ကာလဝမ်းရောဂါပိုးရှိသူ (၅)ဦးခန့်ရှိခဲ့၍ လမ်းဘေးစားသောက်ဆိုင်များကို ယာယီပိတ်ထားခြင်းများ ဆောင်ရွက်နေဟု ဆို
စော (NSS) - ဇူလိုင် ၇
ယခုရက်ပိုင်းအတွင်း ကာလဝမ်းရောဂါပိုးတွေ့ရှိသူ (၅)ဦးခန့်ရှိခဲ့၍ လမ်းဘေးစားသောက်ဆိုင်များကို ယာယီပိတ်ထားခြင်း၊ ရေနှင့် ပတ်ဝန်းကျင်သန့်ရှင်းမှုလုပ်ငန်းများကို ဆောင်ရွက်နေကြောင်း နစက သတင်းထုတ်ပြန်ရေးအဖွဲ့ ခေါင်းဆောင် ဗိုလ်ချုပ်ဇော်မင်းထွန်း၏ ပြောကြားချက်အရ သိရသည်။
ဗိုလ်ချုပ်ဇော်မင်းထွန်းက ယမန်နေ့(ဇူလိုင်လ ၆ ရက်)၊ ညပိုင်းက မီဒီယာများကို အထက်ပါကဲ့သို့ ထုတ်ဖော်ပြောကြားခဲ့ခြင်းဖြစ်သည်။
ရန်ကုန်တိုင်းဒေသကြီး ဒေါပုံမြို့နယ်၊ နွယ်အေးရပ်ကွက် သဲကွင်းကျူးကျော်ရပ်ကွက်တွင် ဝမ်းပျက်ဝမ်းလျှောရောဂါဖြစ်ပွားနေသည်ကို သတင်းရရှိခဲ့သဖြင့် ပြီးခဲ့သည့် ဇူလိုင်လ ၃ ရက်နေ့တွင် သွားရောက်စစ်ဆေးခဲ့ရာ ဝမ်းပျက်ဝမ်းလျှောရောဂါလက္ခဏာဖြစ်ပွားသူ ၁၂ ဦးရှိခဲ့ပြီး ဆေးရုံတက်ရောက်ကုသသူ ၉ ဦး ရှိခဲ့ကြောင်း သိရသည်။
“အဲဒီ ၉ ဦးရဲ့ဝမ်းနမူနာတွေကိုစစ်ဆေးခဲ့ပါတယ်။ စစ်ဆေးခဲ့အခါမှာတစ်ဦးက ကာလဝမ်းရောဂါပိုးတွေ့ရှိတယ်ဆိုတဲ့ အဖြေထွက်ခဲ့ပါတယ်။ ဒါကြောင့် ကျန်းမာရေးဝန်ကြီးဌာနအနေနဲ့ ဆေးရုံအသီးသီးမှာတက်ရောက်နေတဲ့ ဝမ်းပျက်ဝမ်းလျှောရောဂါလက္ခဏာပြတဲ့လူနာတွေကို ကာလဝမ်းရောဂါပိုး ရှိ/မရှိ စစ်ဆေးခဲ့ပါတယ်။ ဒီနေ့ထိတွေ့ရှိရတာကတော့ ဝိတိုရိယဆေးရုံမှာတစ်ဦး၊ ရန်ကုန်ပြည်သူ့ဆေးရုံကြီးမှာ ၄ ဦး စုစုပေါင်း ၅ ဦး တွေ့ရှိတယ်ဆိုတဲ့ အဖြေထွက်ရှိခဲ့ပါတယ်။ ကျန်တဲ့ ဝမ်းပျက်ဝမ်းလျှောရောဂါလက္ခဏာပြတဲ့သူတွေကတော့ ကာလဝမ်းရောဂါပိုး မတွေ့ရှိခဲ့ပါဘူး”ဟု ဗိုလ်ချုပ်ဇော်မင်းထွန်းက ပြောသည်။
အဆိုပါသဲကွင်းကျူးကျော်ရပ်ကွက်ကို တာဝန်ရှိသူများက သွားရောက်စစ်ဆေးခဲ့ရာ ၎င်းရပ်ကွက်၌ အိမ်ခြေ (၁၆၆)လုံးတွင် လူဦးရေ (၆၄၆)ဦးနေထိုင်ပြီး အများဆုံးအိမ်သာ (၁၂)ခန်းသာရှိသည်ကို တွေ့ရှိခဲ့သောကြောင့် ဝမ်းပျက်ဝမ်းလျှောရောဂါဖြစ်ပွားစေသော အကြောင်းအရင်းဖြစ်သည်ဟု ဗိုလ်ချုပ်ဇော်မင်းထွန်းက ပြောကြားခဲ့သည်။ ထို့ကြောင့် ရောဂါဖြစ်ပွားမှုကို စောစီးစွာသိရှိပြီး စောစောစီးစီးကုသပေးနိုင်ရန်အတွက် လမ်းဘေးစားသောက်ဆိုင်များကို ယာယီပိတ်ထားခြင်း၊ ရေနှင့်ပတ်ဝန်းကျင်သန့်ရှင်းမှုလုပ်ငန်းများကို ဆောင်ရွက်လျက်ရှိကြောင်း သိရသည်။
