ဂျန်ဇက် (NSS) - ဖေဖော်ဝါရီ ၁၆ 

ပင်လယ်နီဒေသတွင် ယီမင်ဟူသီလက်နက်ကိုင်အဖွဲ့၏ တိုက်ခိုက်မှုများ ရပ်တန့်မည်ဆိုလျှင် အမေရိကန်တပ်ဖွဲ့များသည် ဟူသီလက်နက်ကိုင်အဖွဲ့အပေါ်တိုက်ခိုက်နေခြင်းများကို ရပ်တန့်သွားဖွယ်ရှိနေကြောင်း၊ အမေရိကန် အကြီးတန်းသံတမန်တစ်ဦးက ထုတ်ဖော်ပြောဆိုလိုက်သည်။

ယီမင်နိုင်ငံဆိုင်ရာအမေရိကန်အထူးကိုယ်စားလှယ်တစ်ဦးဖြစ်သော တင်လင်ဒါကင်က "ဟူသီလက်နက်ကိုင် အဖွဲ့တွေရဲ့လုပ်နိုင်စွမ်းတွေကိုလျော့ချဖို့ အမေရိကန်ရဲ့တိုက်ခိုက်မှုတွေ အလွန်အောင်မြင်ခဲ့ပါတယ်။ ဟူသီ လက်နက်ကိုင်အဖွဲ့အပေါ် အမေရိကန်ရဲ့တိုက်ခိုက်မှုတွေ ဆက်လက်လုပ်ဆောင်မယ်။ ဟူသီလက်နက်ကိုင်အဖွဲ့ တွေဟာ ပင်လယ်နီဒေသအတွင်း ကုန်စည်သင်္ဘောတွေကို တိုက်ခိုက်မှုရပ်တန့်မယ်ဆိုရင်တော့ ကျွန်တော်တို့ဟာ လည်း ငြိမ်းချမ်းရေးလမ်းကြောင်းကို သွားနိုင်ပါတယ်" ဟု ပြောသည်။

အစ္စရေး နှင့် ဟားမက်စ်လက်နက်ကိုင်အဖွဲ့ကြား စစ်ပွဲဖြစ်လာခဲ့ပြီးနောက်ပိုင်း ဟူသီလက်နက်ကိုင်အုပ်စုများသည် ပါလက်စတိုင်းပြည်သူများကို အားပေးထောက်ခံကြောင်း ပြသနိုင်ရန်အတွက် ပင်လယ်နီဒေသအတွင်းမှ ဖြတ်သန်း နေသော နိုင်ငံတကာကုန်စည်သင်္ဘောများကို ပစ်မှတ်ထားတိုက်ခိုက်ခဲ့ကြောင်း သိရသည်။ 

ဟူသီလက်နက်ကိုင်အဖွဲ့များသည် ပြီးခဲ့သော နှစ်နိုဝင်ဘာလနောက်ပိုင်းတည်းက ပင်လယ်နီဒေသအတွင်းမှ ဖြတ်သန်းနေသောကုန်စည်သင်္ဘောများကို အကြိမ်ပေါင်း ၄ဝ ကျော် ပစ်ခတ်တိုက်ခိုက်ခဲ့ကြောင်း သိရသည်။ အမေရိကန် နှင့် ဗြိတိန်တို့ဦးဆောင်သော ညွှန်ပေါင်းအဖွဲ့သည် ဟူသီလက်နက်ကိုင်အဖွဲ့များ၏ တိုက်ခိုက်မှု ရပ်တန့်ရန် နှင့် ဟူသီလက်နက်ကိုင်အဖွဲ့၏ တိုက်ခိုက်ရေးစွမ်းရည်များကိုလျော့နည်းစေရန်အတွက် ယီမင်နိုင်ငံရှိ ဟူသီလက်နက်ကိုင်အုပ်စု၏ စစ်ဘက်ဆိုင်ရာအဆောက်အဦးများကို ပစ်မှတ်ထားတိုက်ခိုက်ခဲ့ကြောင်း သိရသည်။

အမေရိကန်စစ်ဘက်က "ပရော်ဖက်ရှင်နယ်ပီသစွာလုပ်ဆောင်ခဲ့တယ်။ အမေရိကန်စစ်သားတွေဟာ ဘာလုပ် ဆောင်ရမလဲဆိုတာ ကောင်းကောင်းသိပါတယ်။ ဟူသီလက်နက်ကိုင်အုပ်စုရဲ့ပစ်မှတ်တွေကို ဖျက်ဆီးနိုင်ဖို့ တိုက်ခိုက်မှုတွေတော့ ဆက်လက်ရှိနေမှာဖြစ်တယ်" ဟု ပြောသည်။