Pika (NSS) - ဖေဖော်ဝါရီ ၁၉ 

BRICS အဖွဲ့ဝင်နိုင်ငံများတွင် သန်းကြွယ်သူဋ္ဌေးအသစ် အရေအတွက်သည် ၂ဝ၃၄ ခုနှစ်တွင် တစ်ဟုန်ထိုး တိုးလာ လိမ့်မည်ဖြစ်ပြီး ကမ္ဘာပေါ်ရှိမည်သည့်အစုအဖွဲ့များထက်မဆို ကြွယ်ဝချမ်းသာမှုအမြင့်ဆုံးဖြစ်လာစေရန် အထောက်အကူဖြစ်စေလိမ့်မည်ဖြစ်ကြောင်း Henley & Partners ကုမ္ပဏီ၏ မကြာသေးမီက ထုတ်ပြန်ခဲ့သော အစီရင်ခံစာအရ သိရသည်။

ဘရာဇီးလ်၊ အိန္ဒိယ၊ ရုရှား၊ တရုတ် နှင့် တောင်အာဖရိက တို့ပါဝင်သော ထွန်းသစ်စစီးပွားရေးအစုအဖွဲ့ BRICS သည် ယခုနှစ် ဇန်နဝါရီလတွင် ဆော်ဒီအာရေးဗျ၊ အီရန်၊ အီသီယိုးပီးယား၊ အီဂျစ် နှင့် ယူအေအီးတို့ကို အဖွဲ့ဝင်နိုင်ငံအဖြစ် လက်ခံပေးခြင်းဖြင့် အစုအဖွဲ့အင်အားကို ပိုမိုချဲ့ထွင်ခဲ့ကြောင်းလည်း သိရသည်။

အဆိုပါအစီရင်ခံစာအရ BRICS အဖွဲ့ဝင်နိုင်ငံများရှိ လူတစ်ဦးချင်းစီက လက်ရှိရင်းနှီးမြှုပ်နှံနိုင်သော စုစုပေါင်း ကြွယ်ဝမှုမှာ အမေရိကန်ဒေါ်လာ(၄၅)ထရီလီယံရှိပြီး လာမည့်ဆယ်စုနှစ်အတွင်း သန်းကြွယ်သူဌေးအရေအတွက် (၈၅)ရာခိုင်နှုန်းနီးပါး တိုးလာလိမ့်မည်ဖြစ်ကြောင်းလည်း ခန့်မှန်းထားသည်။

လက်ရှိအချိန်တွင် BRICS အဖွဲ့ဝင်နိုင်ငံများမှာ ဘီလျံနာ(၅၄၉)ဦး အပါအဝင် အမေရိကန်ဒေါ်လာသန်း(၁ဝဝ)ကျော် ပိုင်ဆိုင်သူ(၄၇၁၆)ဦးရှိပြီး အမေရိကန်ဒေါ်လာ(၁)သန်းကျော် ရင်းနှီးမြှုပ်နှံနိုင်သော ပိုင်ဆိုင်မှုများရှိသူ (၁ ဒသမ ၆) သန်း ရှိကြောင်းလည်း သိရသည်။ 

သို့သော်လည်း ကနေဒါ၊ ပြင်သစ်၊ ဂျာမနီ၊ ဂျပန်၊ အီတလီ၊ အမေရိကန် နှင့် ဗြိတိန်နိုင်ငံတို့ပါဝင်သော G7 အဖွဲ့၏ ရင်းနှီးမြှုပ်နှံနိုင်သော ပိုင်ဆိုင်မှုများအတွက် ကိန်းဂဏန်းမှာ ၂ဝ၂၃ ခုနှစ် ဒီဇင်ဘာလအထိ အမေရိကန်ဒေါ်လာ (၁၁ဝ) ထရီလီယံရှိကြောင်း New World Wealth ကုမ္ပဏီလေ့လာသုံးသပ်သူ အန်ဒရူးအေမိုးလစ်၏ ပြောဆိုချက်ကို ကိုးကားပြီး CNBC သတင်းဌာနက ရေးသားဖော်ပြခဲ့သည်။

ထို့အပြင် G7 အဖွဲ့ဝင်နိုင်ငံများတွင် သန်းကြွယ်သူဌေးအရေအတွက်မှာ လာမည့်ဆယ်စုနှစ်အတွင်း (၄၅)ရာခိုင်နှုန်း တိုးလာမည်ဟု ခန့်မှန်းထားကြောင်းလည်း သိရသည်။ Henley & Partners ကုမ္ပဏီ၏ မန်နေဂျင်းပါတနာ နှင့် အရှေ့တောင်အာရှအကြီးအကဲ ဒိုမီနစ်ဗိုလက်ခ်က "BRICS အဖွဲ့ဟာ ကမ္ဘာလုံးဆိုင်ရာအစီအစဉ်တွေကို စိန်ခေါ် နေပြီး G7 အဖွဲ့နဲ့ အခြားနိုင်ငံတကာအဖွဲ့အစည်းတွေအတွက် ဩဇာအာဏာကြီးမားတဲ့ပြိုင်ဖက်အဖြစ် ရပ်တည်နေပါတယ်" ဟု ပြောခဲ့သည်။