ဂျန်ဇက် (NSS) - ဖေဖော်ဝါရီ ၁၆ 

အစ္စရေးဝန်ကြီးချုပ်နေတန်ရာဟုသည် ပါလက်စတိုင်းကို နိုင်ငံတစ်နိုင်ငံအဖြစ်အသိအမှတ်ပြုရန် ငြင်းဆန်လိုက်ပြီး ယင်းကဲ့သို့ အသိအမှတ်ပြုပေးလိုက်ခြင်းက အကြမ်းဖက်သမားများကို ကြီးမားသောဆုကြေပေးသလိုမျိုးဖြစ်လာနိုင်ဖွယ်ရှိနေကြောင်း ထုတ်ဖော်ပြောဆိုလိုက်သည်။

အစ္စရေးနိုင်ငံ၏ အဓိကမဟာမိတ်ဖြစ်သောအမေရိကန်နိုင်ငံသည် အစ္စရေးနှင့် ပါလက်စတိုင်းနိုင်ငံကြား ကာလအတန်ကြာဖြစ်ပွားနေသည့် ပဋိပက္ခများကိုအဆုံးသတ်နိုင်ရန်အတွက် အာရပ်နိုင်ငံများနှင့်တွေ့ဆုံဆွေးနွေးနေပြီး ပါလက်စတိုင်းကို နိုင်ငံတစ်နိုင်ငံအဖြစ် အသိအမှတ်ပြုရန် အဆိုပြုကမ်းလှမ်းခြင်းများ ရှိနေကြောင်း သိရသည်။

နေတန်ရာဟုက “အစ္စရေးနိုင်ငံဟာ ပါလက်စတိုင်းကို နိုင်ငံတစ်နိုင်ငံအဖြစ် အသိအမှတ်ပြုမှုတွေ ဆန့်ကျင်နေတာ ဆက်လက်လုပ်ဆောင်မယ်။ ၂ဝ၂၃ ခုနှစ်မှာ အောက်တိုဘာ ၇ ရက်မှာ စတင်ခဲ့တဲ့ ဟားမက်စ်အဖွဲ့ရဲ့ တိုက်ခိုက်မှုတွေကိုတုံ့ပြန်ဖို့ လုပ်ဆောင်သွားမယ်။ ပါလက်စတိုင်းကို နိုင်ငံတစ်နိုင်ငံအဖြစ် အသိအမှတ်ပြုမယ်ဆို ရင် ဟားမက်စ်လက်နက်ကိုင်အုပ်စုတွေကိုကြီးမားတဲ့ ဆုကြေးပေးသလိုမျိုး ဖြစ်လာနိုင်တယ်။ အဲဒီလုပ်ရပ်က အနာဂါတ် ငြိမ်းချမ်းရေးသဘောတူညီချက်ကို အဟန့်အတားဖြစ်လာဖွယ်ရှိနေပါတယ်။ အစ္စရေးဟာ ပါလက်စတိုင်းတွေနဲ့ အမြဲတမ်းယှဉ်တွဲနေထိုင်ရေးနဲ့ပတ်သက်ပြီး နိုင်ငံတကာရဲ့စိုးရိမ်ချက်တွေကို ငြင်းဆန် ပယ်ချပါတယ်" ဟုပြောသည်။ထိုအပြင် အစ္စရေးဝန်ကြီးချုပ်က ကြိုတင်ကန့်သတ်ချက်မရှိဘဲ တိုက်ရိုက်တွေ့ဆုံ ဆွေးနွေးမှုများမှတဆင့် ငြိမ်းချမ်းရေးသဘောတူညီချက်များ ရရှိနိုင်ကြောင်း ပြောသည်။

အစ္စရေး နှင့် ဟားမက်စ်လက်နက်ကိုင်အဖွဲ့ကြားဖြစ်ပွားနေသည့် ဂါဇာဒေသစစ်ပွဲနှင့်ပတ်သက်ပြီး ငြိမ်းချမ်းရေးသဘောတူညီများသည်  မွတ်စလင်များ၏ရာမာဒန်ကာလဖြစ်သော မတ်လ ၁ဝ ရက်မတိုင်မီ ရရှိနိုင်မည်ဟု မျှော်လင့်ချက်များလည်း ရှိနေကြောင်း အမေရိကန်အခြေစိုက်ဝါရှင်တန်ပိုစ့်သတင်းစာက ဖော်ပြထားသည်။ ဟားမက်စ် နှင့် အစ္စရေးနိုင်ငံကြား အပစ်ခတ်ရပ်စဲရေးက အနည်းဆုံးနောက်ထပ် သီတင်းပတ်ခြောက်ပတ်အတွင်း စတင်နိုင်မည်ဟု အစ္စရေးအစိုးရတာဝန်ရှိသူများ၏ပြောဆိုချက်ကို ကိုးကားပြီး အမေရိကန်သတင်းစာတွင် ဖော်ပြ ထားသည်။