ဂျန်ဇက် (NSS) - ဒီဇင်ဘာ ၃၁ 

၂ဝ၂၃ ခုနှစ်အတွင်း ပြည်ပခရီးသွား လာရောက်မှုအများဆုံးမြို့ကြီး ၁ဝ မြို့စာရင်းထဲမှာ မြန်မာနိုင်ငံရဲ့မြို့တွေ ပါဝင်ခြင်းမရှိဘဲ ထိုင်းနိုင်ငံ ဘန်ကောက်မြို့က ထိပ်ဆုံးမှာရပ်တည်နေကြောင်း MasterCard  အဖွဲ့ရဲ့ ဖော်ပြချက်အရ သိရပါတယ်။

ထိုင်းနိုင်ငံ ဘန်ကောက်မြို့ကို ၂ဝ၂၃ ခုနှစ်အတွင်း ပြည်ပခရီးသွားဦးရေ ၂၂ ဒသမ ၇၈ သန်း လာရောက်ခဲ့ပြီး ကမ္ဘာကျော် ပဲရစ်မြို့ကို ကျော်ဖြတ်နိုင်ခဲ့ကြောင်း သိရပါတယ်။ အဆိုပါအဖွဲ့ဟာ ၂ဝ၂၃ ခုနှစ်အတွင်း ကမ္ဘာတဝန်းရှိ မြို့များအနက် ပြည်ပခရီးသွား လာရောက်မှုအများဆုံး မြို့ပေါင်း ၂ဝ စာရင်းကို ပြီးခဲ့တဲ့ရက်ပိုင်းမှာထုတ်ပြန်ခဲ့ရာ ထိုင်းနိုင်ငံရဲ့ ဘန်ကောက်မြို့၊ ဖူးခက်မြို့နဲ့ ပတ္တယားမြို့တို့ဟာ ထိပ်ဆုံး မြို့ပေါင်း ၂ဝ ထဲမှာ ပါဝင်နေခဲ့ကြောင်း သိရပါတယ်။

၂ဝ၂၃ ခုနှစ်အတွင်း ပြည်ပခရီးသွားလာရောက်မှုအများဆုံးမြို့တွေထဲမှာ ဘန်ကောက်မြို့၊ ပြင်သစ်နိုင်ငံ ပဲရစ်မြို့၊ ဗြိတိန်နိုင်ငံ လန်ဒန်မြို့၊ ဒူဘိုင်းမြို့၊ စင်ကာပူ၊ မလေးရှားနိုင်ငံ ကွာလာလမ်ပူမြို့၊ အမေရိကန် နယူးယောက်မြို့၊ တူရကီနိုင်ငံ အစ္စတန်ဘူလ်မြို့၊ ဂျပန်နိုင်ငံ တိုကျိုမြို့၊ တူရကီနိုင်ငံ အန်တယ်ယာမြို့တို့ ပါဝင်နေကြောင်း သိရပါတယ်။

ထိုင်းနိုင်ငံ ဘန်ကောက်မြို့ကိုလာရောက်တဲ့ ပြည်ပခရီးသွားဦးရေ ၂၂ သန်းကျော် ရှိခဲ့သလို ဖူးခက်မြို့ကို လာရောက်တဲ့ ပြည်ပခရီးသွားအရေအတွက်က ၁ဝ သန်းနီးပါးရှိခဲ့ကာ ပတ္တယားမြို့ကို လာရောက်တဲ့ ပြည်ပ ခရီးသွားအရေအတွက် ၉ သန်းခွဲကျော် ရှိခဲ့ကြောင်း သိရပါတယ်။ 

MasterCard  အဖွဲ့က ထုတ်ပြန်တဲ့ ၂ဝ၂၃ ခုနှစ်အတွင်း ပြည်ပခရီးသွားလာရောက်မှု အများဆုံးမြို့ပေါင်း ၂ဝ စာရင်း ထဲမှာ အာဆီယံဒေသအတွင်း နိုင်ငံများမှ မြို့ပေါင်း ၆ မြို့ပါဝင်ခဲ့ပြီး ကမ္ဘောဒီးယား၊ မြန်မာ၊ ဖိလစ်ပိုင်၊ လာအို၊ ဘရူးနိုင်းနိုင်ငံတို့ရဲ့မြို့တွေ ပါဝင်ခြင်း မရှိကြောင်း သိရပါတယ်။