Pika (NSS) - ဇန်နဝါရီ ၂၃ 

ပင်လယ်နီအတွင်း ရေကြောင်းလုံခြုံရေးကို ထိန်းသိမ်းရန်အတွက် ဖွဲ့စည်းထားသော နိုင်ငံတကာညွန့်ပေါင်းအဖွဲ့တွင် ပါဝင်ရန်အတွက် တပ်ဖွဲ့ဝင်(၆)ဦး ပါဝင်သည့် အဖွဲ့တစ်ဖွဲ့ကို စေလွှတ်သွားမည်ဖြစ်ကြောင်း နယူးဇီလန် အစိုးရက ဇန်နဝါရီလ(၂၂)ရက်တွင် ထုတ်ပြန်ကြေညာခဲ့သည်။

အမေရိကန် နှင့် ဗြိတိန်တို့၏ တပ်ဖွဲ့များသည် ဇန်နဝါရီလ(၂၁)ရက် ညတွင် ယီမင်ရှိဟူသီလက်နက်ကိုင်အဖွဲ့များ အသုံးပြုသည့် နေရာ(၈)ခုရှိ ပစ်မှတ်အများအပြားကို တိုက်ခိုက်မှုများလုပ်ဆောင်ခဲ့ပြီးနောက် အဆိုပါကြေညာချက် ထွက်ပေါ်လာခြင်းဖြစ်သည်။ 

အဆိုပါတိုက်ခိုက်မှုသည် အမေရိကန်နှင့် ဗြိတိန်တပ်ဖွဲ့တို့က ယီမင်အခြေစိုက်ဟူသီလက်နက်ကိုင်အဖွဲ့၏ ဒုံးကျည် ပစ်လွှတ်သည့်နေရာများကို ဒုတိယအကြိမ်မြောက် ပစ်ခတ်တိုက်ခိုက်မှုဖြစ်ကြောင်းလည်း သိရသည်။ နယူးဇီလန် ၏ တပ်ဖွဲ့ဝင်(၆)ဦးအဖွဲ့သည် ပင်လယ်နီအတွင်းရှိ သင်္ဘောများကို ကာကွယ်ရန်လုပ်ဆောင်နေသော နိုင်ငံတကာ ညွန့်ပေါင်းအဖွဲ့တွင် ပါဝင်သွားမည်ဖြစ်ကြောင်း နယူးဇီလန်ဝန်ကြီးချုပ် ခရစ်စတိုဖာလူဇွန်က ပြောကြားခဲ့သည်။

ပင်လယ်နီအတွင်းရှိ ကုန်တင်သင်္ဘောများကို တိုက်ခိုက်နေသော ဟူသီလက်နက်ကိုင်အဖွဲ့၏ လုပ်ရပ်များကို သည်းခံမည်မဟုတ်ကြောင်း ခရစ်စတိုဖာလူဇွန်က ဇန်နဝါရီလ(၂၂)ရက်တွင် ပြောကြားခဲ့သည်။ 

အစ္စရေး-ဟားမက်စစ်ပွဲစတင်ဖြစ်ပွားပြီးနောက် ဂါဇာကမ်းမြောင်ဒေသရှိ ပါလက်စတိုင်းလူမျိုးများကို ထောက်ခံ သည့်အနေဖြင့် ပင်လယ်နီအတွင်းရှိ သင်္ဘောများကို တိုက်ခိုက်မှုများ လုပ်ဆောင်နေခြင်းဖြစ်ကြောင်း ဟူသီလက်နက်ကိုင်အဖွဲ့က ပြောခဲ့သည်။

ထို့အပြင် အစ္စရေးက ဂါဇာကမ်းမြောင်ဒေသအပေါ် ထိုးစစ်ဆင်မှုများကို မရပ်တန့်မချင်း ကုန်တင်သင်္ဘောများအား တိုက်ခိုက်မှုကို ပိုမိုတိုးမြှင့်လုပ်ဆောင်သွားမည်ဖြစ်ကြောင်း ဟူသီလက်နက်ကိုင်အဖွဲ့က ကတိပြုခဲ့သည်။