲ့ပြီး ထိခိုက်ဒဏ်ရာရသူ တစ်ချို့ရှိနေကြောင်း သတင်းရရှိသည်။

မတ်လ ၁ ရက်၊ ည ၇ နာရီ ၃၀ မိနစ်အချိန်ခန့်တွင် လှိုင်သာယာအရှေ့ပိုင်းမြို့နယ်၊ အမှတ်(၂)ရပ်ကွက်၊ ရန်ကုန်-ညောင်တုန်း လမ်းပေါ်၊ (၁)ထိပ်မှတ်တိုင်နှင့် (၃)ထိပ်မှတ်တိုင်ကြားတွင် ဗုံးပေါက်ကွဲမှု စတင်ဖြစ်ပွားခဲ့ကြောင်း လုံခြုံရေးအဖွဲ့နှင့်နီးစပ်သူများထံမှ သိရသည်။

ရန်ကုန်-ညောင်တုန်းလမ်းပေါ်တွင် ဘတ္ထရီစက်ဘီးစီးနင်းလာသူ (၂)ဦး၏ ကျောပိုးအိပ်အတွင်းမှ ပေါက်ကွဲမှုဖြစ်ပွားခဲ့ခြင်း ဖြစ် ကြောင်း လုံခြုံရေးအဖွဲ့နှင့်နီးစပ်သူများက‌ ပြောသည်။

ထိုသို့ပေါက်ကွဲမှုကြောင့် ဘတ္ထရီစက်ဘီးစီးနင်းလာသူ (၂)ဦးသည် ပြင်းထန်သည့်ထိခိုက်ဒဏ်ရာများရရှိကာ အခင်းဖြစ်နေ ရာတွင် သေဆုံးသွားခဲ့ကြောင်း သိရသည်။

အလားတူ ယမန်နေ့ည ၇ နာရီ ၅၅ မိနစ်အချိန်ခန့်တွင်လည်း လှိုင်သာယာ(အနောက်ပိုင်း)မြို့နယ်၊ (၁၇)ရပ်ကွက်၊ စက်မှု ဇုန်(၅)၊ သံလွင်လမ်းနှင့် ဒုတ္တဝတီလမ်းထောင့်ရှိ လျှပ်စစ်ကွန်ကရစ်တိုင်အနီးတွင် ဗုံးပေါက်မှု ထပ်မံဖြစ်ပွားခဲ့သော်လည်း လူထိခိုက်မှု မရှိခဲ့ကြောင်း သိရသည်။

ထို့ပြင် ယမန်နေ့ည ၇ နာရီ ၅၀ မိနစ်အချိန်ခန့်တွင် ရန်ကုန် တိုင်း၊ အင်းစိန်မြို့နယ်၊ ကွက်သစ်ရပ်ကွက်၊ လှိုင်မြစ်လမ်းဘေး၊  အ.မ.က (၁၂)ကျောင်းရှေ့တွင်လည်း ဗုံးပေါက်ကွဲမှု ဖြစ်ပွားခဲ့ကြောင်း လုံခြုံရေးအဖွဲ့နှင့်နီးစပ်သူများက ‌ပြောသည်။

“ပေါက်ကွဲမှု ဖြစ်တဲ့နေရာက အင်းစိန်အကျဉ်းထောင်နဲ့တော့ သိပ်မဝေးပါဘူး။ အဲဒီအနီးမှာရှိတဲ့ သန့်စင်စတိုးဆိုင်က ဝန် ထမ်းအမျိုးသမီးတစ်ယောက် ပေါက်ကွဲစထိမှန်ဒဏ်ရာရတာရှိတယ်။ စိုးရိမ်စရာတော့ မရှိပါဘူး”ဟု အင်းစိန်မြို့နယ်လုံခြုံရေးအဖွဲ့နှင့်နီးစပ်သူက NP News ကို ပြောသည်။

ထို့အတူ အင်းစိန်မြို့နယ်၊ စဥ့်ငူရပ်ကွက်၊ အောက်မင်္ဂလာဒုံလမ်းနှင့် ဗိုလ်ချုပ်ကြေးရုပ်လမ်းဆုံတွင်လည်း ည ၇ နာရီ ၅၅ မိ နစ်အချိန်၌ ကားတစ်စီးအတွင်းမှ ပေါက်ကွဲမှု ဆက်လက်ဖြစ်ပွားခဲ့ကြောင်း သိရသည်။

အဆိုပါကားသည် Honda Fit အမျိုးအစား ကားတစ်စီးဖြစ်ပြီး လက်လုပ်ဗုံးသယ်ဆောင်မောင်းနှင်လာစဉ်အချိန်တွင် ပေါက်ကွဲမှုဖြစ်ကာ မီးလောင်ခဲ့ခြင်းဖြစ်ကြောင်း လုံခြုံရေးအဖွဲ့နှင့်နီးစပ်သူများက ပြောသည်။

၎င်းပေါက်ကွဲမှုဖြစ်စဉ်အတွင်း ကားပေါ်တွင်လိုက်ပါလာသည့် အမျိုးသားတစ်ဦးနှင့် အမျိုးသမီးတစ်ဦးတို့သည် ထိခိုက်ဒဏ်ရာများရရှိကာ မီးလောင်သေဆုံးသွားခဲ့ကြောင်း သိရသည်။

“သိရတာတော့ Honda Fit ကားလို့သိရတယ်။ ရုတ်တရက်မီးလောင်ပြီး ပေါက်ကွဲတာ။ လူသေဆုံးတာလည်း ရှိတယ်။ Dead Body(၂)ယောက်ကတော့ မီးလောင်ထားတော့ ဘယ်သူဘယ်ဝါဆိုတာ အတည်ပြုခွဲခြားနိုင်ဖို့ ခက်တယ်” ဟု အဆို ပါဖြစ်စဉ်အား ကူညီကယ်ဆယ်ပေးခဲ့သူတစ်ဦးကလည်း NP News ကို ပြောသည်။

ထို့ပြင် ယမန်နေ့ညပိုင်း၌ အင်းစိန်မြို့နယ်နှင့် ရွှေပြည်သာမြို့နယ်အစပ်ရှိ (၁၄)လမ်းဆုံအနီးတွင်လည်း ဗုံးပေါက်ကွဲမှုဖြစ် စဉ်များ ထပ်မံဖြစ်ပွားခဲ့ပြီး တစ်ညတည်း၌ ဗုံးပေါက်ကွဲခဲ့သည့်နေရာ (၅)နေရာထက်မနည်း ရှိခဲ့ကြောင်း သိရသည်။