သန့်ဇင် (NSS) - ဒီဇင်ဘာ ၂၄

ကချင်ပြည်နယ်၊ မြစ်ကြီးနားမြို့တွင် ကားနှင့်ဆိုင်ကယ်တို့ မျက်နှာချင်းဆိုင်တိုက်မိရာမှ အမျိုးသမီးတစ်ဦး ဒဏ်ရာ ပြင်းထန်စွာရရှိခဲ့ကြောင်း ဧရာဝတီဂရုဏာ အခမဲ့လူမှုကူညီရေးအသင်းထံမှ သိရသည်။

ယာဉ်တိုက်မှုသည် ယနေ့(ဒီဇင်ဘာ ၂၄ ရက်)၊ နံနက် ၇ နာရီဝန်းကျင်အချိန်ခန့်က မြစ်ကြီးနားမြို့၊ မင်းရပ်ရပ်ကွက်၊ ပြည်သူ့ရင်ပြင်ရှေ့တွင် ဖြစ်ပွားခဲ့ခြင်းဖြစ်ကြောင်း သိရသည်။

“ဆိုင်ကယ်က ကုန်းဘက်ကနေ တက်လာတဲ့အချိန် ကားကလည်း ပြည်သူ့ရင်ပြင်ဘက်က အလာမှာ မျက်နှာချင်း ဆိုင်တိုက်မိကြတာ” ဟု ဧရာဝတီဂရုဏာ အခမဲ့လူမှုကူညီရေးအသင်းမှ တာဝန်ရှိသူတစ်ဦးက NP News ကို ပြောသည်။

အဆိုပါယာဉ်တိုက်မှုကြောင့် အသက်(၅ဝ)နှစ်ဝန်းကျင်အရွယ်ရှိ ဆိုင်ကယ်ယာဉ်မောင်းအမျိုးသမီးတွင် ဝဲဘက် ခြေကျင်းဝတ်ကျိုးဒဏ်ရာ၊ နဖူးပေါက်ပြဲဒဏ်ရာနှင့် အခြားထိခိုက်ဒဏ်ရာများရရှိခဲ့ကြောင်း သိရသည်။

“ဆိုင်ကယ်ပေါ်ကအမျိုးသမီးက ခြေကျင်းဝတ် ကျိုးတယ်။ နဖူးမှာလဲ နှစ်လက်မလောက်နစ်ဝင်သွားတဲ့ ဒဏ်ရာရှိ တယ်။ အခြားထိခိုက် ဒဏ်ရာတွေလဲ ရှိတယ်။ မြေပြင်အခြေအနေကတော့ စိုးရိမ်ရတယ်” ဟု ၎င်းက ဆက်လက် ပြောသည်။

ထို့ကြောင့် ထိခိုက်ဒဏ်ရာရရှိခဲ့သည့် အမျိုးသမီးအား ဧရာဝတီဂရုဏာ အခမဲ့လူမှုကူညီရေးအသင်းမှ မြစ်ကြီးနား မြို့ပြည်သူ့ဆေးရုံကြီးသို့ ပို့ဆောင်ပေးခဲ့ကြောင်း သိရသည်။

အလားတူ ယမန်နေ့(ဒီဇင်ဘာ ၂၃ ရက်)၊ ညနေ ၆ နာရီ ၃ဝ မိနစ်အချိန်ခန့်တွင် ပဲခူးတိုင်း၊ ပြည်မြို့၊ ဘုရင်နောင် လမ်းပေါ်ရှိ၊ မြို့သစ်(၄)လမ်းထိပ်တွင် စက်ဘီး(၂)စီးအား နောက်မှ အိမ်စီးကားမှ ဝင်တိုက်မှုဖြစ်ပွားခဲ့ရာ အမျိုးသမီး (၃)ဦး ထိခိုက်ဒဏ်ရာများရရှိခဲ့သဖြင့် ပြည်မြို့ပြည်သူ့ဆေးရုံကြီးသို့ ပို့ဆောင်ထားရကြောင်း ပျူနှလုံးသားလူမှု ကူညီရေးအသင်းထံမှ သိရသည်။