သန့်ဇင် (NSS) - ဒီဇင်ဘာ ၂၈

စစ်ကိုင်းတိုင်း၊ စစ်ကိုင်းမြို့တွင် ကွမ်းယာရောင်းနေသည့်အမျိုးသမီးကို ဆိုင်အတွင်း ဝင်ရောက်၍ ဓားဖြင့်ထိုးမှုဖြစ်ပွားခဲ့ကြောင်း အိုးဘိုကျန်းမာရေး နှင့် လူမှုကူညီရေးအသင်းထံမှ သိရသည်။

ယနေ့(ဒီဇင်ဘာ ၂၈ ရက်)၊ မွန်းလွဲ ၁ နာရီခန့်အချိန်ခန့်တွင် စစ်ကိုင်းမြို့၊ ရွှေဗျိုင်းဖြူဆီဆိုင်အနီးရှိ ကွမ်းယာဆိုင်၌ အထက်ပါကဲ့သို့ဖြစ်ပွားခဲ့ခြင်းဖြစ်ကြောင်း သိရသည်။

“ကျွန်မတို့ သိရတာတော့ ဓားနဲ့အထိုးခံရတဲ့အမျိုးသမီးက ကွမ်းယာရောင်းနေတဲ့အချိန်မှာ စက်ဘီးနဲ့ လူတစ်ယောက်ရောက်လာပြီး ကွမ်းယာဝယ်မလို နဲ့ ဆိုင်ထဲဝင်လာပြီးနောက်ကနေဓားနဲ့ထိုးသွားတာပေါ့။ ပြီးတော့ လူတွေရောက်လာတာနဲ့ ဓားနဲ့ထိုးတဲ့လူက စက်ဘီးထားပြီး ထွက်ပြေးသွားတယ်” ဟု အိုးဘိုကျန်းမာရေး နှင့် လူမှုကူညီရေးအသင်းမှ တာဝန်ရှိသူတစ်ဦးက NP News ကို ပြောသည်။

အဆိုပါဓားထိုးခံရမှုကြောင့် စစ်ကိုင်းမြို့၊ ပြူကံရပ်ကွက်နေ အသက်(၅ဝ)နှစ်ဝန်းကျင် ဒေါ်သန်းသန်အေးတွင် လည်ဂုတ်ထိုးသွင်း ဒဏ်ရာတစ်ချက်ရရှိခဲ့ကြောင်း သိရသည်။

“ဓားနဲ့ အထိုးခံရတာက လည်ဂုတ်မှာပါ။ အရမ်းကြီးလည်းစိုးရိမ်စရာမရှိပါဘူး။ ဆေးရုံပို့နေတုန်းတော့ အသက်ရှုကြပ်တယ် ပြောတယ်။ ကျန်တာတော့ ရဲမှူခင်းဖြစ်တဲ့အတွက် သက်ဆိုင်ရာကပဲဆက်လုပ်နေတယ်” ဟု ၎င်းက ဆက်လက်ပြောသည်။

ထို့ကြောင့် ထိခိုက်ဒဏ်ရာရရှိသူ အမျိုးသမီးအား အိုဘိုကျန်းမာရေးနှင့်လူမှုကူညီရေးအသင်းမှ စစ်ကိုင်းမြို့ ပြည်သူ့ဆေးရုံသို့ ပို့ဆောင်ကူညီပေးခဲ့ကြောင်း သိရသည်။