Pika (NSS) - ဒီဇင်ဘာ ၂၃

ရုရှား၏ကျူးကျော်တိုက်ခိုက်မှုများကို လက်တုံ့ပြန်တိုက်ခိုက်နေသော ယူကရိန်းနိုင်ငံကို ကူညီရန်အတွက် F-16 တိုက်လေယာဉ် (၁၈)စင်းကို ပေးပို့ပေးသွားမည်ဖြစ်ကြောင်း နယ်သာလန်အစိုးရက ဒီဇင်ဘာလ(၂၂)ရက်တွင် ထုတ်ဖော်ပြောဆိုခဲ့သည်။

နယ်သာလန် အိမ်စောင့်အစိုးရအဖွဲ့ ဝန်ကြီးချုပ်မာ့ခ်ရူတီက "ယူကရိန်းကို တိုက်လေယာဉ်(၁၈)စင်းပေးပို့ဖို့အတွက် ပြင်ဆင်မှုတွေလုပ်ဆောင်ဖို့ နယ်သာလန်အစိုးရရဲ့ ဆုံးဖြတ်ချက်အ ကြောင်း ယူကရိန်းသမ္မတဇီလန်စကီးကို ကျွန်တော်ဒီနေ့ပဲအကြောင်းကြားခဲ့ပါတယ်။ F-16 တိုက်လေယာဉ်တွေပေးပို့ခြင်းဟာ ယူကရိန်းအတွက် စစ်ရေးထောက်ပံ့မှုဆိုင်ရာ သဘောတူညီချက်တွေရဲ့ အရေးအကြီးဆုံးအချက်တွေထဲက တစ်ခုဖြစ်ပါတယ်"ဟု ပြောဆိုခဲ့သည်။

သို့သော်လည်း နယ်သာလန်နိုင်ငံခြားရေးဝန်ကြီးဌာန၏ ပို့ကုန်ခွင့်ပြုချက်နှင့် ယူကရိန်းရှိ ဝန်ထမ်းများနှင့် အခြေခံအဆောက် အဦးဆိုင်ရာ စံသတ်မှတ်ချက်များ ပြည့်မီအောင် စောင့်ဆိုင်းနေရမှုနှင့်အတူ F-16 တိုက်လေယာဉ်များ ပေးပို့ရန် စောင့်ဆိုင်းနေရဆဲဖြစ်ကြောင်း မာ့ခ်ရူတီကပြောကြားခဲ့သည်။ ထို့ပြင် ယူကရိန်းသို့ F-16 တိုက်လေယာဉ်များ ပေးပို့မည့်အချိန်ဇယားကို မာ့ခ်ရူတီက ထုတ်ဖော်ပြောဆိုခဲ့ခြင်းမျိုးမရှိခဲ့ကြောင်းလည်းသိရသည်။

အဆိုပါထုတ်ပြန်ကြေညာချက်နှင့်အတူ ယူကရိန်းသို့တိုက်လေ ယာဉ်များ ပို့ဆောင်ရန်အတွက် ပြင်ဆင်ရန်နှင့် ရန်ပုံငွေများကိုလည်း စုဆောင်းထားရန် လုပ်ဆောင်နိုင်ခဲ့ကြောင်း နယ်သာလန်အစိုးရက ပြောကြားခဲ့သည်။ "ယူကရိန်းကို F-16 တိုက်လေ ယာဉ် (၁၈) စင်းပေးပို့ဖို့အတွက် ပြင်ဆင်ဖို့ ဆုံးဖြတ်ခဲ့တဲ့ နယ်သာလန်အစိုးရကို ကျေးဇူးတင်မိကြောင်း အိမ်စောင့်ဝန်ကြီးချုပ်မာ့ခ်ရူတီကို ကျွန်တော်ပြောဆိုခဲ့ပါတယ်"ဟု သမ္မတ ဇီလန်စကီးက ