ဂျန်ဇက် (NSS) - ဇူလိုင် ၂၇

တရုတ်နိုင်ငံခြားရေးဝန်ကြီး ဝမ်ယိဟာ အမေရိကန်နိုင်ငံထုတ် တာလတ်ပစ်ဒုံးကျည်များဖြန့်ကြက်ချထားခြင်းနဲ့ပတ်သက်ပြီး ဖိလစ်ပိုင်နိုင်ငံကို သတိပေးပြောဆိုလိုက်ကြောင်းသိရပါတယ်။ 

တရုတ်နိုင်ငံခြားရေးဝန်ကြီးဟာ လာအိုနိုင်ငံမှာကျင်းပတဲ့ အာဆီယံနိုင်ငံခြား ရေးဝန်ကြီးများအစည်းအဝေးကို တက်ရောက်လာချိန်အတွင်း ဖိလစ်ပိုင်နိုင်ငံခြားရေးဝန်ကြီးကို သတိပေးပြောဆိုခဲ့တာဖြစ်ကြောင်းသိရပါတယ်။ အမေရိကန်နိုင်ငံဟာ ဒီနှစ်အစောပိုင်းက ကျင်းပတဲ့ စစ်ရေးလေ့ကျင့်ခန်းအစီအ စဉ်အတွင်း ဖိလစ်ပိုင်နိုင်ငံမှာ တိုင်ဖွန်းအမည်ရှိ ဒုံးကျည်တွေကို ဖြန့်ကြက်ချထားခဲ့ကြောင်း သိရပါတယ်။ အဆိုပါဖိလစ်ပိုင်နဲ့ အမေရိကန်နိုင်ငံတို့ ပူးတွဲပြုလုပ်တဲ့ စစ်ရေးလေ့ကျင့်ခန်းအစီအစဉ်အတွင်း အဆိုပါဒုံးကျည်ကို ပစ်ခတ်ခြင်းမျိုးမရှိခဲ့သလို ဖိလစ်ပိုင်နိုင်ငံမှာ အချိန်ဘယ်လောက်ကြာဖြန့်ကြက်ချထားမယ်ဆိုတဲ့အချက်ကို ဖိလစ်ပိုင်ဘက်က သတင်းထုတ်ပြန်ခြင်းမရှိပါဘူး။ တရုတ်အစိုးရက အဲဒီဒုံးကျည်တွေချထားခြင်းဟာ ဒေသအတွင်းတင်းမာမှုများဖြစ်လာစေသလို စစ်လက်နက်ပြိုင်ဆိုင်မှုတွေပိုမိုဖြစ်လာနိုင်ဖွယ်ရှိတယ်လို့ ဆိုပါတယ်။

တရုတ်နဲ့ ဖိလစ်ပိုင်နိုင်ငံကြားဆက်ဆံရေးဟာ တောင်တရုတ်ပင်လယ်အ ရေးနဲ့ပတ်သက်ပြီး လမ်းဆုံလမ်းခွကို ရောက်ရှိနေပြီး အငြင်းပွားမှုများမြင့်တက်နေရာ ဖြေလျော့နိုင်ဖို့ ကြိုးပမ်းနေရကြောင်း သိရပါတယ်။ ဖိလစ်ပိုင် ကတိတွေကို ချိုးဖောက်သလို နှစ်နိုင်ငံကြားနားလည်မှုတွေကို ချိုးဖောက်ခဲ့ရာ ဖိလစ်ပိုင်နဲ့တရုတ်နိုင်ငံကြား အပြန်အလှန်ဆက်ဆံရေးက စိန်ခေါ်မှုများရှိလာနေကြောင်း တရုတ်နိုင်ငံခြားရေးဝန်ကြီးကပြောပါတယ်။ ၎င်းက "ဖိလစ်ပိုင်နိုင်ငံဟာ အမေရိကန်နိုင်ငံထုတ် တာလတ်ပစ်ဒုံးကျည်တွေကိုဖြန့်ကြတ်ချထားခဲ့တယ်။ အဲဒီလုပ်ရပ်ကဒေသအတွင်းမှာထိပ်တိုက်တွေ့ဆုံမှုတွေဖြစ်လာစေတယ်။လက်နက်အားပြိုင်မှုတွေလည်းဖြစ်လာစေတယ်"လို့ပြောပါတယ်။