စော(NSS) - ဇန်နဝါရီ ၁၉

ခရီးသည်အယောင်ဆောင်၍ ယာဉ်ပိုင်ရှင်အား သတ်ဖြတ်ကာ အလောင်းစွန့်ပစ်ပြီးနောက် ကားလုယက်သွားမှု မန္တလေးတိုင်း၌ ဖြစ်ပွားခဲ့ကြောင်း သိရသည်။

ယာဉ်ပိုင်ရှင်ဖြစ်သူ ကိုဆန်းမျိုးမြင့်သည် ယမန်နေ့(ဇန်နဝါ ရီလ ၁၈ ရက်)၊ မွန်းလွဲ (၁)နာရီဝန်းကျင်အချိန်တွင် ခရီးသည် အယောင်ဆောင်ထားသူတစ်ဦးက ဖုန်းဆက်၍ ကားငှားခဲ့သည့်အတွက် မန္တလေး-ပြင်ဦးလွင်သွားလမ်းပေါ်ရှိ (၇)မိုင်ကမ်းခြေ၊ ဒီးဒုတ်ရေပြာအိုင်ဘက်သို့ လိုက်ပါသွားခဲ့ကြောင်း ၎င်း၏မိတ်ဆွေက NSS ကိုပြောသည်။

ထိုသို့ လိုက်ပါသွားခဲ့ပြီးနောက် နေအိမ်သို့ ပြန်ရောက်မလာသည့်အတွက် CCTV မှတ်တမ်းများဖြင့် မိသားစုဝင်နှင့် သက်ဆိုင်ရာလုံခြုံရေးတပ်ဖွဲ့ဝင်များက ရှာဖွေစစ် ဆေးခဲ့ကြောင်း သိရသည်။

ယင်းကဲ့သို့စစ်ဆေးစဉ် ယာဉ်ပိုင်ရှင် ကိုဆန်းမျိုးမြင့်သည် မွန်းလွဲ ၁ နာရီဝန်းကျင်တွင် အုန်းချောတိုးဂိတ်ကို ဖြတ်သန်း၍ မောင်းနှင်သွားခဲ့သော်လည်း ညနေ (၅)နာရီဝန်းကျင်အချိန်တွင် ၎င်းတိုးဂိတ်အား အခြားယာဉ်မောင်းတစ်ဦးက မောင်းနှင်၍ ပြန်လည်ဖြတ်သန်းခဲ့သည်ကို စစ်ဆေးတွေ့ရှိရသည်ဟု ၎င်း၏ မိတ်ဆွေက ပြောသည်။

“သူက ကားငှားလို့ ဒီးဒုတ်ရေပြာအိုင်ဘက်သွားတာ။ လိုင်းပေါ်ကနေဖုန်းဆက်ပြီးတော့ ကားငှားလို့သွားတာ။ လူကတော့ ဆုံးသွားပြီ။ ဒီးဒုတ်ရေပြာအိုင်သွားတဲ့ ဒုက္ခဝတီ မြစ်ဘက်က ချောက်ထဲမှာ အလောင်းကို ပစ်ထားခဲ့တာ။ ကားကလည်း လောလောဆယ်မတွေ့သေးဘူး”ဟု ကိုဆန်းမျိုးမြင့်၏ မိတ်ဆွေက ပြောသည်။

ယာဉ်ပိုင်ရှင်ဖြစ်သူ ကိုဆန်းမျိုးမြင့်သည် လည်ပင်းနှင့် ဝမ်းဗိုက်တို့တွင် ပြတ်ရှဒဏ်ရာနှင့် ထိုးသွင်းဒဏ်ရာများရရှိကာ သေဆုံးနေသည်ကို ရေပြာအိုင်အနီးရှိ ချောက်တစ်ခုအတွင်း၌ ပြန်လည်တွေ့ရှိခဲ့ခြင်းဖြစ်ကြောင်း သိရသည်။

“ဒါကြီးက ရက်ရက်စက်စက် လုပ်သွားတာ။ ကားလည်းယူသွားတယ်။ လူလည်းအန္တရာယ်ပြုသွားတယ်။ တော်တော်ဆိုးပါတယ်။ ကျွန်တော်တို့ကတော့ ဒီလိုလူမျိုးကို မြန်မြန်ဖမ်းစေချင်တာပေါ့။ သက်ဆိုင်ရာတာဝန်ရှိသူတွေ မြန်မြန်ဖမ်းစေချင်တယ်”ဟု ၎င်းက ထပ်မံပြောသည်။

လက်ရှိတွင် ကိုဆန်းမျိုးမြင့်၏ ရုပ်အလောင်းအား မန္တလေးပြည်သူ့ဆေးရုံ ရင်ခွဲရုံသို့ ပို့ဆောင်ပေးထားကြောင်း သိရသည်။