မြူနစ် (NSS) -  ဖေဖော်ဝါရီ ၁၄

NCA လက်မှတ်ရေးထိုးထားပြီး နစကနှင့် ငြိမ်းချမ်းရေးဆွေးနွေးနေသော မွန်ပြည်သစ်ပါတီ(NMSP)အကြား နှစ်ခြမ်းကွဲနေကြောင်း သိရသည်။

မွန်ပြည်သစ်ပါတီသည် NLD အစိုးရလက်ထက်တွင် NCA လက်မှတ်ရေးထိုးခဲ့သော လက်နက်ကိုင်အဖွဲ့အစည်းတစ်ခုဖြစ် ပြီး လက်ရှိနစကအစိုးရနှင့်လည်း ငြိမ်းချမ်းရေးတွေ့ဆုံဆွေးနွေးမှုများ ပြုလုပ်လျက်ရှိသည်။

သို့သော် မွန်ပြည်သစ်ပါတီ(NMSP)၏ အထွေထွေအတွင်းရေးမှူး နိုင်ဇေယျ နှင့် ဒုစစ်ဦးစီးချုပ် ဗိုလ်မှူးချုပ်စလွန်းထော ပါဝင်သော အဖွဲ့သည် ဖေဖော်ဝါရီလ ၁၄ ရက်တွင် လက်နက်ကိုင်အဖွဲ့အစည်းများနှင့်ပူးပေါင်းကာ တပ်မတော်အား တိုက်ခိုက် သွားမည်ဟု ထုတ်ပြန်ကြေညာလာသည်။

မွန်ပြည်သစ်ပါတီသည် နစကနှင့် (၃)ကြိမ်တိုင်တိုင် တွေ့ဆုံဆွေးနွေးခဲ့ပြီး ယင်းကဲ့သို့ ဆွေးနွေးမှုများတွင် အားလုံးပါဝင်နိုင် သော နိုင်ငံရေးဆွေးနွေးပွဲများကသာ လက်ရှိနိုင်ငံရေးပြဿနာကို ဖြေရှင်းနိုင်မည်ဟူသည့် ရပ်တည်ချက်အပါအဝင် ဖက်ဒရယ်အခြေခံမူများကို တင်ပြဆွေးနွေးခဲ့သော်လည်း မျှော်မှန်းသည့်ရလဒ် မရှိခဲ့ကြောင်းလည်း နိုင်ဇေယျာနှင့်အဖွဲ့က ထုတ်ပြန်ထားသည်။

နစက၏ NSPNC နှင့် NCA လက်မှတ်ရေးထိုးထားသည့် EAOs (၇)ဖွဲ့တို့သည် ဖေဖော်ဝါရီလ ၁၃ ရက်တွင် နေပြည်တော်၌ တွေ့ဆုံဆွေးနွေးခဲ့ပြီး ယင်းဆွေးနွေးပွဲသို့ မွန်ပြည်သစ်ပါတီ (NMSP) မှ ဗဟိုကော်မတီဝင် နိုင်ဗညားမွန် ဦးဆောင်သောအဖွဲ့ က တက်ရောက်ခဲ့သည်ကို တွေ့ရှိရသည်။

ပြီးခဲ့သောကာလများ၌ နစကနှင့်ပြုလုပ်ခဲ့သော ငြိမ်းချမ်းရေးဆွေးနွေးပွဲများတွင် မွန်ပြည်သစ်ပါတီမှ ဒုတိယဥက္ကဋ္ဌ နိုင်အောင်မင်းက ဦးဆောင်ကာ တက်ရောက်ဆွေးနွေးခဲ့သည်ကိုလည်း တွေ့ရှိရသည်။

အထက်ပါကဲ့သို့ မွန်ပြည်သစ်ပါတီအကြား နှစ်ခြမ်းကွဲနေသည့်အခြေအနေများနှင့်ပတ်သက်၍ မေးမြန်းအတည်ပြုရန်အတွက် NSS အနေဖြင့် နိုင်အောင်မငေးထံသို့ ဖုန်းဖြင့် ဆက်သွယ်ခဲ့သော်လည်း အဆက်အသွယ်မရရှိခဲ့ပေ။

ယခုကဲ့သို့ မွန်ပြည်သစ်ပါတီအကြား နှစ်ခြမ်းကွဲလာသည့်ဖြစ်စဉ်သည် မွန်ပြည်သစ်ပါတီ၏ဥက္ကဋ္ဌဟောင်း နိုင်ထောမွန် ကွယ်လွန်ခဲ့ပြီး တစ်လနီးပါးခန့်အကြာတွင် ဖြစ်ပေါ်လာခဲ့ခြင်းလည်း ဖြစ် သည်။

ထို့ပြင် မွန်ပြည်သစ်ပါတီသည် NCA လက်မှတ်ရေးထိုးထားသော တိုင်းရင်းသားလက်နက်ကိုင်အဖွဲ့များ၏ ငြိမ်းချမ်းရေးလုပ်ငန်း စဉ် ဦးဆောင်အဖွဲ့(PPST)တွင် အဖွဲ့ဝင်အဖြစ် ပါဝင်ခဲ့ဖူးသော် လည်း လက်ရှိတွင် တင်းပြည့်ကျပ်ပြည့်အဖွဲ့ဝင်အဖြစ် ပါဝင် ခြင်းမရှိတော့ကြောင်း သိရသည်။

မွန်ပြည်သစ်ပါတီအနေဖြင့် “PPST မှာ ပါတယ်လို့လည်း ပြောလို့ရတယ်။ မပါဘူးလို့လည်း ပြောလို့ရတယ်။ ဘာဖြစ်လို့လဲ ဆိုတော့ ပြီးခဲ့တဲ့ ၂၀၂၂ ခုနှစ် ကတည်းက သူတို့က PPST ရဲ့ တင်းပြည့်ကျပ်ပြည့်အဖွဲ့ဝင် မဟုတ်ဘဲနဲ့ ပူးပေါင်းအဖွဲ့ဆိုပြီး တော့ တူတာကို တွဲလုပ်မယ်။ မတူတာကို ခွဲလုပ်မယ်ဆိုပြီးတော့ အဲဒီလိုမျိုး အပြောင်းအလဲဖြစ်သွားတာလည်း ကြာခဲ့ပြီလေ” ဟု PPST မှ ဗိုလ်မှူးကြီးစော ကျော်ညွန့်က NSS ကို ပြောသည်။