နှစ်အတန်ကြာ ပျောက်ကွယ်နေခဲ့သော မြန်မာ့လက်ရွေးစင်ဘောလုံးအသင်း၏ ကောင်းမွန်သောစုဖွဲ့မှုကို ဆီးရီးယားနှင့်ပွဲစဉ်တွင် ပြန်လည်မြင်တွေ့ရ
![](http://nssmy.com/original_post_images/f-11465-22-03-202465fda61da8f74.jpg)
သန့်ဇင် (NSS) - မတ် ၂၂
နှစ်အတန်အကြာ မမြင်တွေ့ခဲ့ရသော မြန်မာ့လက်ရွေးစင်ဘောလုံးအသင်း၏ ကောင်းမွန်သောစုဖွဲ့မှုကို ၂၀၂၆ ကမ္ဘာ့ဖလားခြေစစ်ပွဲ ဒုတိယအဆင့်ပွဲစဉ်အဖြစ်သည့် ဆီးရီးယားနှင့် ပွဲစဉ်တွင် ပြန်လည်တွေ့ရကြောင်း အားကစား ကလောင်ရှင်တစ်ဦးက NP News သို့ သုံးသပ်ပြောကြားသည်။
မြန်မာ့လက်ရွေးစင်ဘောလုံးအသင်းနှင့် ဆီးရီးယားလက်ရွေးစင်ဘောလုံးအသင်းတို့သည် မတ်လ ၂၁ ရက်က ရန်ကုန်မြို့ရှိ သုဝဏ္ဏကွင်းတွင် ယှဉ်ပြိုင်ကစားခဲ့ရာ အဆိုပါပွဲစဉ်တွင် FIFAအဆင့် ၈၉ အဆင့်ရှိ ဆီးရီးယား အသင်းကို FIFAအဆင့် ၁၆၂ အဆင့်ရှိ မြန်မာအသင်းက သရေတစ်မှတ်ရစေရန် ခုခံကစားနိုင်ခဲ့ခြင်းဖြစ်ပြီး မြန်မာ အသင်း၏ ခြေစွမ်းတိုးတက်လာခြင်းကို ပရိသတ်များ သဘောတွေ့ခဲ့ကြသည်။
အဆိုပါပွဲစဉ်တွင် မြန်မာ့လက်ရွေးစင်ဘောလုံးအသင်းအနေဖြင့် ပထမပိုင်းတွင် အောင်သူ၊ မောင်မောင်လွင်၊ လွင်မိုးအောင်တို့၏ကောင်းမွန်သောခြေစွမ်းများကို တွေ့ရှိခဲ့ရပြီး အသင်း၏ကောင်းမွန်သော စုဖွဲ့မှုများမှတစ်ဆင့် စိုးမိုးကျော်က ဦးဆောင်ဂိုးသွင်းယူပေးခဲ့သည်။
“ဒီလိုစုဖွဲ့မှုက ၂၀၁၉ နောက်ပိုင်းမန္တလေးမှာ ကာဂျစ္စတန်ကို နိုင်ခဲ့တဲ့ပွဲနောက်ပိုင်းတည်းက မတွေ့ရတာ။ အခုမှ ပြန်တွေ့ရတာပေါ့။ အဲဒီတုန်းကလည်း ကာဂျစ္စတန်ကို အဝေးကွင်းမှာ ရှုံးထားတယ်ဆို အိမ်ကွင်းမှာ အောင်သူတို့ ကျော်ကိုကိုတို့ သွင်းဂိုးတွေနဲ့ ပြန်နိုင်တယ်။ ၂ ဂိုး-၁ ဂိုး ရလဒ်နဲ့ပြန်နိုင်တယ်။ အဲဒီကတည်းက (ဒီလိုကောင်းမွန်တဲ့ စုဖွဲ့မှုမျိုးကို) မတွေ့ရတာကနေ အခုမှတစ်ကျော့ပြန်တွေ့ရတာ ပေါ့နော်” ဟု အထက်ပါ အားကစား ကလောင်ရှင် က ဆိုသည်။
မြန်မာ့လက်ရွေးစင်ဘောလုံးအသင်းအနေဖြင့် ဂျပန်အသင်း၊ မြောက်ကိုယားအသင်းတို့နှင့် ကစားခဲ့သည့် ပွဲစဉ်များ တွင် ခံစစ်အသားပေးကစားရန် ကြိုးပမ်းခဲ့ရာ ပေးဂိုးများခွင့်ပြုပေးခဲ့ရပြီးနောက် ရလဒ်ကောင်းများ မရရှိခဲ့သော် လည်း ဆီးရီးယားနှင့်ပွဲစဉ်တွင် အကောင်းဆုံးတုံ့ပြန်ကစားသွားခဲ့သည်ကို မြင်တွေ့ခဲ့ရကြောင်း ၎င်းက ဆက်လက် ပြောသည်။
