Pika (NSS) - ဒီဇင်ဘာ ၂၅ 

သီရိလင်္ကာနိုင်ငံတွင် သီတင်းပတ်(၁)ပတ်ကြာ လုပ်ဆောင်ခဲ့သော စစ်တပ်ကျောထောက်နောက်ခံပြု မူးယစ်ဆေးဝါးတိုက်ဖျက်ရေးဝင်ရောက်စီးနင်းမှုများအတွင်း လူပေါင်း(၁၅ဝဝဝ)နီးပါးကို ဖမ်းဆီးမိခဲ့ကြောင်း သီရိလင်္ကာရဲတပ်ဖွဲ့က ဒီဇင်ဘာလ(၂၄)ရက်တွင် ထုတ်ပြန်ကြေညာခဲ့သည်။

သို့သော်လည်း အဆိုပါဖြိုခွင်းမှုများကို လူ့အခွင့်အရေးတက်ကြွလှုပ်ရှားသူများက ပြစ်တင်ရှုတ်ချခဲ့ကြောင်းလည်း သိရသည်။ "Yuktiya" (သို့မဟုတ်) "Justice" ဟု အမည်ပေးထားသည့် စစ်ဆင်ရေးအတွင်း ဆေးခြောက် (၂၇၂) ကီလိုဂရမ်၊ hashish (၃၅) ကီလိုဂရမ်၊ဘိန်းဖြူ (၉)ကီလိုဂရမ် အပါအဝင် မူးယစ်ဆေးဝါး စုစုပေါင်း (၄၄ဝ) ကီလိုဂရမ်နီးပါး ဖမ်းဆီးရမိခဲ့ကြောင်း ရဲတပ်ဖွဲ့က ပြောကြားခဲ့သည်။ 

ထို့အပြင် အိန္ဒိယသမုဒ္ဒရာအတွင်းရှိ ကျွန်းကို မူးယစ်ဆေးဝါးရောင်းဝယ်ဖောက်ကားသည့်နေရာတစ်ခုအဖြစ် အသုံးပြုနေသည်ဟု အာဏာပိုင်များက ယုံကြည်နေကြောင်းလည်း သိရသည်။

စစ်ဆင်ရေးအတွင်း မူးယစ်ဆေးဝါးသုံးစွဲသူ(၁၁ဝဝ)နီးပါးကို ဖမ်းဆီးကာ စစ်တပ်က ဦးစီးလုပ်ကိုင်နေသော ဂေဟာ တွင် ပြုပြင်ထိန်းသိမ်းရေးများ လုပ်ဆောင်ရန်အတွက် စေလွှတ်ခဲ့ပြီး အခြားသံသယရှိသူ လူ(၁၃၆၆၆)ဦးကို ဖမ်းဆီး ထားကြောင်း ရဲတပ်ဖွဲ့က ပြောကြားခဲ့သည်။ 

သီရိလင်္ကာမြို့တော် Sri Jayawardenepura Kotte နှင့် အခြားနေရာများတွင် နေအိမ်များကို ဝင်ရောက်စီးနင်းမှု များ လုပ်ဆောင်ရန်အတွက် ရဲတပ်ဖွဲ့ နှင့် စစ်သားများက အနံ့ခံခွေးများကို အသုံးပြုနေသည့်ဗီဒီယိုဖိုင်ကို ဒေသအတွင်းမီဒီယာများက ပြသခဲ့ကြောင်းလည်း သိရသည်။ လုံခြုံရေးနှင့်ဆက်စပ်သော တာဝန်များထမ်းဆောင် ရန်အတွက် အရာရှိများကို လိုအပ်သောကြောင့် ခရစ္စမတ်အားလပ်ရက်အတွင်း ဝင်ရောက်စီးနင်းမှုများကို ခေတ္တ ရပ်ဆိုင်းထားမည်ဖြစ်သော်လည်း ဒီဇင်ဘာလ(၂၆)ရက်နောက်ပိုင်းတွင် စစ်ဆင်ရေးကို ပြန်လည်စတင်မည်ဖြစ် ကြောင်း ရဲတပ်ဖွဲ့က ပြောကြားခဲ့သည်။

ရဲတပ်ဖွဲ့များသည် ရှာဖွေဝရမ်းများ မပါရှိဘဲ လုပ်ဆောင်ခဲ့သည့်အတွက် တရားမဝင်ကြောင်း နှင့် နောက်ပိုင်းတွင် တရားစွဲဆိုမှုများ ပြန်လည်လုပ်ဆောင်ရန်အတွက် ဝင်ရောက်စီးနင်းမှုအတွင်း ပါဝင်ခဲ့သော အရာရှိများ၏ အသေးစိတ်အချက်အလက်များကို ရယူရန် လူ့အခွင့်အရေးရှေ့နေ Hejaaz Hizbullah က ပြောကြားခဲ့သည်။ 

ထို့အပြင် အဆိုပါရှာဖွေမှုများသည် သက်သေအထောက်အထားများကို အခြေခံထားခြင်းမျိုးမဟုတ်ဘဲ ဆင်းရဲသော နေရာများကိုသာ ပစ်မှတ်ထားလုပ်ဆောင်ခဲ့ခြင်းဖြစ်ကြောင်း လူ့အခွင့်အရေးတက်ကြွလှုပ်ရှားသူ Ambika Satkunanathan က ပြောကြားခဲ့သည်။ ၎င်းက "ရဲတပ်ဖွဲ့တွေဟာ မူးယစ်ဆေးဝါးသုံးစွဲသူတွေနဲ့ အသေးစား ရောင်းဝယ်သူတွေကို ဖမ်းဆီးခဲ့ပေမယ့်လည်း ကြီးကြီးမားမားလုပ်ကိုင်နေတဲ့ ရောင်းဝယ်ဖောက်ကားသူတွေကို တော့ အာရုံစိုက်တာမျိုးမရှိပါဘူး" ဟု ပြောခဲ့သည်။