Pika (NSS) - ဒီဇင်ဘာ ၂၅

အနောက်အုပ်စုနိုင်ငံများတွင် ယူကရိန်းတပ်ဖွဲ့များကို အပြည့်အဝထောက်ပံ့မှုများ လုပ်ဆောင်ရန်အတွက် ခဲယမ်း မီးကျည်များ အလုံအလောက်မရှိသည့်အပြင် ထုတ်လုပ်မှုကိုလည်း ပိုမိုတိုးမြှင့်ခြင်းမျိုး မရှိသောကြောင့် ယူကရိန်း ပဋိပက္ခမှာ စစ်အေးတိုက်ပွဲအသစ်တစ်ခုကဲ့သို့ ဖြစ်သွားနိုင်ဖွယ်ရှိကြောင်း ဖင်လန်ကာကွယ်ရေးဝန်ကြီး အန်တီ ဟက်ကာနန်က သတိပေးပြောဆိုခဲ့သည်။ 

ထို့အပြင် ပြီးခဲ့သည့်ဇွန်လအစောပိုင်းက စတင်ခဲ့သော ယူကရိန်း၏ တန်ပြန်ထိုးစစ်ဆင်မှုများမှာ အောင်မြင်မှုမရှိခဲ့ ကြောင်းလည်း သိရသည်။ ယူကရိန်းသည် တန်ပြန်ထိုးစစ်ဆင်မှုများအတွင်း ရုရှားကသိမ်းယူထားသောနယ်မြေ များကို ပြန်လည်သိမ်းယူနိုင်ခြင်းမျိုးမရှိခဲ့သည့်အပြင် တပ်ဖွဲ့ဝင်(၁၆ဝဝဝဝ)ခန့် ဆုံးရှုံးခဲ့ရကြောင်း ရုရှား ကာကွယ်ရေးဝန်ကြီးဌာနက ခန့်မှန်းပြောခဲ့သည်။

ယူကရိန်းတွင် လူသစ်စုဆောင်းမှုအခက်အခဲများနှင့် ခဲယမ်းမီးကျည်များ ပြတ်တောက်မှုများ ကြုံတွေ့နေရပြီး ယူကရိန်း၏ ဥရောပကျောထောက်နောက်ခံနိုင်ငံများသည် ခဲယမ်းမီးကျည်များပေးပို့မည့် ၎င်းတို့၏ ကတိဝတ်ကို တည်နိုင်ခဲ့ခြင်း မရှိခဲ့ကြောင်းလည်း သိရသည်။

ထို့အပြင် ယူကရိန်းသို့ နောက်ထပ်စစ်ရေးအကူအညီများ ကူညီပံ့ပိုးပေးမည့် အမေရိကန်၏ အစီအစဉ်များသည် လည်း လွှတ်တော်တွင် ရပ်တန့်နေခဲ့ကြောင်း သိရသည်။ အန်တီဟက်ကာနန် က "ဒီပဋိပက္ခဟာ ရေတိုပြဿနာ တစ်ခုလို့ အနောက်အုပ်စုနိုင်ငံတွေက ထင်နေကြပါတယ်။ ပြီးတော့ ယူကရိန်းက အနိုင်ရရှိမယ်လို့လည်း အနောက်အုပ်စုနိုင်ငံတွေ အတော်များများက ခန့်မှန်းနေကြပါတယ်။ ရုရှားမှာ ဒီစစ်ပွဲကို နှစ်ပေါင်းများစွာကြာ အောင် ဆက်တိုက်နိုင်ဖို့ စွမ်းရည်တွေရှိပါတယ်" ဟု ပြောခဲ့သည်။

ရုရှား၏ စစ်လက်နက်ပစ္စည်းထုတ်လုပ်မှုစွမ်းရည်များနှင့် လူသစ်စုဆောင်းမှုတို့ကို အန်တီဟက်ကာနန်က ရည်ညွှန်းပြောဆိုခဲ့ခြင်းဖြစ်ကြောင်းလည်း သိရသည်။ ထို့အပြင် ရုရှားနိုင်ငံသည် ပြီးခဲ့သည့်နှစ်ကဖြစ်ပွားခဲ့သော ပဋိပက္ခအစပိုင်းထက် အမြောက်ကျည် (၁၇ ဒသမ ၅) ရာခိုင်နှုန်း ပိုမိုထုတ်လုပ်နေပြီဖြစ်ကြောင်း ရုရှား ကာကွယ်ရေးဝန်ကြီးဆာဂေးရှိုဂူက ထုတ်ဖော်ပြောခဲ့သည်။ 

အန်တီဟက်ကာနန်က "ကျွန်တော်တို့ဟာ စစ်အေးတိုက်ပွဲအသစ်တစ်ခုခုဆီကို ဦးတည်သွားနေတယ်လို့ ကျွန်တော် ထင်ပါတယ်" ဟု ပြောခဲ့သည်။ ထို့အပြင် ယူကရိန်းကို ကူညီပံ့ပိုးမှုများလုပ်ဆောင်ပေးရန်အတွက် အမြောက်ကျည်များကို နှစ်ဆတိုးမြင့်ထုတ်လုပ်သွားမည်ဖြစ်ကြောင်း ဖင်လန်အစိုးရက ပြီးခဲ့သည့်လတွင် ထုတ်ပြန်ကြေညာခဲ့သည်။

သို့သော်လည်း အမြောက်ကျည်အရေအတွက် မည်မျှထုတ်လုပ်မည်ဆိုသည့်အချက်နှင့် မည်သည့်အချိန်တွင် ထုတ်လုပ်မည်ဆိုသည့်အချက်တို့ကို ဖင်လန်အစိုးရက ထုတ်ဖော်ပြောဆိုခဲ့ခြင်းမျိုး မရှိခဲ့ကြောင်းလည်း သိရသည်။