သုတကျော် (NSS) - ဇန်နဝါရီ ၁၀ 

ပုဂံရှေးဟောင်းယဉ်ကျေးမှုနယ်မြေတွင် ဟိုတယ်များ တည်ဆောက်ခြင်းနှင့်ပတ်သက်၍ ပုဂံဒေသဆိုင်ရာ ဟိုတယ်မဟာဗျူဟာရေးဆွဲရေးလုပ်ငန်းကို ပြန်လည် စတင်ရန် ဆောင်ရွက်နေကြောင်း သာသနာရေး နှင့် ယဉ်ကျေးမှုဝန်ကြီးဌာန၊ ပုဂံဌာနခွဲမှ ညွှန်ကြားရေးမှူး ဦးကျော်မျိုးဝင်းက NSS သတင်းဌာနကို ပြောသည်။ 

ပုဂံဒေသဆိုင်ရာ ဟိုတယ်မဟာဗျူဟာ (မူကြမ်း)တွင် ပါရှိသည့်တင်ပြချက်များနှင့်ပတ်သက်သည့် အစည်း အဝေးကို ဇန်နဝါရီလ ၈ ရက် နှင့် ၉ ရက်တို့တွင် ပုဂံရှေးဟောင်းသုတေသနပြတိုက်၌ ကျင်းပပြုလုပ်ခဲ့ခြင်း ဖြစ်သည်။ 

“ပထမ အကြိမ်ပဲ ရှိသေးတယ်။ ဘာမှ ရလဒ်မရသေးဘူး။ ဟိုတယ်လုပ်ငန်းရှင်တွေ နဲ့ ဌာနဆိုင်ရာတွေ အကြို ဆွေးနွေးတာပဲရှိသေးတယ်။ ဒုတိယအကြိမ် ဘယ်တော့ လုပ်မယ်ဆိုတာ မသတ်မှတ်ရသေးဘူး။ အဓိကတော့ ဒီဟာအတွက် ကော်မတီတစ်ခုဖွဲ့ထားတယ်။ ဟိုတယ်ခရီးက ဒုညွှန်ချုပ်ရယ်၊ ရှေးဟောင်းဘက်က ဒုညွှန်ချုပ်ရယ်ပါတာ ဖွဲ့ထားတာ။ အဲဒီ ကော်မတီကနေ မဟာဗျူဟာကို ရေးမှာ။ ဒါက ပထမအကြိမ်လုပ်တဲ့ အစည်းအဝေးပါ” ဟု ဦးကျော်မျိုးဝင်းက ပြောသည်။ 

ပုဂံဒေသအား ကမ္ဘာ့အမွေအနှစ်တင်သွင်းစဉ်က ဟိုတယ်နှင့်ပတ်သက်သည့် ပုဂံဒေသဆိုင်ရာဟိုတယ် မဟာဗျူဟာ ရေးဆွဲရေးစီမံကိန်း(Bagan Hotel Strategy)ရေးဆွဲဆောင်ရွက်ရန် ဟိုတယ်လုပ်ငန်းပိုင်းဆိုင်ရာ ကျွမ်းကျင်ပညာရှင် သြစတြေးလျ နိုင်ငံသား   Dr. Richard Mackay ကို ၂၀၂၀ ခုနှစ်မှစတင်၍ ငှားရမ်း ရေးဆွဲစေခဲ့ပြီး ၂၀၂၀ ခုနှစ်၊ ဇွန်လတွင် “Bagan Hotel Scoping Study” မူကြမ်းကို ကမ္ဘာ့အမွေအနှစ် ကော်မ တီသို့ ပေးပို့ရသည့် နှစ်စဉ်အစီရင်ခံစာတွင် ထည့်သွင်းဖော်ပြခဲ့ကာ Bagan Hotel Strategy ကို ပြီးပြည့်စုံစွာဖြင့် အပြီးသတ်ရေးဆွဲသွားမည်ဟုလည်း ကမ္ဘာ့အမွေ အနှစ်ကော်မတီသို့ ကတိကဝတ်ပြုထားကြောင်း သိရသည်။ 

ရေးဆွဲနေသည့် Bagan Hotel Strategy  မပြီးမီ ဟိုတယ်တည်ဆောက်ခြင်း၊ ပြင်ဆင်ခြင်းများကို မဆောင်ရွက်ရန် ပညာရှင် Dr. Richard Mackay က မေတ္တာရပ်ခံထားရာ  သာသနာရေးနှင့်ယဉ်ကျေးမှုဝန်ကြီးဌာန ဦးဆောင်ပြီး မန္တလေးတိုင်းဒေသကြီးအစိုးရအဖွဲ့နှင့် ရင်းနှီးမြှုပ်နှံမှုဝန်ကြီးဌာနတို့ တွေ့ဆုံပူးပေါင်း၍ ရပ်နားထားခဲ့ကြောင်း သိရသည်။

သို့သော်လည်း ပုဂံဒေသတွင် ဟိုတယ်များ ဆောက်လုပ်လာမှု အခြေအနေကို တွေ့ရှိရသည့်အတွက် Bagan Hotel Strategy  ပြီးစီးအောင် ရေးဆွဲရန်လိုအပ်လာပြီဖြစ်ကြောင်းလည်း သာသနာရေး နှင့် ယဉ်ကျေးမှု ဝန်ကြီးဌာနမှ သိရသည်။ 

Bagan Hotel Strategy သည် ပုဂံကမ္ဘာ့ အမွေအနှစ်ဒေသ၏ အနာဂတ်ဖွံ့ဖြိုး တိုးတက်ရေးအတွက် လုပ် ဆောင်ခြင်းဖြစ်ကာ ကောင်းမွန်သော စီမံခန့်ခွဲမှုအတွက် အသေးစိတ်ရေးဆွဲမည်ဖြစ်ပြီး Bagan Hotel Strategy မူကြမ်းကို ပုဂံဒေသအမျိုးသားအဆင့်ပူးပေါင်းဆောင် ရွက်ရေးကော်မတီ Bagan National Coordinating Committee – BAGANCOM) နှင့် နိုင်ငံတော်အဆင့်အထိတင်ပြပြီးနောက် ကမ္ဘာ့အမွေအနှစ် ကော်မတီသို့ ဆက်လက်တင်ပြရမည်ဖြစ်ကြောင်းလည်း သိရသည်။