ကျော် (NSS) - ဒီဇင်ဘာ ၂၅

လူငယ်မျိုးဆက်သစ်ကစားသမားများ ထွက်ပေါ်လာစေရေးနှင့်မြန်မာ့လက် ရွေးစင်လူငယ်အသင်းများကို ထောက်ပံ့မှုဖြစ်စေရေးတို့အတွက် ရည်ရွယ်ကျင်းပမည့် FIFA-MFF U17 League 2023 ပြိုင်ပွဲအတွက် ခြေစစ်ပွဲအောင် သည့် အသင်း (၆)သင်းထွက်ပေါ်လာခဲ့ပြီဖြစ်ကြောင်း မြန်မာနိုင်ငံဘောလုံးအဖွဲ့ချုပ်ထံမှ သိရသည်။

ခြေစစ်ပွဲစဥ်များယှဥ်ပြိုင်ကစားပြီးနောက် Maubin FC ၊ Insein City FC ၊ Burmese Youth FC ၊ Naypyitaw United FC ၊ Su Latt Myint Mo FC ၊ City Shwepyithar FC အသင်းတို့ခြေစစ်ပွဲ အောင်မြင်ခဲ့ကြကြောင်း သိရသည်။

အဆိုပါ ခြေစစ်ပွဲအောင်အသင်းများသည် FIFA-MFF U17 League 2023 ပြိုင်ပွဲအား တိုက်ရိုက်ဝင်ခွင့်ရထားသည့် Rakhine United FC ၊ Shwepyithar FC ၊ Royal Yangon Thet Lon FC ၊ Pharsimyay FC ၊ Artharwady FC ၊ Shan FC အသင်းများနှင့်အတူ ယှဥ်ပြိုင်ရမည်ဖြစ်သည်။

FIFA-MFF U17 League 2023 ပြိုင်ပွဲ၏ ခြေစစ်ပွဲစဥ်များကို ပြီးခဲ့သည့် ဒီဇင် ဘာလ ၂၀ ရက်မှ ၂၄ ရက်အထိယှဥ်ပြိုင်စေခဲ့ပြီးနောက် လိဂ်ပြိုင်ပွဲအား လာမည့် ဒီဇင်ဘာလ ၂၉ ရက်မှစတင်၍ ၂၀၂၄ ခုနှစ်၊ ဇွန်လ ၃၀ ရက်အထိ ရန်ကုန်မြို့၌ ကျင်းပသွားမည်ဖြစ်ကြောင်း သိရသည်။

"ဒီလိုလူငယ်ကစားသမားတွေထွက်လာအောင် ဒီလိုပြိုင်ပွဲတွေလုပ်ပေးတာက ကောင်းပါတယ်။ ဘာဖြစ်လို့လဲဆိုတော့ ကျွန်တော်တို့ မြန်မာဘောလုံးအသင်းတွေက အဆင့်အတန်းအတော်နိမ့်နေပြီလို့ပြောလို့ရတယ်။ အာရှကျားကြီးဆိုပြီး ဟိုးအရင်ကခေါင်းမော့နိုင်ပေမယ့် အခုတော့ ပြိုင်လိုက်သမျှပွဲတိုင်းမှာ အရှုံးတွေပဲများနေတယ်။ လူငယ်ကစားသမားတွေကို ပျိုးထောင်နိုင်မှသာ မြန်မာဘောလုံးအဆင့်အတန်းကပိုတက်လာနိုင်မှာ"ဟု ဒဂုံမြို့သစ်(တောင်ပိုင်း)မြို့နယ်နေ ဦးကျော်စိုးဦးကပြောသည်။

FIFA-MFF U17 League 2023 ပြိုင်ပွဲအားဝင်ရောက်ယှဥ်ပြိုင်မည့် ကစား သမားများအနေဖြင့် ၂၀၀၇ ခုနှစ်မှ ၂၀၀၉ ခုနှစ်၊ ဒီဇင်ဘာလ ၃၁ ရက်အတွင်း မွေးဖွားသူများကိုသာ ပါဝင်ယှဥ်ပြိုင်ခွင့်ပြုသွားမည်ဖြစ်ကြောင်း မြန်မာနိုင်ငံဘောလုံးအဖွဲ့ချုပ်ထံမှ သိရသည်။

အဆိုပါ FIFA-MFF U17 League 2023 ပြိုင်ပွဲအား ကမ္ဘာ့ဘောလုံးအဖွဲ့ချုပ်(ဖီဖာ)နှင့်မြန်မာနိုင်ငံဘောလုံးအဖွဲ့ချုပ်တို့ ပူးပေါင်းစီစဉ်ကျင်းပခြင်းဖြစ်ကြောင်း သိရသည်။