Pika (NSS) - ဇန်နဝါရီ ၃ဝ 

ဆိုမာလီပင်လယ်ဓါးပြများ ပြန်ပေးဆွဲထားသော အီရန်ငါးဖမ်းသင်္ဘောကို အောင်မြင်စွာကယ်ဆယ်နိုင်ခဲ့ကြောင်း အိန္ဒိယရေတပ်က ဇန်နဝါရီလ(၃ဝ)ရက်တွင် ထုတ်ဖော်ပြောခဲ့သည်။

အိန္ဒိယစစ်သင်္ဘော INS Sumitra သည်  အီရန်အလံလွှင့်တင်ထားကာ ပါကစ္စတန်နိုင်ငံသား အဖွဲ့ဝင်(၁၉)ဦး လိုက်ပါလာသော Al-Naeemi ငါးဖမ်းသင်္ဘောကို ဘေးကင်းစွာပြန်လွှတ်ပေးရန် ဆိုမာလီပင်လယ်ဓါးပြများကို တွန်းအားပေးခဲ့ကြောင်း ရေတပ်ပြောရေးဆိုခွင့်ရှိသူတစ်ဦးက ပြောကြားခဲ့သည်။

Al-Naeemi ငါးဖမ်းသင်္ဘောကို ကယ်ဆယ်မှုအား အိန္ဒိယနိုင်ငံ ကိုချီမြို့အနောက်ဘက် ရေပိုင်(၈၅ဝ) အကွာတွင် ဇန်နဝါရီလ(၂၉)ရက် ညပိုင်းက လုပ်ဆောင်ခဲ့ခြင်းဖြစ်ကြောင်း ၎င်းက ထပ်မံပြောကြားခဲ့သည်။ ဆိုမာလီပင်လယ် ဓါးပြ စုစုပေါင်း(၁၁)ယောက်သည် Al-Naeemi ငါးဖမ်းသင်္ဘော၏ သင်္ဘောသားများကို ဓါးစာခံအဖြစ် ဖမ်းဆီး ခေါ်ဆောင်သွားခဲ့ခြင်းဖြစ်ကြောင်း အိန္ဒိယရေတပ်က ပြောကြားခဲ့သည်။

အိန္ဒိယရေတပ်က ထုတ်ပြန်ထားသော ဓါတ်ပုံများတွင် ကွန်မန်ဒိုများသည် ငါးဖမ်းသင်္ဘောပေါ်သို့တက်ကာ ဆိုမာလီပင်လယ်ဓါးပြများကို ဝိုင်းထားသည်ကိုလည်း တွေ့မြင်ခဲ့ရသည်။ ထို့အပြင် သင်္ဘောကုန်းပတ်ပေါ်တွင် လက်ကိုနောက်ပြန်ကြိုးတုပ်ကာ ဒူးထောက်နေရသည့်အမျိုးသားများကိုလည်း အဆိုပါဓါတ်ပုံထဲတွင် တွေ့မြင်ခဲ့ရ သည်။

ဆိုမာလီပင်လယ်ဓါးပြများ ပြန်ပေးဆွဲထားသည့် အီရန်အလံလွှင့်တင်ထားသော Iman ငါးဖမ်းသင်္ဘောပေါ်မှ အဖွဲ့သား(၁၇)ဦးကို ရေတပ်က ကယ်ဆယ်နိုင်ခဲ့ကြောင်း အိန္ဒိယအစိုးရက ထုတ်ပြန်ပြောဆိုခဲ့ပြီးနောက် (၃၆)နာရီ အကြာတွင် ယခုကဲ့သို့ ကယ်ဆယ်မှုများ ထပ်မံလုပ်ဆောင်ခဲ့ခြင်းဖြစ်ကြောင်း သိရသည်။

အီရန်ကျောထောက်နောက်ခံပြု ယီမင်အခြေစိုက် ဟူသီလက်နက်ကိုင်အဖွဲ့၏ သီးခြားတိုက်ခိုက်မှုများ မြင့်တက် လာမှုနှင့်အတူ ဆိုမာလီပင်လယ်ဓါးပြများ၏ ပြန်ပေးဆွဲမှုများသည် အိန္ဒိယသမုဒ္ဒရာအတွင်း ပင်လယ်ဓါးပြများ၏ ဝင်ရောက်စီးနင်းမှုများ ပြန်လည်ပေါ်ပေါက်လာမည်ကို စိုးရိမ်မှုများ မြင့်တက်လာစေခဲ့ကြောင်းလည်း သိရသည်။