Pika (NSS) - ဇန်နဝါရီ ၂ဝ

တရုတ်နိုင်ငံအလယ်ပိုင်း ဟီနန်ပြည်နယ်ရှိ ကျောင်းတစ်ခု၏ အဆောင်တွင် မီးလောင်မှုဖြစ်ပွားခဲ့ရာ အနည်းဆုံးလူ(၁၃)ဦးသေဆုံးခဲ့ကြောင်း တာဝန်ရှိသူများကပြောကြားခဲ့သည်။

ဟီနန်ပြည်နယ် Yanshanpu ရွာရှိ Yingcai ကျောင်းတွင် မီးလောင်မှုဖြစ်ပွားနေသည်ဆိုသည့် သတင်းကို ဇန်နဝါရီလ(၁၉)ရက်၊ ည (၁၁)နာရီအချိန်တွင် ဒေသတွင်းမီးသတ်ဌာနကို အကြောင်းကြားလာခဲ့ခြင်းဖြစ် ကြောင်း ဆင်ဟွာသတင်းအေဂျင်စီကဖော်ပြခဲ့သည်။မီးလောင်မှုအတွင်း အနည်းဆုံးလူ(၁၃)ဦးသေဆုံးခဲ့ပြီး အခြားလူတစ်ဦးထိခိုက်ဒဏ်ရာရရှိခဲ့ကြောင်း ဆင်ဟွာကဖော်ပြခဲ့သည်။

ဆင်ဟွာက"ကယ်ဆယ်ရေးသမားတွေဟာ အခင်းဖြစ်ပွားရာနေရာကိုချက်ချင်းရောက်ရှိလာခဲ့ပြီး (၁၁)နာရီ (၃၈)မိနစ်မှာ မီးလောင်ကျွမ်းမှုကို ငြှိမ်းသတ်နိုင်ခဲ့ပါတယ်။ ထိခိုက်ဒဏ်ရာရရှိခဲ့တဲ့ အသက်ရှင်ကျန်ရစ်သူက ဆေးရုံမှာ ဆေးကုသမှုတွေ ဆက်လက်ခံယူနေပြီး အသက်အန္တရာယ်လည်း မစိုးရိမ်ရပါဘူး"ဟု ဖော်ပြခဲ့သည်။

ဒေသတွင်းအာဏာပိုင်များသည် မီးလောင်ကျွမ်းမှုဘာကြောင့်ဖြစ်ပွားရသည်ဆိုသည့်အချက်ကို ဆက်လက်စုံစမ်းစစ်ဆေးနေပြီး ကျောင်းနှင့်ဆက်နွယ်သူ အနည်း ဆုံးတစ်ဦးကို ဖမ်းဆီးထိန်းသိမ်းထားကြောင်းသိရသည်။Yanshanpu ရွာသည် လူ(၁၀)သန်းခန့်နေထိုင်သော Nanyang မြို့ အစွန်အဖျားတွင်တည်ရှိကြောင်းလည်းသိရသည်။ သေဆုံးသူများထဲတွင် ကလေးအရေအတွက် မည်မျှပါသည်ဆိုသည့်အချက်ကို ဆင်ဟွာကဖော်ပြခဲ့ခြင်းမျိုးမရှိခဲ့ကြောင်းလည်းသိရသည်။ တရုတ်နိုင်ငံရှိ ဆိုရှယ်မီဒီယာအသုံးပြုသူများသည် မီးလောင်ကျွမ်းမှုနှင့်ပတ်သက်ပြီး စိတ်ဆိုးဒေါသဖြစ်ခဲ့ကြပြီး လုံခြုံရေးချိုးဖောက်မှုမှန်သမျှကို အရေးယူပေးရန် တောင်းဆိုခဲ့ကြကြောင်းသိရသည်။ 

Weibo လူမှုကွန်ရက်စာမျက်နှာတွင် မှတ်ချက်ပေးသူတစ်ဦးက "မိသားစု(၁၃)ခုက ကလေးငယ်(၁၃)ဦးသေဆုံးသွားခဲ့တာ တကယ်ကိုဝမ်းနည်းဖို့ကောင်းပါတယ်။ ဒီမီးလောင်မှုနဲ့ပတ်သက်တဲ့ လူတွေကို ပြင်းထန်တဲ့ပြစ်ဒဏ်တွေ မပေးဘူးဆိုရင် ကလေးတွေရဲ့ စိတ်ဝိညာဉ်တွေက ငြိမ်းချမ်းစွာအနားယူနိုင်မှာမဟုတ်ပါဘူး"ဟု ရေးသားခဲ့သည်။

တရုတ်နိုင်ငံတွင် လုံခြုံရေးစံနှုန်းလျော့ကျမှုနှင့် စည်း ကမ်းလိုက်နာမှုမရှိခြင်းတို့ကြောင့် မီးလောင်မှုနှင့်အခြား လူအသေအပျောက်များသော မတော်တဆမှုများ မကြာ ခဏဖြစ်ပွားလေ့ရှိကြောင်းသိရသည်။