Pika (NSS) - ဖေဖော်ဝါရီ ၂၉

အီလီနွိုက်ပြည်နယ်တရားသူကြီးတစ်ဦးသည် ဖေဖော်ဝါရီလ(၂၈)ရက်တွင် အမေရိကန်သမ္မတဟောင်း ဒေါ်နယ်ထရမ့်ကို အီလီနွိုက်ပြည်နယ် ရီပတ်ဘလစ်ကန်သမ္မတလောင်း ကိုယ်စားလှယ်ရွေးကောက်ပွဲတွင် ပါဝင်ခွင့်မှပိတ်ပင်ခဲ့ကြောင်းသိရသည်။

၂၀၂၁ ခုနှစ် ဇန်နဝါရီလ(၆)ရက်တွင် အမေရိကန်လွှတ်တော်အဆောက်အအုံ၌ ဖြစ်ပွားခဲ့သော ဆူပူအုံကြွမှုတွင် ဒေါ်နယ်ထရမ့်၏ အခန်းကဏ္ဍနှင့်ပတ်သက်ပြီး ယခုကဲ့သို့ တားမြစ်ပိတ်ပင်ခဲ့ခြင်းဖြစ်ကြောင်းသိရသည်။ သို့သော်လည်း ဒေါ်နယ်ထရမ့်က အယူခံဝင်နိုင်ခြေရှိခြင်းကြောင့် အီလီနွိုက်ပြည်နယ်တရားသူကြီး၏ စီရင်ချက်မှာ စတင်အသက်ဝင်ရန် နှောင့်နှေးမှုများရှိခဲ့ကြောင်းသိရသည်။ ဒေါ်နယ်ထရမ့်သည် အမေရိကန်ဖွဲ့စည်းပုံအခြေခံဥပဒေ၏ (၁၄)ကြိမ်မြောက် ပြင်ဆင်ချက်တွင် ပါဝင်သော ဆူပူအုံကြွမှု ဆန့်ကျင်ရေးကို ချိုးဖောက်သည့် အတွက် အီလီနွိုက်ပြည်နယ်၏ မတ်လ(၁၉)ရက်တွင် ပြုလုပ်မည့် ကိုယ်စား လှယ်ရွေးကောက်ပွဲနှင့် နိုဝင်ဘာလ(၅)ရက်တွင်ပြုလုပ်မည့် အထွေထွေ ရွေးကောက်ပွဲတွင် ပါဝင်ရန် အရည်အချင်းမပြည့်မီကြောင်း ပြောဆိုခဲ့ကြသည့် အီလီနွိုက်ပြည်နယ်မဲဆန္ဒရှင်များနှင့်အတူ Cook County Circuit တရားသူကြီး ထရာစီပေါ်တာက ရပ်တည်ခဲ့ခြင်းဖြစ်ကြောင်းသိရသည်။

အီလီနွိုက်ပြည်နယ်အမှု၏ နောက်ဆုံးရလဒ်နှင့် အလားတူစိန်ခေါ်မှုများကို အမေရိကန်တရားရုံးချုပ်မှ ဆုံးဖြတ်သွားနိုင်ဖွယ်ရှိနေကြောင်းသိရသည်။ အီလီနွိုက်ပြည်နယ် အယူခံတရားရုံးများတွင် ဒေါ်နယ်ထရမ့်၏ အယူခံဝင်နိုင်ခြေ နှင့် အမေရိကန်တရားရုံး ချုပ်၏ အလားအလာရှိသော စီရင်ချက်တို့ကြောင့် ၎င်း၏ ဆုံးဖြတ်ချက်မှာ ယခုကဲ့သို့ ရပ်တန့်နေရခြင်းဖြစ်ကြောင်း ထရာစီပေါ်တာက ပြောကြားခဲ့သည်။ ဒေါ်နယ်ထရမ့် ကမ်းပိန်း၏ပြောရေးဆိုခွင့်ရှိသူက "အယူခံဝင်မှုတွေကို ကျွန်တော်တို့မြန်မြန်လုပ်ဆောင်သွားမှာပါ။ ဒီစီရင်ချက်ဟာ ဖွဲ့စည်းပုံအခြေခံဥပဒေနဲ့ မကိုက်ညီတဲ့စီရင်ချက်တစ်ခုဖြစ်ပါတယ်"ဟုပြောဆိုခဲ့သည်။

သမ္မတဂျိုးဘိုင်ဒန်၏ ၂၀၂၀ ခုနှစ်ရွေးကောက်ပွဲအောင်ပွဲအား လွှတ်တော်က အသိအမှတ်ပြုခြင်းကို တားဆီးရန်ကြိုးပမ်းမှုအဖြစ် ၂၀၂၁ ခုနှစ် ဇန်နဝါရီလ(၆)ရက်တွင် ဒေါ်နယ်ထရမ့်ထောက်ခံသူများသည် ရဲတပ်ဖွဲ့ဝင်များကို တိုက်ခိုက်ကာ လွှတ်တော်အဆောက်အဦးကို ဝိုင်းအုံထားခဲ့ကြကြောင်းသိရသည်။ ဒေါ်နယ်ထရမ့်က ၎င်း၏ထောက်ခံသူများကို လွှတ်တော်အဆောက်အအုံသို့သွားကာ ဆူပူအုံကြွမှုများ လုပ်ဆောင်ရန် မိန့်ခွန်းပြောကြားခဲ့ခြင်းဖြစ်ကြောင်းလည်းသိရသည်။ သို့သော်လည်း ဒေါ်နယ်ထရမ့်သည် ဆူပူအုံကြွမှုအာား ရပ်တန့်ရန် တိုက်တွန်းသည့် တောင်းဆိုချက်များကို နာရီအတော်ကြာသည်အထိ ပြောဆိုခဲ့ခြင်းမျိုးမရှိခဲ့ကြောင်းလည်းသိရသည်။