Pearl (NSS) - ဖေဖော်ဝါရီ ၁၀

လားရှိုးပြည်သူ့စစ် တပ်ဖွဲ့ဝင်များကို  လက်နက် တပ်ဆင်ပေးအပ်ခဲ့ကြောင်း  နစကမှ သတင်းထုတ်ပြန်ထားသည်။  

ယမန်‌နေ့ (ဖေဖော်ဝါရီလ ၉ ရက်)၊ နံနက်ပိုင်းတွင် ရှမ်းပြည်နယ် (မြောက်ပိုင်း)၊ လားရှိုးမြို့၊ ပြည်ထောင်စုအားကစားခန်းမ၌ လားရှိုးပြည်သူ့စစ် (ဌာနေ) အဖွဲ့ အခြေခံစစ်ပညာသင်တန်းအမှတ်စဉ် (၁/၂၀၂၄) သင်တန်းဆင်းပွဲနှင့် လက်နက်တပ်ဆင် အပ်နှင်းပွဲကို ပြုလုပ်ခဲ့ကြောင်း သိရသည်။ 

အဆိုပါ အခမ်းအနားသို့ ကာကွယ်ရေးဦးစီးချုပ်ရုံး (ကြည်း) မှ ဗိုလ်ချုပ် နိုင်နိုင်ဦး၊ အရှေ့မြောက်တိုင်းစစ်ဌာနချုပ် ဒုတိယတိုင်း မှူး ဗိုလ်မှူးချုပ် ကျော်ကျော်ထွန်း နှင့် အဖွဲ့ဝင်များ၊ ဌာနဆိုင်ရာတာဝန်ရှိသူများနှင့် ပြည်သူ့စစ်(ဌာနေ) တပ်ဖွဲ့ဝင်များ တက်ရောက်ခဲ့ကြောင်း သိရသည်။ 

အခမ်းအနား၌ ဗိုလ်ချုပ် နိုင်နိုင်ဦးနှင့် ဒုတိယတိုင်းမှူးတို့က ပြည်သူ့စစ်(ဌာနေ)တပ်ဖွဲ့ဝင်များကို လက်နက်များအပ်နှင်းပေးပြီး သင်တန်းထူးချွန်ဆုနှင့် စားသောက်ဖွယ်ရာများပေးအပ်ခဲ့ကြောင်း နစကမှ ဆိုသည်။ 

ရှမ်းပြည်နယ် အရှေ့မြောက်ပိုင်းဒေသရှိ တပ်မတော် လုံခြုံရေးစခန်းများကို ပြီးခဲ့သော ၂ဝ၂၃ ခုနှစ်၊ အောက်တိုဘာလ ၂၇ ရက်မှစတင်ကာ MNDAA ၊ TNLA နှင့် AA မြောက်ပိုင်းမဟာမိတ်လက်နက်ကိုင် (၃)ဖွဲ့သည် (၁ဝ၂၇ စစ်ဆင်ရေး)အမည်ဖြင့်  အင်အားအလုံးအရင်းဖြင့် ဝင်ရောက်တိုက်ခိုက်ခဲ့ပြီး တိုက်ပွဲများ ပြင်းထန်ခဲ့သည်။  

လက်ရှိအခြေအနေတွင် MNDAA ပူးပေါင်းအဖွဲ့အနေဖြင့် ရှမ်းပြည်နယ်အရှေ့မြောက်ပိုင်းဒေသရှိ လောက်ကိုင်၊ ကုန်းကြမ်း၊ ချင်းရွှေဟော်၊ ဖောင်းဆိုင်၊ ကြူကုတ်၊ မန်တုံ ၊ နမ္မတူ  စသည့်ဒေသများကိုလည်း ထိန်းချုပ်ထားနိုင်သည့် အခြေအနေရှိ ကြောင်း သိရသည်။

ပြီးခဲ့သည့် ဖေဖော်ဝါရီလ (၅)ရက်တွင်လည်း ပဲခူးတိုင်း (အနောက်ခြမ်း)ရှိ ပြည်သူ့စစ်(ဌာနေ) တပ်ဖွဲ့ဝင်များအား လက်နက်များ တပ်ဆင်အပ်နှင်းပေးပြီး စစ်ဝတ်ပစ္စည်းများနှင့် စားသောက်ဖွယ်ရာများ ထောက်ပံ့ပေးအပ်ခဲ့ကြောင်း သိရသည်။