Pika (NSS) - ဇန်နဝါရီ ၁၁

 ရုရှား-ယူကရိန်းပဋိပက္ခစတင်ဖြစ်ပွားသည့်နောက်ပိုင်း ပထမဆုံးအကြိမ်အဖြစ် အမျိုးသမီးများအတွက် စစ်ယူနီဖောင်းအစုံရေ(၅)သောင်းကို ဝယ်ယူခဲ့ကြောင်း ယူကရိန်းကာကွယ်ရေးဝန်ကြီးဌာနက ပြောကြားခဲ့သည်။

ယူကရိန်းလွှတ်တော်တွင် စစ်သားစုဆောင်းရေးဥပဒေပြင်ဆင်ချက်ဆိုင်ရာ မဲခွဲဆုံးဖြတ်မှုများ မလုပ်ဆောင်မီ တစ်ရက်အလိုတွင် ယူကရိန်းကာကွယ်ရေးဝန်ကြီး Rustem Umerov ၏ ကြေညာချက်ထွက်ပေါ်လာခြင်းဖြစ်သည်။

လွှတ်တော်တွင် အဆိုပြုတင်သွင်းထားသော စစ်သားစုဆောင်းရေးဆိုင်ရာဥပဒေပြင်ဆင်ချက်များသည် ပြည်သူများကို စိတ်ဆိုးဒေါသဖြစ်စေခဲ့ကြောင်းလည်း သိရသည်။ ပြည်သူအချို့က ယင်းအဆိုပြုချက်မှာ ဖွဲ့စည်းပုံအခြေခံဥပဒေနှင့်မကိုက်ညီဘဲ စစ်မှုထမ်းဥပဒေကို ရှောင်ဖယ်သူများအား နှိမ်နှင်းရန် ရည်ရွယ်လုပ်ဆောင်နေခြင်းဖြစ်ကြောင်း ပြောဆိုခဲ့ကြသည်။

ကာကွယ်ရေးဝန်ကြီး Rustem Umerov က "ကာကွယ်ရေးဝန်ကြီးဌာနဟာ အမျိုးသမီးစစ်ယူနီဖောင်းအစုံရေ (၅)သောင်း၊ လျှပ်စစ်အပူပေးစက်(၁)သိန်း နဲ့ စစ်မြေပြင်မှာအသုံးပြုတဲ့ နားကြပ်(၁၅ဝဝဝ) ကို ပထမဆုံးအကြိမ် ဝယ်ယူခဲ့ပါတယ်" ဟု ပြောထားသည်။

ယူကရိန်းအစိုးရအနေဖြင့် လိုအပ်ပါက အမျိုးသမီးများကို စစ်မှုထမ်းစေခိုင်းရန် စဉ်းစားသင့်ကြောင်း ယူကရိန်း လွှတ်တော်အမတ် Inna Sovsun က ပြီးခဲ့သည့်လတွင် ပြောဆိုခဲ့ဖူးသည်။ အဆိုပါအစီအစဉ်ကို အကောင်အထည် ဖော်ရန်အတွက် လိုအပ်သည့်ကြိုတင်ပြင်ဆင်မှုအဖြစ် အမျိုးသမီးများအတွက် ယူနီဖောင်းများထားရှိရန် ၎င်းက အကြုံပြုခဲ့ကြောင်းလည်း သိရသည်။

ထို့အပြင် ဆေးဘက်ဆိုင်ရာဘွဲ့ရရှိထားသော အမျိုးသမီးများကို စစ်မှုထမ်းစေခိုင်းရန်အတွက် စာရင်းပေးသွင်းရန် လိုအပ်ချက်များ ပြီးခဲ့သည့်နှစ် အောက်တိုဘာလတွင် စတင် အသက်ဝင်ခဲ့ကြောင်းလည်း သိရသည်။

ယူကရိန်းစစ်တပ်တွင် အမျိုးသမီး(၆)သောင်းကျော် စစ်မှုထမ်းဆောင်နေပြီး လက်နက်ကိုင်တပ်ဖွဲ့များ၏ (၇)ရာခိုင်နှုန်းခန့်ရှိကြောင်း ကာကွယ်ရေးဝန်ကြီးဌာနက ပြောကြားခဲ့သည်။ ယူကရိန်းအစိုးရသည် ရှေ့တန်းစစ်မြေမျက်နှာပြင်သို့ စေလွှတ်ရန်အတွက် အမျိုးသားများကို လုံလုံလောက်လောက် စုဆောင်းနိုင်ရန် ရုန်းကန်နေရကြောင်းလည်း သိရသည်။

ယူကရိန်းစစ်တပ်တွင် တပ်သားသစ်(၄)သိန်းခွဲ မှ (၅)သိန်းကြား လိုအပ်ကြောင်း သမ္မတဇီလန်စကီးက ပြီးခဲ့သည့်လတွင် ထုတ်ဖော်ပြောခဲ့ဖူးသည်။ ယူကရိန်းအစိုးရသည် ပြီးခဲ့သည့်နှစ် ဇွန်လအစောပိုင်းတွင် စတင်လုပ်ဆောင်ခဲ့သော တန်ပြန်ထိုးစစ်ဆင်မှုများအတွင်း သိသာသောရလဒ်များ ရယူနိုင်ခြင်းမျိုး မရှိခဲ့ပြီးနောက် အဆိုပါပြောဆိုချက်များ ထွက်ပေါ်လာခြင်းဖြစ်သည်။