ယွန်း (NSS) - ဇန်နဝါရီ ၂၇

မြန်မာနိုင်ငံသားများ ပါဝင်ယှဥ်ပြိုင်နိုင်မည့် ဧရာဝတီ-ကျောက်ဖရား-မဲခေါင် စီးပွားရေးပူးပေါင်းဆောင်ရွက်မှု မဟာဗျူဟာ (အက်ခ်မက်)၏ Logo Design ပြိုင်ပွဲအတွက် ပြိုင်ပွဲဝင်များဖိတ်ခေါ်သွားမည်ဖြစ်ကြောင်း နစကမှ အသိပေးထုတ်ပြန်ထားသည်။

ထိုင်းနိုင်ငံခြားရေးဝန်ကြီးဌာနမှ ဦးဆောင်ပြုလုပ်သွားမည့် အဆိုပါပြိုင်ပွဲကို အသက်(၁၅)နှစ်နှင့်အထက် မြန်မာနိုင်ငံသားများ တစ်ဦးချင်း(သို့မဟုတ်) အဖွဲ့လိုက် ဝင်ရောက်ယှဥ်ပြိုင်နိုင်ကြောင်း သိရသည်။

ပြိုင်ပွဲလျှောက်လွှာများကို ACMECS Interim Secretariat ၏ အီးမေးလ် acmecs.sec@gmail.com သို့ ဖေဖော်ဝါရီလ (၁)ရက်မှ မတ်လ(၃၁)ရက်အထိ ပေးပို့လျှောက်ထားနိုင်ကြောင်း ဖော်ပြချက်အရ သိရသည်။

ပြိုင်ပွဲတွင် ဆုရရှိသူများအား ပထမဆုအတွက် အမေရိကန်ဒေါ်လာ ၁၀၀၀ ၊ ဒုတိယဆုအတွက် အမေရိကန်ဒေါ်လာ ၅၀၀ နှင့် တတိယဆုအတွက် အမေရိကန်ဒေါ်လာ ၃၀၀ ချီးမြှင့်သွားမည်ဖြစ်ကြောင်း သိရသည်။

ပြိုင်ပွဲဝင်များသည် Logo Design ကို JPEG/PNG/PDF ဖိုင်အမျိုးအစားဖြင့် ပေးပို့ရန်လိုပြီး Logo သည် High Resolution နှင့် အနည်းဆုံး 300 DPI အရွယ်အစားဖြစ်ရန် ထုတ်ပြန်ချက်တွင် ဖော်ပြထားသည်။

ပြိုင်ပွဲလျှောက်လွှာပုံစံ(Application Form)၊ Terms and Conditions နှင့် ပြိုင်ပွဲဆိုင်ရာ အသေးစိတ်အချက်အလက်များကို https://shorturl.at/zAJOW တွင်လည်း ဖေဖော်ဝါရီလ ၁ ရက်မှစ၍ ရယူနိုင်ကြောင်း သိရသည်။

ပြိုင်ပွဲဝင်လျှောက်လွှာများကို ACMECS Interim Secretariat မှ စိစစ်လက်ခံ၍ အက်ခ်မက်အဖွဲ့ဝင်နိုင်ငံများမှ ကိုယ်စားလှယ်များဖြင့် ဖွဲ့စည်းထားသည့် ဆုရွေးချယ်ရေးကော်မတီမှ အကဲဖြတ်ရွေးချယ်မည်ဖြစ်သည်။

ထို့ပြင် ပြိုင်ပွဲ/ပြိုင်ပွဲဝင်လျှောက်လွှာများ/ ဆုရရှိသူများနှင့်ပတ်သက်၍ ဥပဒေကြောင်းအရ ဆောင်ရွက်ရန်ကိစ္စရပ်တစ်စုံတစ်ရာ ပေါ်ပေါက်လာပါက ထိုင်းနိုင်ငံ၏ ပြည်တွင်းတရားစီရင်ပိုင်ခွင့်ဖြင့် ဆောင်ရွက်သွားမည်ဖြစ်ကြောင်း သိရသည်။

ACMECS သည် မြန်မာ၊ ထိုင်း၊ လာအို၊ ဗီယက်နမ်၊ ကမ္ဘောဒီးယားနိုင်ငံတို့အကြား နိုင်ငံရေး၊ စီးပွားရေးနှင့် ယဉ်ကျေးမှုဆိုင်ရာ အဖွဲ့အစည်းတစ်ခု ဖြစ်သည်။