မြူနစ် (NSS) - ဇန်နဝါရီ ၂၃

လောက်ကိုင်မြို့ရှိ ဒေသကွပ်ကဲမှုစစ်ဌာနချုပ်(ဒကစ) ဖြစ်စဉ်နှင့်ပတ်သက်၍ ဗိုလ်မှူးချုပ်တချို့ကို အရေးယူလိုက်သည်ဆိုသော သတင်းများမှာ မှန်ကန်မှုမရှိကြောင်း နစကဘက်က ဖြေရှင်းထားသည်။

ဒကစ(လောက်ကိုင်)မှ ဗိုလ်မှူးချုပ်(၆)ဦး လက်နက်ချခဲ့မှုနှင့်ပတ်သက်၍ စစ်ခုံရုံးက အရေးယူလိုက်ပြီဆိုသော သတင်းများမှာ မဟုတ်မှန်ကြောင်း နစကသတင်းထုတ်ပြန်ရေးအဖွဲ့က ယနေ့(ဇန်နဝါရီလ ၂၃ ရက်)တွင် မီဒီယာများကို ပြောကြားသည်။

ကိုးကန့်ကိုယ်ပိုင်အုပ်ချုပ်ခွင့်ရဒေသဦးစီးအဖွဲ့ ခေတ္တဥက္ကဋ္ဌအဖြစ် တာဝန်ယူခဲ့သော ဗိုလ်မှူးချုပ်ထွန်းထွန်းမြင့်၊ ဗိုလ်မှူးချုပ် ဇော်ဝင်းမြင့်အပါအဝင် (၆)ဦးကို စစ်ခုံရုံးက သေဒဏ်အပါအဝင် ပြစ်ဒဏ်အသီးသီးချမှတ်လိုက်သည်ဟု သတင်းများပျံ့နှံ့နေခြင်းဖြစ်သည်။

ပြီးခဲ့သော ဇန်နဝါရီလ ၅ ရက်တွင် လောက်ကိုင်မြို့ ဒကစရှိ ထောင်နှင့်ချီရှိသော လုံခြုံရေးအဖွဲ့ဝင်များသည် MNDAA ပူးပေါင်းအဖွဲ့ထံ လက်နက်ချခဲ့ကြောင်း သိရသည်။

ထိုသို့ လက်နက်ချခဲ့ပြီးနောက် ဗိုလ်မှူးချုပ်ထွန်းထွန်းမြင့်အပါအဝင် လုံခြုံရေးအဖွဲ့ဝင်များသည် လားရှိုးမြို့သို့ ပြန်လည်ရောက်ရှိလာခဲ့ပြီး စစ်ဆေးမှုများကို ခံယူနေ လျက်ရှိကြောင်း သိရသည်။

ဒကစ(လောက်ကိုင်)ဖြစ်စဉ်နှင့်ပတ်သက်၍ တပ်မှူးများအနေဖြင့် တပ်မတော်မိသားစုဝင်များ၏ လုံခြုံရေး၊ မြန်မာ-တရုတ် နှစ်နိုင်ငံချစ်ကြည်မှု မပျက်ပြားရေးတို့အတွက် အဘက်ဘက်မှအကောင်းဆုံးစဉ်းစားခဲ့သည်ဟု နစကပြောခွင့်ရ ဗိုလ်ချုပ်ဇော်မင်းထွန်းက ပြောကြားခဲ့ဖူးသည်။