သန့်ဇင် (NSS) - ဧပြီ ၂၃

မြန်မာ့လက်ရွေးစင်ဖူဆယ်အသင်းသည် AFC Futsal Cup 2024 ပြိုင်ပွဲတွင် ဂိုးကွာခြားချက်ကြောင့် အုပ်စုမှထွက်ခဲ့ရကြောင်း သိရသည်။

AFC Futsal Cup 2024 ပြိုင်ပွဲများကို ဧပြီ ၁၇ ရက်မှစတင်ကာ ဧပြီလ ၂၈ ရက်အထိ ထိုင်းနိုင်ငံက အိမ်ရှင်အဖြစ်လက်ခံကျင်းပခဲ့ခြင်းဖြစ်ကြောင်း သိရသည်။ မြန်မာ့လက်ရွေးစင်ဖူဆယ်အသင်းအနေဖြင့် အိမ်ရှင်ထိုင်းအသင်း၊ ဗီယက်နမ်အသင်းနှင့် တရုတ်အသင်းတို့နှင့် အုပ်စု(က)တွင် ယှဉ်ပြိုင်ကစားခဲ့ရကြောင်း သိရသည်။

ထိုသို့ယှဉ်ပြိုင်ကစားရာတွင် မြန်မာ့လက်ရွေးစင်ဖူဆယ်အသင်းအနေဖြင့် ဗီယက်နမ်အသင်းကို သရေကစားနိုင်ခဲ့သော်လည်း အိမ်ရှင်ထိုင်းအသင်းကို ၅ဂိုး၊ ဂိုးမရှိဆိုသောရလဒ်ဖြင့်ရှုံးနိမ့်ခဲ့ပြီး တရုတ်အသင်းကို ၃ဂိုး၊ ၁ဂိုးဖြင့်အနိုင်ရခဲ့သည်။

အဆိုပါပြိုင်ပွဲတွင် အုပ်စုပထမအဖြစ် ထိုင်းအသင်းက ရမှတ်(၉)မှတ်၊ ဗီယက်နမ်အသင်းက အုပ်စုဒုတိယအဖြစ် ရမှတ်(၄)မှတ်ရရှိကာ မြန်မာ့လက်ရွေးစင်ဖူဆယ်အသင်းအနေဖြင့် ရမှတ် ၁ မှတ်ဖြင့် အုပ်စုတတိယနေရာသို့ရရှိခြင်းကြောင့် အုပ်စုဖြင့်သာ ကျေနပ်ခဲ့ရသည်။

"မြန်မာအသင်းအနေနဲ့ ဒုတိယအဆင့်ကို မတက်ရောက်နိုင်ခဲ့တဲ့အတွက် စိတ်မကောင်းဖြစ်ရပါတယ်။ ပြီးတော့ ဒီနေ့ပွဲကို အကောင်းဆုံးကစားနိုင်ခဲ့လို့ ကစားသမားအဖွဲ့နဲ့ အုပ်ချုပ်နည်းပြ အဖွဲ့အားလုံးကို ကျေးဇူးတင်ပါတယ်။ ဒီနေ့ပွဲမှာ အခွင့်အရေးတွေ အများကြီး ရရှိခဲ့ပေမဲ့ အသုံးမချနိုင်ခဲ့ပါဘူး။ အခုဆိုရင် လူငယ်တွေ အနေနဲ့ ဖူဆယ်အားကစားနည်းကို ပိုမို စိတ်ဝင်စားလာကြမယ်လို့ မျှော်လင့်ပါတယ်"ဟု မြန်မာ့လက်ရွေးစင်ဖူဆယ်အသင်းနည်းပြချုပ် Mr. Bunlert Charoenwong က သုံးသပ်ပြောကြားခဲ့သည်။

သို့သော် မြန်မာ့လက်ရွေးစင်ဖူဆယ်အသင်းအနေဖြင့် AFC Futsal Cup 2024 ပြိုင်ပွဲတွင် ပြိုင်ပွဲဝင် ၁၆ အသင်းအနက် အဆင့် ၁၀ တွင်လည်း ကောင်း အုပ်စုထွက်ခွါအသင်း(၈)သင်းတွင် အဆင့်(၂)နေရာဖြင့်လည်း ကောင်း အကောင်းဆုံးစွမ်းဆောင်ရည်များပြသခဲ့သည်ကို တွေ့ရသည်။