စော (NSS) - ဖေဖော်ဝါရီ ၇

မလေးရှားနိုင်ငံ‌ရောက် မြန်မာအမျိုးသားတစ်ဦး စက်ရုံတွင် အလုပ်ဝင်ပြီး (၃)ရက်အကြာ လုပ်ငန်းခွင်မတော်တဆမှုကြောင့် လက်ကျိုးရာ လုပ်ငန်းရှင်က ပစ်ထားသည့်ဖြစ်စဉ်ဖြစ်ပွားခဲ့ကြောင်း နှလုံးလှပရဟိတလူငယ်များသွေးလှူရှင်အဖွဲ့ထံမှ  သိရသည်။

အဆိုပါဖြစ်စဉ်မှာ မလေးရှားနိုင်ငံ၊ ကလန်းမြို့၊ ကန်ပုန်ဂျာဝါးရှိ စက်ရုံတစ်ခုတွင် ဖြစ်ပွားခဲ့ခြင်းဖြစ်ပြီး မြန်မာအမျိုးသားသည် မလေးရှားနိုင်ငံ၌ အလုပ်ဝင်သည်မှာ (၃)ရက်ခန့်သာရှိသေးချိန် စက်ရုံ၌ ဖော့ကလစ်ကားရှေ့တန်းပေါ်တွင် ပစ္စည်းကိုင်လိုက်ပါရာမှ အမြင့် (၁၀) ပေနီးပါးမှ ပြုတ်ကျသွားခဲ့ရာ ဝဲဘက်လက်ကျိုးခဲ့သည့်အပြင် ဦးခေါင်း နှင့် ခြေထောက်တို့တွင် ထိခိုက်ဒဏ်ရာအနည်းငယ်ရရှိသွားခဲ့ကြောင်း အဆိုပါအသင်းထံမှ သိရသည်။ 

၎င်း၏အလုပ်ရှင်သူ‌ဋ္ဌေးသည် မလေးရှားနိုင်ငံသား မဟုတ်ဘဲ တရုတ်နိုင်ငံသားဖြစ်နေခြင်းကြောင့် အကူအညီမပေးသည့်အပြင် စက်ရုံသို့ လာရောက်ခြင်းလည်းမရှိခဲ့ကြောင်း သိရသည်။

“အထောက်အထားဘာမှမရှိလို့ ဆေးရုံမှာကုသမှုခံယူဖို့ ကျွန်တော်တို့ နှလုံးလှအဖွဲ့ကိုအကူအညီတောင်းခံလာသည့်အတွက် နေထိုင်ရာသို့သွားရောက်ခေါ်ယူပြီး ပထမဆေးခန်းတွင် စစ်ဆေးမှုနှင့် လွှဲစာယူဆောင်ပြီး Specialist Sentosa ဆေးရုံပြီးသို့ ပို့ဆောင်ကူညီပေးခဲ့ကြပါသည်”ဟု အဆိုပါအသင်းမှ ၎င်းတို့၏ လူမှုကွန်ရက်ဖေ့စ်ဘွတ်ခ် စာမျက်နှာထက်တွင် အသိပေးရေးသားထားသည်။

ထို့ကြောင့် ထိခိုက်ဒဏ်ရာရရှိသည့် အမျိုးသားအား Specialist Sentosa ဆေးရုံကြီးသို့ ပို့ဆောင်ခဲ့ရာ ဆေးရုံတွင် (၃)ရက်ကြာ ဆေးကုသမှုခံယူခဲ့ရကြောင်း သိရသည်။