NSS - ဇန်နဝါရီ ၁၉ 

မန္တလေးမြို့၊ မန်းမြို့ဈေးအတွင်းရှိ "ဆယ်သန်း"ရွှေဆိုင်တွင် ဓားပြတိုက်မှုဖြစ်ပွားရာ ရွှေနှစ်ပိဿာ နှင့် ငွေကျပ်သိန်း (၂ဝဝ)ဝန်းကျင်ကို လုယက်ထွက်ပြေးသွားကြောင်းသိရသည်။

ယနေ့(ဇန်နဝါရီလ ၁၉ ရက်)၊ နံနက် ၈ နာရီဝန်းကျင်ခန့်က မန်းမြို့စျေးတောင်ဘက်ပေါက် ၃၉  လမ်း၊ ၈၄ x ၈၅ လမ်းကြားတွင် ဖွင့်လှစ်ထားသော "ဆယ်သန်း"ရွှေဆိုင်သို့ မျက်နှာဖုံးစွပ်လူတချို့က ဆိုင်ကယ်ဖြင့်ရောက်ရှိလာ ပြီး ဝင်ရောက်ဓားပြတိုက်သွားခြင်းဖြစ်ကြောင်း သိရသည်။

“လက်စွပ်ပြင်ဖို့ ဆိုင်ကိုလာတယ်ဆိုပြီး သေနတ်နဲ့ဝန်ထမ်းတွေဆီက ဓားပြတိုက်သွားတာ ။ရွှေနှစ်ပိဿာလောက်ရှိတဲ့ လက်ဝတ်လက်စားတွေပါသွားတယ်လို့ ပါတ်ဝန်းကျင်ကပြောတယ်။ ဓားပြတိုက်နေတဲ့အချိန်မှာ ဘယ်သူမှမရိပ်မိဘူး ပြန်ထွက်သွားမှ သိကြတာ”ဟု မန်မြို့ဈေးအတွင်းမှ ဒေသခံတစ်ဦးက ၎င်း၏လူမှုကွန်ယက်တွင် ရေးသားထားသည်။

"ဆယ်သန်း"ရွှေဆိုင်သို့ နံနက် ၈ နာရီ အချိန်ခန့်တွင် အသက် ၃၀ နှစ်ခန့် အမျိုးသား ၃ ဦး ဆိုင်ကယ်ဖြင့် ရောက်ရှိလာပြီး ဇန်နဝါရီလ (၇)ရက်က ပြုလုပ်ထားသည့် လက်စွပ်အား ပြင်ဆင်လိုကြောင်း လိမ်ညာပြော ဆိုကာ ဆိုင်အတွင်းရှိ ဝန်ထမ်းများအား ပစ္စတို သေနတ် (၁)လက်ဖြင့်ချိန်၍ ဆိုင်အတွင်းမှ ရွှေလက်ကောက်မျိုးစုံ ၅၀၂ ကွင်း၊ ရွှေဆွဲပြား ၃၆၅ ပြား စုစုပေါင်းအလေးချိန် (၂)ပိဿာခန့် (ကာလတန်ဖိုး သိန်း ၆၀၀၀ ကျပ်ခန့်) နှင့် ငွေသားကျပ်သိန်း ၂၀၀ တို့အား  လုယက်ယူဆောင်သွားကြောင်း ရဲတပ်ဖွဲ့၏ ကနဦးထုတ်ပြန်ချက်အရ သိရသည်။

ရွှေဆိုင်သို့ လာရောက်လုယက်သွားသည့် တရားခံများအား အမြန်ဖမ်းဆီးရရှိနိုင်ရေး လုံခြုံရေးတပ်ဖွဲ့ဝင်များနှင့် ရဲတပ်ဖွဲ့ဝင်များမှ CCTV မှတ်တမ်းအားကြည့်ရှုပြီး ၎င်းတို့စီးနင်လာသည့် ဆိုင်ကယ်၊ လူပုံသဏ္ဍာန်များအား တိုက်ဆိုင်စစ်ဆေးကာ ရှာဖွေလျက်ရှိကြောင်း သိရသည်။

"ဆယ်သန်း"ရွှေဆိုင်သည် ဆိုင်ခွဲများကို မန်းမြို့ဈေးအတွင်း နှင့် မနော်ဟရီလမ်းတို့တွင် ဖွင့်လှစ်ထားကြောင်းသိရသည်။