Pika (NSS) - ဖေဖော်ဝါရီ ၇ 

တောင်ကိုရီးယားအနုပညာရှင်စုံတွဲ လီဆောင်းဂီနှင့်လီဒါအင်တို့သည် ၎င်းတို့၏ပထမဦးဆုံး သမီးလေးကို အောင်မြင်စွာ မွေးဖွားနိုင်ခဲ့ပြီဖြစ်ကြောင်း သတင်းထုတ်ပြန်ကြေညာထားသည်။

လီဆောင်းဂီနှင့် Lee Da-in တို့၏ ပထမဆုံးသမီးလေးကို ဖေဖော်ဝါရီလ(၅)ရက်က မွေးဖွားခဲ့ခြင်းဖြစ် ကြောင်း လီဆောင်းဂီ၏ အေဂျင်စီ Human Made က ထုတ်ပြန်ကြေညာထားသည်။ ထို့အပြင် မိခင်နှင့် ကလေးဖြစ်သူတို့သည် ကျန်းမာကောင်းမွန်သည့်အခြေအနေတွင်ရှိနေကြောင်း Human Made အေဂျင်စီက ပြောကြားခဲ့သည်။

လီဆောင်းဂီက "ဒီလိုမျိုးအဖိုးတန်တဲ့သမီးလေးကို ဘေးကင်းကင်းနဲ့ အောင်မြင်စွာမွေးဖွားနိုင်ခဲ့တဲ့ အတွက် ကျွန်တော်တကယ်ကို ပျော်ရွှင်မိပါတယ်" ဟု ပြောထားသည်။ လီဆောင်းဂီ နှင့် လီဒါအင်တို့ သည် ကိုယ်ဝန်ရရှိနေပြီကြောင်း ပြီးခဲ့သည့်နှစ် နိုဝင်ဘာလက ထုတ်ပြန်ကြေညာခဲ့ခြင်းဖြစ်သည်။ 

လီဆောင်းဂီ နှင့် Lee Da-in တို့သည် ပြီးခဲ့သည့်နှစ် ဧပြီလတွင် Grand Intercontinental Seoul Parnas ဟိုတယ်မှာ လက်ထပ်ခဲ့ကြခြင်းဖြစ်ကြောင်း သိရသည်။ ထို့နောက် လီဒါအင်၏ ဖခင်ဖြစ်သူသည် ငွေကြေး အလွဲသုံးစားလုပ်ခဲ့သည်ဆိုသည့်စွပ်စွဲမှုများရှိလာခဲ့ပြီးနောက် ၎င်းတို့နှစ်ဦးလုံးသည် လူအများ၏ ဝေဖန် မှုများကို ခံခဲ့ရကြောင်းလည်း သိရသည်။ 

လီဆောင်းဂီသည် အဆိုတော်တစ်ဦးဖြစ်သလို ကျော်ကြားသည့် ရုပ်ရှင်သရုပ်ဆောင်တစ်ဦးဖြစ်သည်။ ထို့အပြင် လီဆောင်းဂီသည် တောင်ကိုရီးယားနိုင်ငံ၏ ဝင်ငွေအကောင်းဆုံး အနုပညာရှင်များထဲက တစ်ဦး အဖြစ် သတ်မှတ်ခံထားရပြီး ဆုတံဆိပ်ပေါင်းများစွာကိုလည်း ရရှိထားသူတစ်ဦးဖြစ်ကြောင်း သိရသည်။