Pika (NSS) - ဇန်နဝါရီ ၈ 

အင်ဒိုနီးရှားရဲတပ်ဖွဲ့များသည် သားသတ်ရုံသို့ ပို့ဆောင်ရန်အတွက် ချည်နှောင်ခံထားရသော ခွေးအကောင်ရေ (၂ဝဝ)ကျော်ကို သယ်ဆောင်လာသည့် ထရပ်ကားတစ်စီးကို ကြားဖြတ်ဟန့်တားနိုင်ခဲ့ကြောင်း အာဏာပိုင်များက ပြောကြားခဲ့သည်။

အဆိုပါကြားဖြတ်ဟန့်တားနိုင်မှုသည် ခွေးသား စားခြင်းကို ဆန့်ကျင်သည့် တက်ကြွလှုပ်ရှားသူများအတွက် နောက်ဆုံးအောင်ပွဲတစ်ခုဖြစ်ကြောင်းလည်း သိရသည်။ အဆိုပါထရပ်ကားကို ဇန်နဝါရီလ(၆)ရက် ညတွင် ဂျာဗားကျွန်းပေါ်ရှိ Semarang မြို့တွင် ကြားဖြတ်ဟန့်တားကာ ဖမ်းဆီးနိုင်ခဲ့ခြင်းဖြစ်ကြောင်း သိရသည်။

ထရပ်ကား၏ နောက်ခန်းထဲတွင် ပါးစပ် နှင့် ခြေလက်များကို ချည်နှောင်ခံရထားသော ခွေးအကောင်ရေ(၂၀၀) ကျော်ကို တွေ့ရှိခဲ့ခြင်းဖြစ်ကြောင်း သိရသည်။ အာဏာပိုင်များသည် ထရပ်ကားပေါ်မှ အဖွဲ့ဝင်လူ(၅)ဦးကို ဖမ်းဆီးခဲ့ပြီး ၎င်းတို့အားလုံးသည် တိရစ္ဆာန်စောင့်ရှောက်ရေးစည်းမျဉ်းအရ စွဲချက်တင်ခံရနိုင်ကာ ထောင်ဒဏ်(၅) နှစ် ချမှတ်ခံရနိုင်ဖွယ်ရှိနေကြောင်း သိရသည်။ ဒေသတွင်းရဲချုပ် Irwan Anwar က "ပြီးခဲ့တဲ့လကတည်းက ဒီကိစ္စနဲ့ပတ်သက်တဲ့သတင်းအချက်အလက်တွေကို ကျွန်တော်တို့ရရှိထားပေမယ့်လည်း ဇန်နဝါရီလ(၆)ရက် ညကြမှပဲ ခွေး(၂၂၆)ကောင်ကို သားသတ်ရုံကို ပို့ဆောင်မယ့်ကိစ္စကို တားဆီးနိုင်ခဲ့ပါတယ်" ဟု ပြောခဲ့သည်။

အင်ဒိုနီးရှားနိုင်ငံသည် ခွေးသား နှင့် ကြောင်သား ရောင်းချခြင်းကို ခွင့်ပြုထားသည့် နိုင်ငံအနည်းငယ်များထဲမှ တစ်နိုင်ငံဖြစ်သော်လည်း ပြီးခဲ့သည့်နှစ်များအတွင်း Semarang မြို့ အပါအဝင် အခြားမြို့အချို့တွင် ခွေးသား နှင့် ကြောင်သား ရောင်းချမှုကို တားမြစ်ပိတ်ပင်ခဲ့ကြောင်းလည်း သိရသည်။

ထို့အပြင် အဆိုပါအလေ့အကျင့်ကိုဆန့်ကျင်သည့် လှုပ်ရှားမှုများလည်း ပေါ်ပေါက်လာခဲ့ကြောင်း သိရသည်။ တိရစ္ဆာန်စောင့်ရှောက်ရေးတက်ကြွလှုပ်ရှားသူများသည် ခွေးသားရောင်းချသည့်ကိစ္စများကို ပြီးခဲ့သည့်နှစ် ဒီဇင်ဘာလတွင် ရဲတပ်ဖွဲ့ထံအကြောင်းကြားခဲ့သော်လည်း ခြေရာခံလမ်းကြောင်းများ ပျောက်သွားခဲ့ကြောင်း သိရသည်။

"ဒီဇင်ဘာလ(၂၃)ရက်တုန်းက ကျွန်တော့်ရဲ့ဆိုရှယ်မီဒီယာဖော်လိုဝါတစ်ယောက်ဆီကနေ ပထမဆုံးအကြိမ် သတင်းအချက်အလက်တွေ ရရှိခဲ့ပါတယ်။ ဒါပေမယ့်လည်း ခွေးသား နဲ့ ကြောင်သား ရောင်းချသူတွေဟာ ပြီးခဲ့သည့် သီတင်းပတ်နှစ်ပတ်တုန်းက ကျွန်တော့်ရဲ့စောင့်ကြည့်မှုအောက်ကနေ လွတ်သွားခဲ့ပါတယ်။ ခွေးတွေ၊ ကြောင်တွေ ကို လူတွေစားသုံးဖို့အတွက် အစားအစာတစ်ခုအဖြစ် မဖန်တီးသင့်ပါဘူး" ဟု Animals Hope Shelter Indonesia ၏ ခွေးသား နှင့် ကြောင်သားစားခြင်းကို တားမြစ်ပိတ်ပင်ရန် တွန်းအားပေး ဆောင်ရွက်နေသူ Christian Yosua Pale က ပြောခဲ့သည်။