မြန်မာ့လက်ရွေးစင်အသင်းသည် လာမည့် မတ်လ ၂၇ ရက်တွင် ဆီးရီးယားအသင်းနှင့်ယှဉ်ပြိုင်ရန် ဆော်ဒီနိုင်ငံသို့ ကြားကွင်းအနေဖြင့် သွားရောက်ကစားရမည်ဖြစ်ပြီး ပြီးခဲ့သည့်ပွဲစဉ်က အသင်းစုဖွဲ့မှုအတိုင်း ကစားသမားများကို ပွဲထုတ် ကစားသွားဖွယ်ရှိကြောင်း သိရသည်။
“မြန်မာအတွက်တစ်ခုကောင်းတာက ဆီးရီးယားအိမ်ကွင်းမှာ သွားကစားခွင့်မရတာက ပိုကောင်းသွားတာ။ ကြားကွင်းဆိုပေမယ့်လည်း သူတို့ဘက်ကကွင်းဖြစ်တယ်ပေါ့နော်။ ပြီးတော့ ကန်ရမယ့်အချိန်က ဒီမှာဆို ည ၁ နာရီ ပေါ့။ အဲဒီအတွက် ကစားသမားတွေက အချိန်တစ်ခု ပြဿနာရှိနိုင်တယ်။ နောက်ပြီးတော့ ဆီးရီးယားကလည်း မြန်မာနဲ့ပွဲမှာ နိုင်မယ်ဆိုပြီးတော့တွေးထားတာ။ အဲဒီမှာ သူတို့ထင်ထားတဲ့ရလဒ်မဖြစ်တဲ့အတွက် အဝေးကွင်း သွားကန်ရရင် မြန်မာအသင်း ပိုခက်ခဲလိမ့်မယ်။ ဆီးရီးယားက နိုင်တော့ နိုင်လိမ့်မယ်။ ဒါပေမယ့် ဂိုးပြတ်ကြီး မဖြစ် လောက်ဖူးလို့တော့ ထင်တယ်။ အများဆုံး ၂ ဂိုး- ၁ ဂိုး လောက်တော့ဖြစ်လိမ့်မယ်” ဟု ၎င်းက ပွဲကြိုသုံးသပ် ပြောကြားသည်။
မြန်မာ့လက်ရွေးစင်အသင်းအနေဖြင့် ပထမပိုင်းတွင် ကစားပုံကောင်းမွန်၍ ဦးဆောင်ဂိုး ရရှိခဲ့ပြီး ဒုတိယပိုင်းတွင် ကစားသမားများ ပင်ပန်းကာ ကစားအားကျဆင်းသွားမှုကြောင့် ချေပဂိုးပြန်လည်ခွင့်ပြုပေးခဲ့ရကြောင်း ဆီးရီးယား နှင့်ပွဲအပြီး သတင်းစာရှင်းလင်းပွဲတွင် မြန်မာ့လက်ရွေးစင်အသင်းနည်းပြချုပ် Miachel Feichtenbeinerက ထုတ်ဖော်ပြောကြားခဲ့သည်။
Comments :
0 comments
![](http://nssmy.com/ads/f-3-23-08-2022630475dc2221a.jpg)
မကွေးတိုင်းဒေသကြီး၊ စလင်းမြို့နယ်၊ အုတ်ဖိုကန်ကျေးရွာ၊ မင်းဘူး- စလင်းကားလမ်းပေါ်တွင် သစ်ပင်လဲကျမှုဖြစ်ပွား
ဗြိတိန်မှာ အကြီးဆုံးလို့ ယူဆရတဲ့ ရွှေတုံးကြီး ရှာဖွေတွေ့ရှိ
RELATED POSTS
30 Jul 2024 | အားကစား,နိုင်ငံတကာ
07 Jul 2024 | အားကစား,နိုင်ငံတကာ
23 May 2024 | အားကစား,ပြည်တွင်း
20 May 2024 | အားကစား,နိုင်ငံတကာ