ကျော် (NSS) - ဇန်နဝါရီ ၁၀

မန္တလေးတိုင်း၊ သပိတ်ကျင်းမြို့နယ်၊ တကောင်းနယ်မြေရှိ ထွေအုပ်ရုံးနှင့်ရဲစခန်းအနီးတို့တွင် ပြီးခဲ့သည့် ဇန်နဝါရီလ ၈ ရက်ညပိုင်းက နာရီဝက်သာခြား၍ Drop Bomb (၆)လုံး ပေါက်ကွဲခဲ့ကြောင်း လုံခြုံရေးအဖွဲ့နှင့်နီးစပ်သူများထံမှ သိရသည်။

အဆိုပါနေ့ ည ၉ နာရီခွဲကျော်ခန့်က လက်နက်ကိုင်အဖွဲ့ဝင်များသည် Drone ယာဥ်အသုံးပြုကာ သပိတ်ကျင်းမြို့နယ်၊တကောင်းနယ်မြေရှိ ထွေအုပ်ရုံးအား Drop Bomb (၄)လုံးဖြင့်ပစ်ချတိုက်ခိုက်ခဲ့ကြကြောင်း သိရသည်။

"ထွေအုပ်ရုံးမှာ Drop Bomb ပေါက်ကွဲမှုတွေရှိခဲ့တယ်။ ၄ လုံး ပေါက်ကွဲခဲ့ပါတယ်။ ညပိုင်းဖြစ်တဲ့အတွက် ထိခိုက်ဒဏ်ရာရသူမရှိခဲ့ဘူး။ အဆောက်အဦးပျက်စီးတာတွေတော့ရှိတယ်။ လိုအပ်တဲ့စုံစမ်းစစ်ဆေးမှုတွေလုပ်နေပါတယ်"ဟု လုံခြုံရေးအဖွဲ့နှင့်နီးစပ်သူတစ်ဦးက NSS ကိုပြောသည်။

Drop Bomb များသည် ထွေအုပ်ရုံးရှိ အစည်းအဝေးခန်းမပေါ်သို့ကျရောက်ပေါက်ကွဲခဲ့သဖြင့် အမိုးသွပ်များနှင့်တန်းများပျက်စီး ဆုံးရှုံးခဲ့ကြောင်း သိရသည်။

ထို့ပြင် အဆိုပါနေ့ ည ၁၀ နာရီခန့်တွင်လည်း လက်နက်ကိုင်အဖွဲ့ဝင်များသည် တကောင်းနယ်မြေရဲစခန်းအား Drone ယာဥ်အသုံးပြု၍ Drop Bomb (၂)လုံးဖြင့် ပစ်ချတိုက်ခိုက်ခဲ့ရာ Bomb များသည် ရဲစခန်းအနီးရှိ သပြေစိုက်ခင်းအတွင်းသို့ကျရောက် ပေါက်ကွဲခဲ့ကြောင်း သိရသည်။

အဆိုပါ တကောင်းနယ်မြေရဲစခန်းအနီး သပြေစိုက်ခင်းအတွင်း Drop Bomb (၂)လုံးကျရောက် ပေါက်ကွဲမှုဖြစ်စဥ်တွင် လူထိခိုက်ဒဏ်ရာရရှိမှုနှင့်သေဆုံးမှုမရှိခဲ့ကြောင်း သိရသည်။