ရောင်နီ (NSS) - ဇန်နဝါရီ ၂၇

        တောင်ကိုရီးယား K - POP အမျိုးသမီးအဖွဲ့ NewJeans ဟာ 2024 Billboard Women In Music Awards မှာ တစ်နှစ်တာအကောင်းဆုံးတေးဂီတအဖွဲ့(Group of the Year )ဆုကို ရရှိခဲ့ပါတယ်။ 

အသက် ၁၅ နဲ့ ၁၉ နှစ်ကြားအရွယ် ဆယ်ကျော်သက်မိန်းကလေး မင်ဂျီ၊ ဒန်နယ်လီ၊ ဟေရင်း၊ ဟန်နီ တို့နဲ့ ဖွဲ့ထားတဲ့ NewJeans K POP  အဖွဲ့ဟာ  ဒီဆုကို ဆွတ်ခူးဖို့ မတ်လ ၆ ရက်မှာ လော့အိန်ဂျလိစ်ရှိ YouTube Theater ကို သွားရောက်ရမှာဖြစ်တယ်လို့ အဖွဲ့ရဲ့ အေဂျင်စီဖြစ် Ador ကပြောကြားခဲ့ပါတယ်။ NewJeans နဲ့အတူ အမေရိကန်ရက်ပ်ပါ Ice Spice၊ အင်္ဂလိပ်ပေါ့ပ်စတား Charli XCX နဲ့ သြစတြေးလျအဆိုတော် Kylie Minogue တို့လည်း ဆုရရှိခဲ့တယ်လို့ သိရပါတယ်။ 

        ၂၀၂၂ ခုစ် ဇူလိုင်လက ပွဲဦးထွက်ခဲ့တဲ့ New Jeans အဖွဲ့ဟာ Ditto, OMG, Super Shy, ETA ၊ Cool With You သီချင်းတွေနဲ့ ၂၀၂၃ ခုနှစ်ရဲ့ Billboard's Hot 100 ကို သိမ်းပိုက်ခဲ့သလို ၂၀၂၃  ခုနှစ် ဇူလိုင်လက ထွက်ရှိခဲ့တဲ့ New Jeans ရဲ့ ဒုတိယမြောက် EP Get Up ဟာ သြဂုတ်လ ၅ ရက်မှာ Billboard Top Ten 200 မှာ ထိပ်ဆုံးမှ ရပ်တည်ခဲ့ပါတယ်။ ဒါ့ပြင် အဖွဲ့ရဲ့ Super Shy သီချင်းဟာလည်း ဧပြီလ ၁ ရက်၊ လော့အိန်ဂျလိစ့်မှာ ကျင်းပပြုလုပ်မယ့် iHeartRadio Music Awards မှာ တစ်နှစ်တာအကောင်းဆုံး K POP သီချင်းဆုအတွက် ဆန်ခါတင် စာရင်းဝင်ထားပါတယ်။           

၂၀၀၇ ခုနှစ်၊ American music publication မှ စတင်ခဲ့တဲ့ Billboard Women In Music Awards ဟာ ဂီတနယ်ပယ်ရှိ အမျိုးသမီးတွေကို အသိအမှတ်ပြုဖို့ ရည်ရွယ်ပြီး နှစ်စဉ်ဆုချီးမြှင့်မှုများ ပြုလုပ်လေ့ ရှိပါတယ်။