သန့်ဇင် (NSS) - ဒီဇင်ဘာ ၂၃

မန္တလေးတိုင်း၊ မဟာအောင်မြေမြို့နယ်တွင် အင်တာနက် Wifiကြိုးနှင့်ငြိကာ ဆိုင်ကယ်တိမ်းမှောက်မှုဖြစ်ပွားခဲ့ကြောင်း မဏီစလလူမှုကူညီရေးအသင်းထံမှ သိရသည်။

ဖြစ်စဉ်မှာ ယနေ့(ဒီဇင်ဘာ ၂၃ရက်)၊ မွန်းလွဲပိုင်းအချိန်တွင် မဟာအောင်မြေမြို့နယ်၊ ၈၄လမ်း၊ ၃၆x၃၇လမ်းကြားတွင် အထက်ပါကဲ့သို့ ဖြစ်ပွားခဲ့ခြင်းဖြစ်ကြောင်း သိရသည်။

“လမ်းပေါ်ကို ကန့်လန့်ဖြတ်ကြီးတွဲကျနေတဲ့ Wifiကြိုးကို ဆိုင်ကယ်မောင်းရင်းနဲ့ မမြင်တော့ လည်ပင်းနဲ့ငြိပြီး ဆိုင်ကယ်မှောက် သွားတာပေါ့။ အဲဒီမှာ ထိခိုက်ဒဏ်ရာတွေ ရသွားတာရှိတယ်” ဟု မဏီစလလူမှုကူညီရေးအသင်းမှ တာဝန်ရှိသူတစ်ဦးက NP Newsကို ပြောသည်။

အဆိုပါဖြစ်စဉ်ကြောင့် အသက်(၄၀)ဝန်းကျင်အရွယ်ရှိ ဆိုင်ကယ်ယာဉ်မောင်းအမျိုးသားတွင် လည်ပင်းပွန်းရှဒဏ်ရာနှင့် ခြေလက်ပွန်းပဲ့ဒဏ်ရာများ ရရှိခဲ့ကြောင်း သိရသည်။

“ကြီးကြီးမားမားဒဏ်ရာရတာတော့ မရှိပါဘူး။ လည်ပင်းက အဲဒီ Wifiကြိုးနဲ့ ရစ်မိလို့ ပွန်းရှတဲ့ ဒဏ်ရာနဲ့ ဆိုင်ကယ်မှောက်လို့ ဒူးတွေ၊ တံတောင်တွေပွန်းသွားတာလောက်ပဲဖြစ်တာပါ။ အခြားမြို့နယ်တွေမှာတော့မသိဘူး။ ဒီမြို့နယ်မှာက အခုလိုဖြစ်တာ ဒီတစ်ကြိမ်နဲ့ဆို (၃)ကြိမ်ရှိပြီ။ ကုမ္မဏီတွေဘက်ကလည်း တာဝန်ယူမှုမရှိပါဘူး။ ဘာမှလည်းလုပ်မပေးဘူး။ အဲဒီကြိုးတွေကိုတောင် လာပြီးပြင်ပေးတာ သိပ်မတွေ့ရဘူး” ဟု ၎င်းက ဆက်လက်ပြောသည်။

Wifi ကုမ္မဏီများနေဖြင့် လမ်းသွားလမ်းလာပြည်သူများ အန္တရာယ်ကင်းရှင်းရေးအတွက် ဦးစားပေးဆောင်ရွက်ပေးရန်လိုအပ်ကြောင်းလည်း အထက်ပါအသင်းက အကြံပြုမေတ္တာရပ်ခံထားသည်။