ဂျန်ဇက် (NSS) - ဒီဇင်ဘာ ၂၄ 

လာမယ့်နှစ်မှာ ကျင်းပမယ့် အမေရိကန်သမ္မတရွေးကောက်ပွဲကို ပါဝင်ယှဉ်ပြိုင်မယ့် သမ္မတဟောင်းဒေါ်နယ်ထရမ့်က လက်ရှိသမ္မတဂျိုးဘိုင်ဒန်ကို စကားစစ်ထိုးပွဲ ၁ဝ ကြိမ် လုပ်ဆောင်ဖို့ စိန်ခေါ်လိုက်ကြောင်း သိရပါတယ်။

ဒေါ်နယ်ထရမ့်က ၎င်းနဲ့ ဂျိုးဘိုင်ဒန်တို့ဟာ ပါတီကိုယ်စားပြုသမ္မတလောင်းတွေအဖြစ်ရွေးချယ်ခံရမယ်ဆိုရင် နှစ်ဦးသား အကြိတ်အနယ်ပြုလုပ်ရမယ့် စကားစစ်ထိုးပွဲတွေလုပ်ဆောင်သွားလိုကြောင်း ပြောဆိုခဲ့ပါတယ်။

ဒေါ်နယ်ထရမ့်က "ကျွန်တော်သာ အခွင့်အရေးကောင်းတွေ ရရှိမယ်ဆိုရင် လက်ရှိသမ္မတ ဂျိုးဘိုင်ဒန်နဲ့ စကားစစ်ထိုးပွဲတွေ လုပ်ဆောင်လိုတယ်။ ဂျိုးဘိုင်ဒန်နဲ့ စကားစစ်ထိုးပွဲအနည်းဆုံး ၁ဝ ကြိမ်လောက် လုပ်ဆောင်ဖို့ ဆန္ဒရှိပါတယ်။ အမေရိကန်သမ္မတ ရွေးကောက်ပွဲနဲ့ပတ်သက်တဲ့ စကားစစ်ထိုးပွဲတွေကို ကြီးကြပ်ရတဲ့ကော်မရှင်အနေနဲ့လည်းကျွန်တော်နဲ့ ဂျိုးဘိုင်ဒန်တို့ပြုလုပ်မယ့်စကားစစ်ထိုးပွဲကို အကျင့်ပျက်လာဘ်စားမှု၊ ဘက်လိုက်မှုမရှိဘဲ စီစဉ်ပေးစေလိုတယ်" လို့ ပြောပါတယ်။

ဒါ့အပြင် အမေရိကန်သမ္မတဟောင်းဒေါ်နယ်ထရမ့်က ၎င်းအနေနဲ့  သမ္မတရွေးကောက်ပွဲနဲ့ ပတ်သက်တဲ့ စကားစစ်ထိုးပွဲတွေကို စီစဉ်ကြီးကြပ်ရတဲ့အဖွဲ့က ဂျိုးဘိုင်ဒန် နဲ့ စကားစစ်ထိုးပွဲ ပြုလုပ်ဖို့ စီစဉ်ပေးမယ်ဆိုရင် အကြိမ် ၂ဝ စကားစစ်ထိုးရမယ်ဆိုလည်း လက်ခံမှာဖြစ် ကြောင်း၊ ၎င်းအနေနဲ့ ဂျိုးဘိုင်ဒန်နဲ့ စကားစစ်ထိုးပွဲပြုလုပ်မယ့်အစီအစဉ်တွေကို ဘယ်တော့မှ ငြင်းပယ်မှာ မဟုတ်ကြောင်း ပြောပါတယ်။

ဒေါ်နယ်ထရမ့်ဟာ လက်ရှိအချိန်မှာ ရီပတ်ဘလီကန်ပါတီကိုယ်စားပြုသမ္မတလောင်းအဖြစ်ပါဝင်ယှဉ်ပြိုင်ခွင့်ရဖို့ အလားအလာများနေကြောင်း သိရပါတယ်။ ဂျိုးဘိုင်ဒန်ဟာလည်း အသက် ၈ဝ ကျော်အရွယ်ရှိပေမယ့် ဒေါ်နယ်ထရမ့်ကိုတားဆီးနိုင်ဖို့ ရည်ရွယ်ချက်နဲ့ သမ္မတရွေးကောက်ပွဲကို ပါဝင်ယှဉ်ပြိုင်ဖို့ စီစဉ်ထားကြောင်း သိရပါတယ်။