ဂျန်ဇက် (NSS) - ဖေဖော်ဝါရီ ၂၁ 

ထိုင်းနိုင်ငံသို့ တရားမဝင်ဝင်ရောက်ရန် ကြိုးပမ်းနေသာ မြန်မာနိုင်ငံသားများသည် ထိုင်းဥပဒေအတိုင်းအရေးယူခံရ မည်ဖြစ်ကြောင်း ထိုင်းဝန်ကြီးချုပ်ဆာရက်သာတာဗီဆင်က သတိပေးလိုက်သည်။ 

ထိုင်းနိုင်ငံသို့သွားရောက်ရန် ဗီဇာလျှောက်ထားသည့် မြန်မာနိုင်ငံသားအရေအတွက်မြင့်တက်လာခဲ့ပြီးနောက် ထိုင်းဝန်ကြီးချုပ်ဆာရက်သာတာဗီဆင်က သတိပေးပြောဆိုခဲ့ခြင်းဖြစ်သည်။ ထိုင်းဝန်ကြီးချုပ်က "ထိုင်းနိုင်ငံကို တရားဝင် လာရောက်မယ့် မြန်မာနိုင်ငံသားတွေကို ကြိုဆိုသွားမယ်။ ဒါပေမယ့်ထိုင်းနိုင်ငံကို တရားမဝင် ဝင်ရောက် လာမယ့်မြန်မာနိုင်ငံသားတွေကို ဥပဒေအရ အရေးယူသွားမယ်။ ကျွန်တော်ဟာ ထိုင်းလုံခြုံရေးအေဂျင်စီတွေနဲ့ ဆွေးနွေးထားတယ်" ဟု ပြောသည်။

ထိုင်းဝန်ကြီးချုပ်က ထိုင်းနိုင်ငံ၏ လက်ရှိအလုပ်လက်မဲ့နှုန်းက၁ရာခိုင်နှုန်းအောက်သာရှိနေပြီး အိမ်နီးချင်းနိုင်ငံများ မှ ရွှေ့ပြောင်းအလုပ်သမားများ ပိုမိုလိုအပ်နေကြောင်း ပြောသည်။ အိမ်နီးချင်းနိုင်ငံများမှ ရွှေ့ပြောင်းအလုပ်သမား များသည် ထိုင်းနိုင်ငံတွင် အလုပ်လုပ်ရန် လုပ်ထုံးလုပ်နည်းများကို လိုက်နာဆောင်ရွက်သွားရမည်ဖြစ်ကြောင်း ထိုင်းဝန်ကြီးချုပ်က ပြောသည်။

Anusorn Tamajai က နှစ်နိုင်ငံကြား နားလည်မှုစာချွန်လွှာအရ စစ်မှုထမ်းခြင်းကိုရှောင်ရှားလိုသော မြန်မာလူငယ် များသည် ထိုင်းနိုင်ငံသို့ ဝင်ရောက်ရန် ကြိုးပမ်းလာနေကြောင်း၊ မြန်မာနိုင်ငံတွင်ပြုလုပ်မည့် စစ်မှုထမ်းခြင်း အကျိုးသက်ရောက်မှုကြောင့် ထိုင်းနိုင်ငံသို့ တရားဝင်နည်းလမ်းအပြင် တရားမဝင်နည်းလမ်းဖြင့်ဝင်ရောက်မည့် မြန်မာနိုင်ငံသားအရေအတွက် ပိုမိုမြင့်တက်လာဖွယ်ရှိနေကြောင်း ပြောသည်။

မြန်မာနိုင်ငံဆိုင်ရာထိုင်းသံရုံးသည် တစ်ရက်ကို ဗီဇာ ၄ဝဝ လျှောက်ထားရန် ခွင့်ပြုလက်ခံသွားမည်ဖြစ်ကြောင်း ပြီးခဲ့သောရက်ပိုင်းတွင် သတင်းထုတ်ပြန်ခဲ့သည်။ ထိုင်းသံရုံးသည် စစ်မှုထမ်းရခြင်းကိုရှောင်ရှားရန်အတွက် ထိုင်းနိုင်ငံအတွင်းသို့ လာရောက်လိုသော မြန်မာနိုင်ငံသားများအရေအတွက်ကိုကိုင်တွယ်ဖြေရှင်းရန်အတွက် ယင်းကဲ့သို့ သတင်းထုတ်ပြန်ခဲ့ခြင်းဖြစ်သည်။