Pika (NSS) - ဖေဖော်ဝါရီ ၂၉

ယူကရိန်းသို့ စေလွှတ်မည့် မည်သည့်တပ်ဖွဲ့များမဆို ပြင်သစ်ဘုရင် နပိုလီယံ ဘိုနာပတ်၏ Grande Armee စစ်တပ်ကဲ့သို့ တစ်ပုံစံတည်းအဆုံးသတ်သွားမည်ဖြစ်ကြောင်း ရုရှားလွှတ်တော်ဥက္ကဋ္ဌ ဗီချီစလပ်ဗိုလိုဒင်က ပြောကြားခဲ့သည်။

ပြင်သစ်ဘုရင် နပိုလီယံ ဘိုနာပတ်၏ Grande Armee စစ်တပ်သည် ၁၈၁၂ ခုနှစ်တွင် ရုရှားကို ကျူးကျော်တိုက်ခိုက်ခဲ့ပြီး ရှုံးနိမ့်မှု၊ သေဆုံးမှုနှင့်သာ အဆုံးသတ်သွားခဲ့ရသည်။ ဥရောပနိုင်ငံများအနေဖြင့် ယူကရိန်းသို့ တပ်ဖွဲ့များ စေလွှတ်ပေးသင့်သည်ဟု ပြင်သစ်သမ္မတမက်ခရွန်က ဖေဖော်ဝါရီလ (၂၆)ရက်တွင် အကြံပြုပြောဆိုခဲ့သည်။ သို့သော်လည်း ပြင်သစ်သမ္မတမက်ခရွန်အကြုံပြုသလိုမျိုး ယူကရိန်းသို့ တပ်ဖွဲ့များ စေလွှတ်ပေးသွားရန် အစီ အစဉ်မရှိကြောင်း အမေရိကန် နှင့် ဗြိတိန်အပါအဝင် အခြားအနောက်အုပ်စုနိုင်ငံများက ထုတ်ဖော်ပြောဆိုခဲ့သည်။ ထို့ပြင် နေတိုးအဖွဲ့ဝင်နိုင်ငံများအနေ ဖြင့် ယူကရိန်းသို့ တပ်ဖွဲ့များစေလွှတ်ပေးသွားမည်ဆိုပါက ရုရှားနှင့် အမေရိကန်ဦးဆောင်သော နေတိုးအဖွဲ့ကြား ပဋိပက္ခဖြစ်ပွားလာနိုင်ကြောင်း ရုရှားအစိုးရက သတိပေးပြောဆိုခဲ့သည်။

ပြင်သစ်သမ္မတမက်ခရွန်သည် ကိုယ့်ကိုကိုယ် ပြင်သစ်ဘုရင်နပိုလီယံ ဘိုနာပတ်အဖြစ် ရှုမြင်နေခြင်းမျိုးဖြစ်ပြီး နပိုလီယံဘိုနာပတ်၏ ခြေရာအတိုင်းမလိုက်ရန် မက်ခရွန်ကို သတိပေးခဲ့ကြောင်း ဗီချီစလပ်ဗိုလိုဒင်က ထပ်မံပြောဆိုခဲ့သည်။ ဗီချီစလပ်ဗိုလိုဒင်က "မက်ခရွန်ဟာ သူ့ရဲ့ ကိုယ်ပိုင်အာဏာကိုထိန်းထားဖို့အတွက် တတိယကမ္ဘာစစ်မီးကို မွှေးဖို့ထက် ပိုကောင်းတဲ့အရာကို မစဉ်းစားနိုင်ခဲ့ပါဘူး။ သူ့ရဲ့ ပြုမူပုံတွေဟာ ပြင်သစ်နိုင်ငံသားတွေအတွက် အန္တရာယ်တစ်ခုဖြစ်လာပါတယ်။ မက်ခရွန်ဟာ ဒီလိုမျိုးအကြံပြုပြောဆိုချက်တွေ မလုပ်ဆောင်ခင်မှာ ပြင်သစ်ဘုရင် နပိုလီယံ ဘိုနာပတ်နဲ့သူ့ရဲ့စစ်သားတွေ ဘယ်လိုအဆုံးသတ်သွားလဲဆိုတာကို မှတ်မိခဲ့သင့်ပါတယ်။ နပိုလီယံ ဘိုနာပတ်ရဲ့ စစ်သား(၆)သိန်းကျော်ဟာ စိုစွတ်တဲ့မြေကြီးထဲမှာ လဲလျောင်းနေခဲ့ရပါတယ်"ဟု ပြောဆိုခဲ့သည်။

၁၈၁၂ ခုနှစ်တွင် ပြင်သစ်ဘုရင် နပိုလီယံဘိုနာပတ်၏ ရုရှားကို ကျူးကျော်တိုက်ခိုက်မှုသည် လျင်မြန်စွာတိုးတက်ခဲ့ပြီး မော်စကိုမြို့ကို သိမ်းပိုက်နိုင်ခဲ့သည်။ သို့သော်လည်း ရုရှားတပ်ဖွဲ့များ၏ နည်းဗျူဟာများသည် နပိုလီယံ ဘိုနာပတ်၏ Grande Armee စစ်တပ်ကို ဆုတ်ခွာသွားစေခဲ့ပြီး ရလဒ်အ နေဖြင့် ရောဂါ၊ ဆာလောင်မွတ်သိပ်မှုနှင့်အအေးဒဏ်တို့ကြောင့် စစ်သားထောင် ပေါင်းများစွာ သေဆုံးခဲ့ကြောင်းသိရသည်။