ဂျန်ဇက် (NSS) - ဇူလိုင် ၂၇

ဥရောပသမဂ္ဂဟာ ရုရှားနိုင်ငံထံကနေ သိမ်းယူထားတဲ့ငွေကြေးများအနက်မှ အမေရိကန်ဒေါ်လာ (၁ ဒသမ ၆ ) ဘီလျံကို ယူကရိန်းနိုင်ငံကို လွှဲပြောင်းကူညီပေးခဲ့ကြောင်းသိရပါတယ်။ ဥရောပသမဂ္ဂအဖွဲ့ဝင်နိုင်ငံများဟာ ရုရှားဗဟိုဘဏ်က အပ်နှံထားတဲ့ငွေကြေးများကို သိမ်းဆည်းပြီး ယူကရိန်းကို စစ်လက်နက်ပစ္စည်းများတပ်ဆင်ပေးဖို့နဲ့စစ်ပွဲအပြီး ပြန်လည်တည်ဆောက်ရေးလုပ်ငန်းတွေမှာအသုံးချဖို့ သဘောတူညီခဲ့ကြောင်း သိရပါတယ်။

ဥရောပသမဂ္ဂဟာ ရုရှားဗဟိုဘဏ်ထံကနေ  ယူရို ၂၀၀ ဘီလျံ သိမ်းဆည်းခဲ့ပြီး ယူကရိန်းကို ကူညီထောက်ပံ့ပေးဖို့အစီအစဉ်တွေရှိနေကြောင်း အစောပိုင်းကတည်းက သတင်းတွေထွက်ပေါ်ခဲ့ဖူးပါတယ်။ ဥရောပသမဂ္ဂအဖွဲ့အကြီးအကဲက "ယူကရိန်းနဲ့အတူ ရပ်တည်သွားမယ်။ ကျွန်မတို့ဟာ ယူကရိန်းကို အမေရိကန်ဒေါ်လာ ၁ ဒသမ ၆ ဘီလျံကူညီထောက်ပံ့ပေးထားတယ်။ အဲဒီပိုက်ဆံတွေဟာ ရုရှားနိုင်ငံထံကနေ သိမ်းယူထားတဲ့ပိုက်ဆံတွေသာဖြစ်တယ်"လို့ ပြောပါတယ်။

ရုရှားအစိုးရဟာ ၎င်းတို့ပိုင်ဆိုင်မှုများ သိမ်းယူခြင်းနဲ့ပတ်သက်ပြီး ဥရောပသမဂ္ဂကို သတိပေးထားပြီး တူညီတဲ့တုံ့ပြန်မှုတွေလုပ်ဆောင်သွားမယ်လို့ ပြောပါတယ်။ ယူကရိန်းနဲ့ ရုရှားစစ်ပွဲဖြစ်လာခဲ့ပြီးနောက်ပိုင်း ဥရောပသမဂ္ဂဟာ ယူကရိန်းကို စစ်လက်နက်ပစ္စည်းတွေ ကူညီထောက်ပံ့ပေးခဲ့ပြီး ရုရှားကို ပိတ်ဆို့မှုတွေချမှတ်ခဲ့ရာ တင်းမာမှုတွေဖြစ်လာခဲ့ကြောင်း သိရပါတယ်။ ယူကရိန်းအစိုးရကတော့ ဥရောပသမဂ္ဂအဖွဲ့ရဲ့ကူညီထောက်ပံ့ပေးခြင်းတွေကို ကျေးဇူးတင်ကြောင်း ထုတ်ဖော်ပြောဆိုခဲ့ပါတယ်။ ရုရှားအစိုးရကတော့ ဥရောပသမဂ္ဂရဲ့လုပ်ရပ်တွေဟာ တရားမဝင်လုပ်ရပ်မျိုးသာဖြစ်တယ်လို့ ပြစ်တင်ဝေဖန်ခဲ့ပါတယ်။ ရုရှားနဲ့ ယူကရိန်းနိုင်ငံကြားဖြစ်ပွားနေတဲ့စစ်ပွဲဟာ အချိန်(၂)နှစ်ကျော်ကြာမြင့်နေပေမယ့် လက်ရှိအချိန်အထိ အပစ်ခတ်ရပ်စဲရေးရယူနိုင်ခြင်းမျိုးမရှိသေးကြောင်း သိရပါတယ်။