ရောင်နီ (NSS) - ဇန်နဝါရီ ၁၉

စင်ကာပူနိုင်ငံမှာ မွေးဖွားခဲ့တဲ့ ပန်ဒါဝက်ဝံလဲ့လဲ့ဟာ ဇန်နဝါရီ (၁၆)ရက် ညပိုင်းက စင်ကာပူ လေကြောင်းလိုင်း Singapore Airlines (SIA) နဲ့အတူ မိခင် တရုတ်နိုင်ငံ ချန်ဒူးမြို့ဆီ ရောက်ရှိလာခဲ့ပါတယ်။   

ပန်ဒါဝက်ဝံလဲ့လဲ့ဟာ စင်ကာပူကို တရုတ်က လက်ဆောင်အဖြစ် ပေးပို့ခဲ့တဲ့ ပန်ဒါဝက်ဝံကြီး ကျာကျာမှ မွေးဖွားခဲ့တဲ့ ပန်ဒါမျိုးဆက်ဖြစ်ပါတယ်။ 

၎င်းဟာ ၁၆ ရက် ည ၇ နာရီ ၁၇ မိနစ်မှာ SIA Boeing 747-400F ကုန်တင်လေယာဉ်နဲ့ စင်္ကာပူမှ ထွက်ခွာခဲ့ပြီး၊ ချန်ဒူးရှန်လျူ အပြည်ပြည်ဆိုင်ရာလေဆိပ်ကို ည ၁၁ နာရီ ၁၄ မိနစ်က ဆင်းသက်ခဲ့တယ်လို့ သိရပါတယ်။ 

ပြီးခဲ့တဲ့ ဩဂုတ်လက သုံးနှစ်ပြည့်ခဲ့ပြီဖြစ်တဲ့ စင်ကာပူနိုင်ငံမှာ မွေးဖွားတဲ့ ပန်ဒါဝက်ဝံ လဲ့လဲ့ဟာ တရုတ်နိုင်ငံကို ရောက်ရှိပြီးနောက် အစီအမံတစ်ခုဖြစ်တဲ့ ကွာရန်တင်းဝင်ဖို့ လုပ်နေတယ်လို့ Mandai Wildlife Group နဲ့ SIA က ဇန်နဝါရီ ၁၇ ရက် ပူးတွဲသတင်းထုတ်ပြန်ချက်မှာ ဖော်ပြထားပါတယ်။ 

လဲ့လဲ့ရဲ့ ကွာရန်တင်းဟာ ရက်ပေါင်း ၃၀ ကြာမြင့်မယ်လို့ ခန့်မှန်းရပြီး ကွာရန်တင်းဝင်ချိန်မှာ ၎င်းကို တရုတ် ထိန်းသိမ်းရေးနဲ့ သုတေသနစင်တာမှ Giant Panda (CCRCGP) မှ အနီးကပ်စောင့်ကြည့်မယ်လို့ သိရပါတယ်။ 

လဲ့လဲ့ကို ခန့်မှန်းခြေ အရှည် ၁.၇  မီတာ၊ အနံ ၁.၁ မီတာ ၊ အမြင့် ၁.၃ မီတာ ရှိတဲ့ သေတ္တာနဲ့  Bukit Timah၊ Seletar ၊ Tampines Expressways မှတဆင့် ချန်ဂီ လေဆိပ်ကို ပို့ဆောင်ခဲ့တာ ဖြစ်ပါတယ်။