Pika (NSS) - ဇန်နဝါရီ ၅ 

ဇန်နဝါရီလ(၅)ရက်တွင် အင်ဒိုနီးရှားနိုင်ငံ ဘန်ဒေါင်းမြို့အနီး စပါးခင်းတစ်ခုအတွင်းရှိ ရထားလမ်းမပေါ်တွင် ရထားနှစ်စင်းတိုက်မိခဲ့ရာ အနည်းဆုံးလူ(၃)ဦးသေဆုံးခဲ့ပြီး အခြားလူ(၂)ဒါဇင်ကျော် ထိခိုက်ဒဏ်ရာရရှိခဲ့ကြောင်း တာဝန်ရှိသူများက ပြောကြားခဲ့သည်။

အဆိုပါမတော်တဆမှုဖြစ်ပွားပြီးနောက် ရထားနှစ်စင်းလုံးမှ ခရီးသည်(၅ဝဝ)နီးပါးကို ဘေးလွတ်ကင်းရာသို့ ရွှေ့ပြောင်းကယ်ထုတ်ခဲ့ရကြောင်း ၎င်းတို့က ထပ်မံပြောခဲ့သည်။ 

မတော်တဆမှုသည် ဘန်ဒေါင်းမြို့အရှေ့ဖက်ရှိ Rancaekek ခရိုင်တွင် ဇန်နဝါရီလ(၅)ရက် အစောပိုင်းက ဖြစ်ပွားခဲ့ ခြင်းဖြစ်ကြောင်း သိရသည်။ အခင်းဖြစ်ပွားရာနေရာကို ရိုက်ကူးထားသော ဗီဒီယိုဖိုင်ထဲတွင် ရထားသံလမ်းပေါ်မှ ရေမြုပ်နေသော စပါးခင်းထဲသို့ ထိုးကျနေသည့် ရထားတွဲအနည်းဆုံးနှစ်စင်းကို တွေ့မြင်ခဲ့ရသည်။ 

ရထားတစ်စင်းသည် ဒေသတွင်းခရီးသွားပို့ဆောင်ရေးလိုင်းတစ်ခုဖြစ်ပြီး အခြားရထားတစ်စင်းမှာ Surabaya မြို့မှ ဘန်ဒေါင်းမြို့သို့ ဦးတည်သွားနေချိန်တွင် တိုက်မိခဲ့ခြင်းဖြစ်ကြောင်း တာဝန်ရှိသူများကပြောကြားခဲ့သည်။ ဘန်ဒေါင်းမြို့သည် ဂျာကာတာမြို့အရှေ့တောင်ဘက် ကီလိုမီတာ(၁၆ဝ)အကွာတွင် တည်ရှိကြောင်းလည်း သိရသည်။

"ဒေသအတွင်း ခရီးသွားပို့ဆောင်ရေး ရထားပေါ်က ခရီးသည် (၁၉၁)ဦး နဲ့ အခြားရထားတစ်စီးပေါ်က ခရီးသည် (၂၈၇)ဦးတို့ကို ဘေးလွတ်ကင်းရာကို ရွှေ့ပြောင်းကယ်ထုတ်နိုင်ခဲ့ပါတယ်" ဟု အနောက်ဂျာဗားပြည်နယ်၏ ယာယီ အုပ်ချုပ်ရေးမှူး ဘေးမက်ရှ်မူဒင်က ပြောခဲ့သည်။

အဆိုပါမတော်တဆမှု ဘာကြောင့်ဖြစ်ပွားရသည်ဆိုသည့်အချက်ကို လက်ရှိအချိန်အထိ ရှင်းရှင်းလင်းလင်း မသိရှိ ရသေးကြောင်း သိရသည်။ အင်ဒိုနီးရှားနိုင်ငံတွင် သက်တမ်းရင့် ရထားလမ်းကွန်ရက်များကြောင့် အထူးသဖြင့် ရထားလမ်းဆုံများတွင် မတော်တဆမှုများမကြာခဏဖြစ်ပွားလေ့ရှိကြောင်း သိရသည်။