ဂျန်ဇက် (NSS) - ဒီဇင်ဘာ ၂၄ 

အမေရိကန်သမ္မတ ဂျိုးဘိုင်ဒန်ဟာ  အမေရိကန်ဒေါ်လာ ၈၈၆ ဒသမ ၃ ဘီလျံကျော် အသုံးပြုမယ့် ကာကွယ်ရေးအသုံးစရိတ်ဥပဒေမူကြမ်းကို ဥပဒေအဖြစ် ပြင်ဆင်ပြောင်းလဲဖို့ လက်မှတ်ရေးထိုးလိုက်ကြောင်း သိရပါတယ်။ 

အမေရိကန်နိုင်ငံဟာ လာမယ့် ၂ဝ၂၄ ခုနှစ်မှာ ကာကွယ်ရေးအသုံးစရိတ်အဖြစ်

အမေရိကန်ဒေါ်လာ ၈၈၆ ဘီလျံကျော်သုံးစွဲဖို့ စီစဉ်ထားပြီး အဲဒီအသုံးစရိတ်က နိုင်ငံကာကွယ်ရေးအသုံးစရိတ်သမိုင်းမှာ အမြင့်ဆုံးဖြစ်လာခဲ့ကြောင်း သိရပါတယ်။

၂ဝ၂၄ ခုနှစ်အမျိုးသား ကာကွယ်ရေးဥပဒေထဲမှာ အမေရိကန်စစ်သားတွေကို လုပ်ခလစာတိုးပေးမယ့်အစီအစဉ်တွေ ပါဝင်လာမှာဖြစ်သလို ယူကရိန်းကို စစ်ရေးအကူအညီပေးမယ့်အစီအစဉ်တွေလည်းပါဝင်လာမှာဖြစ်ကြောင်း သိရပါတယ်။

အမေရိကန်နိုင်ငံရဲ့ကာကွယ်ရေးအသုံးစရိတ်ဟာ တစ်နှစ်ထက်တစ်နှစ်မြင့်တက်လာနေပြီး ပြီးခဲ့တဲ့  နှစ်ပေါင်း ၂ဝ ကျော်က အသုံးပြုခဲ့တဲ့ကာကွယ်ရေးအသုံးစရိတ်ထက်နှစ်ဆကျော်မြင့်တက်နေကြောင်းသိရပါတယ်။ အမေရိကန်သမ္မတတွေထဲမှာ ဘားရက်အိုးဘားမား လက်ထက်မှာသာ ကာကွယ်ရေးအသုံးစရိတ် လျော့ချသုံးစွဲခဲ့ဖူးပြီး၊ ၂ဝ၁၁ ခုနှစ်က အမေရိကန်ကာကွယ်ရေးအသုံးစရိတ် အမေရိကန်ဒေါ်လာ ၇၅၂ ဘီလျံရှိခဲ့ရာကနေ ၂ဝ၁၅ ခုနှစ်မှာ ကာကွယ်ရေးအသုံးစရိတ်က အမေရိကန်ဒေါ်လာ ၆၃၃ ဘီလျံအထိ လျော့ချသုံးစွဲခဲ့ကြောင်းသိရပါတယ်။

အမေရိကန်ဟာ မဟာမိတ်နိုင်ငံတွေကို ပိုမိုကာကွယ်ပေးနိုင်ဖို့ ရည်ရွယ်ချက်နဲ့ ၂ဝ၂၄ ခုနှစ်အတွင်းမှာ စစ်လက်နက်ပစ္စည်းတွေ ပိုမိုဝယ်ယူသွားဖို့ စီစဉ်ထားကြောင်း သိရပါတယ်။

လာမယ့်နှစ်အတွင်း အမေရိကန်ကာကွယ်ရေးဝန်ကြီးဌာနကို ဒေါ်လာ ၈၈၆ ဘီလျံကျော်သုံးစွဲခွင့်ပြုရေးအတွက် ဥပဒေမူကြမ်းကို အမေရိကန်လွှတ်တော်အတွင်း အကြိတ်အနယ်ဆွေးနွေးခဲ့ပြီး လွှတ်တော်နှစ်ရပ်လုံးမှာ မဲခွဲဆုံးဖြတ်ခဲ့ပြီးနောက် အတည်ပြုပေးခဲ့ခြင်းဖြစ်ကြောင်း သိရပါတယ်။ 

အမေရိကန်ဟာ လက်ရှိအချိန်မှာ တရုတ်၊ ရုရှားနိုင်ငံတို့နဲ့ ဆက်ဆံရေးကောင်းမွန်မှုမရှိဘဲတင်းမာမှုတွေရှိနေရာ စစ်ရေးတည်ဆောက်မှုတွေကို ပိုမိုချဲ့ထွင်ဖို့ စီစဉ်နေကြောင်း သတင်းတွေလည်း ထွက်ပေါ်နေပါတယ်။