“ခုနကျွန်တော်ပြောတဲ့ ဝမ်းပျက်ဝမ်းလျှောရောဂါနဲ့ ဆေးရုံတက်ရောက်သူထဲမှာ ဝမ်းပျက်ဝမ်းလျှောရောဂါကြောင့် သေဆုံးသူမရှိပါဘူး။ အဲဒီထဲကမှာ တစ်ဦးကတော့ ဝမ်းပျက်ဝမ်းလျှောရောဂါကြောင့်မဟုတ်ဘဲနဲ့ နဂိုကတည်းကတိုင်း ခုခံအားကျဆင်းမှု ကူးစက်ရောဂါအခံရှိလို့ သေဆုံးခဲ့တယ်လို့ သိရပါတယ်”ဟု ၎င်းက ဆက်လက်ပြောသည်။
အဆိုပါရပ်ကွက်များကို သွားရောက်စစ်ဆေးပြီးနောက် ယာယီဆေးခန်းဖွင့်လှစ်၍ လူနာသစ်များ လာရောက်ပြသမှု အခြေအနေများကို လက်ခံခြင်း၊ တိုင်းဒေသကြီးရှိ တာဝန်ရှိအဖွဲ့အစည်းများ၊ ဒေသခံကျန်းမာရေးဝန်ထမ်းများ နှင့် လူမှုအဖွဲ့အစည်းများ၊ Volunteer များက ရပ်ကွက်အတွင်း သန့်ရှင်းသော ရေရှိရေးအတွက် ကလိုရင်းဆေးခတ်ခြင်း၊ ပတ်ဝန်းကျင်သန်ရှင်းရေးဆောင်ရွက်ခြင်းနှင့် ရေသန့်ဖြန့်ဝေးခြင်းများ ဆောင်ရွက်လျက်ရှိကြောင်း သိရသည်။
ကျန်းမာရေးဝန်ကြီးဌာနအနေဖြင့်လည်း ဝမ်းပျက်ဝမ်းလျှောရောဂါကို ကာကွယ်နိုင်ရေးအတွက် ယင်နားစာ စသည့် မသန့်ရှင်းသည့် အစားအစာများကိုမစားသုံးရန် နှင့် FDA အသိအမှတ်ပြုသောက်ရေသန့် (သို့မဟုတ်) ရေသန့်စင်ဆေးပြားအသုံးပြု၍ သန့်စင်ထားသည့်ရေ (သို့မဟုတ်) ဆူပွက်အောင်ကျိုချက်ထားသည့်ရေကို သောက်သုံးရန် အသိပေးထုတ်ပြန်ထားသည်။
Comments :
0 comments
![](http://nssmy.com/ads/f-3-23-08-2022630475dc2221a.jpg)
မကွေးတိုင်းဒေသကြီး၊ စလင်းမြို့နယ်၊ အုတ်ဖိုကန်ကျေးရွာ၊ မင်းဘူး- စလင်းကားလမ်းပေါ်တွင် သစ်ပင်လဲကျမှုဖြစ်ပွား
UK Official Singles Chart မှာ ဂျီမင် နဲ့ လီဆာတို့ရဲ့ တစ်ကိုယ်တော်သီချင်းသစ်များ နေရာယူလာ
RELATED POSTS
06 Sep 2024 | ကျန်းမာရေး,နိုင်ငံတကာ
31 Aug 2024 | ကျန်းမာရေး,နိုင်ငံတကာ
27 Aug 2024 | ကျန်းမာရေး,ပြည်တွင်း
26 Aug 2024 | ကျန်းမာရေး,နိုင်ငံတကာ