Pika (NSS) - ဇန်နဝါရီ ၃ဝ 

လက်ရှိ ဇန်နဝါရီလ အပြောင်းအရွှေ့ဈေးကွက်မပိတ်မီ Al-Ittihad အသင်းတိုက်စစ်မှူး ဘန်ဇီမာသည် ၎င်း၏ ရီးရဲလ်မက်ဒရစ်အသင်းကစားဖော်ဟောင်း စီရော်နယ်ဒို နှင့် အယ်လ်နာဆာအသင်းတွင် ပြန်လည်ပေါင်းစည်းနိုင်ဖွယ်ရှိနေကြောင်း သိရသည်။

ဘန်ဇီမာသည် ဆော်ဒီပရိုလိဂ်  Al-Ittihad အသင်းတွင် မပျော်မရွှင်ဖြစ်နေကြောင်း သတင်းများထွက်ပေါ်ခဲ့ပြီး နောက် အသင်းမှ ထွက်ခွာရန်အတွက် ချိတ်ဆက်မှုများစွာရှိနေကြောင်းလည်း သိရသည်။ ဘန်ဇီမာသည် အယ်လ်နာဆာအသင်းတာဝန်ရှိသူများ နှင့် စကားပြောဆိုမှုများလုပ်ဆောင်ခဲ့ပြီး ၎င်း၏ ရီးရဲလ်မက်ဒရစ်အသင်းကစားဖော်ဟောင်း စီရော်နယ်ဒို နှင့် အယ်လ်နာဆာအသင်းတွင် ပြန်လည် ပေါင်းစည်းနိုင်ဖွယ်ရှိနေကြောင်း L’Équipe ချန်နယ်က ဖော်ပြခဲ့သည်။

သို့သော်လည်း အယ်လ်နာဆာအသင်းအပြင် Al-Hilal အသင်းသည်လည်း ဘန်ဇီမာကိုခေါ်ယူရန်အတွက် ချိတ်ဆက်မှုများ လုပ်ဆောင်လျက်ရှိကြောင်း သိရသည်။ 

ဘန်ဇီမာ နှင့် စီရော်နယ်ဒိုတို့သည် ရီးရဲလ်မက်ဒရစ်အသင်းတွင် ၂ဝဝ၉ ခုနှစ်မှ ၂ဝ၁၈ ခုနှစ်အထိ (၉)နှစ်ကြာ တွဲကစားခဲ့ဖူးကြောင်းလည်း သိရသည်။ အဆိုပါ(၉)နှစ်အတွင်း ဘန်ဇီမာ နှင့် စီရော်နယ်ဒိုတို့သည် ချန်ပီယံလိဂ်ဆုဖလား (၄)ကြိမ် အပါအဝင် ဆုဖလားပေါင်းများစွာကို အတူတကွ ဆွတ်ခူးနိုင်ခဲ့ကြောင်းလည်း သိရသည်။