ဂျန်ဇက် (NSS) - ဇန်နဝါရီ ၂ဝ

အစ္စရေးနဲ့ ဟားမက်စ်လက်နက်ကိုင်အဖွဲ့ကြားဖြစ်ပွားနေတဲ့ ဂါဇာစစ်ပွဲကို ရပ်တန့်အောင် ပျက်ကွက်မှုတွေရှိနေတဲ့အတွက် အနောက်အုပ်စုနိုင်ငံတွေအပေါ် ယုံကြည်မှုမရှိတော့ကြောင်း တူရကီသမ္မတ အာဒိုဂမ်ကပြောပါတယ်။ 

ကမ္ဘာကုလသမဂ္ဂအဖွဲ့အစည်းအပါအဝင် နိုင်ငံတကာအဖွဲ့စည်းတွေဟာ အစ္စရေး နဲ့ ပါလက်စတိုင်းကြားဖြစ်နေတဲ့ စစ်ပွဲကိုရပ်တန့်အောင်လုပ်ဆောင်နိုင်ခြင်းမရှိတာက ဥပမာတစ်ရပ်ဖြစ်စေခဲ့ကြောင်း တူရကီသမ္မတကပြောပါတယ်။

တူရကီသမ္မတက "အနောက်အုပ်စုနိုင်ငံတွေအပေါ် ယုံကြည်မှုမရှိတော့ဘူး။ အနောက်အုပ်စုနိုင်ငံတွေဟာ ဂါဇာစစ်ပွဲရပ်တန့်အောင်မလုပ်နိုင်ခဲ့ဘူး။ အနောက် အုပ်စုနိုင်ငံတွေမှာ အကြမ်းဖက်မှုတွေကို တားဆီးနိုင်အောင် တိကျတဲ့ မူဝါဒတွေ မရှိဘူး။ အီရတ်၊ ဘောစနီးယား၊ ဆီးရီးယား နဲ့ ဆိုမာလီယာနိုင်ငံအရေးကိစ္စတွေတုန်းကလည်း ကမ္ဘာ့လုံခြုံရေးအဖွဲ့အစည်းတွေဟာ ပျက်ကွက်မှုတွေဖြစ်ခဲ့တယ်"လို့ ပြောပါတယ်။

ကုလသမဂ္ဂလုံခြုံရေးကောင်စီအပါအဝင် နိုင်ငံတကာအဖွဲ့အစည်းတွေဟာ ဂါဇာစစ်ပွဲကို အပစ်ခတ်ရပ်စဲဖို့ တောင်းဆိုခဲ့ပေမယ့် အမေရိကန်အစိုးရက ဗီတိုအာဏာသုံးငြင်းဆန်ပယ်ချခဲ့ကြောင်းသိရပါတယ်။ အစ္စရေးနဲ့ ဟားမက်စ်လက်နက်ကိုင်အဖွဲ့ကြားဖြစ်ပွားနေတဲ့စစ်ပွဲက ရက်ပေါင်း ၁၀၀ ကျော်လာပြီး အစ္စရေးရဲ့တိုက်ခိုက်မှုတွေကြောင့် ပါလက်စတိုင်းလူမျိုး (၂)သောင်းကျော်သေဆုံးထားပါတယ်။ အစ္စရေးကတော့ သေဆုံးခဲ့တဲ့ပါလက်စတိုင်းလူမျိုးတွေထဲမှာ ဟားမက်စ်လက်နက်ကိုင်အုပ်စုဝင်တွေပါဝင်နေကြောင်းပြောပါတယ်။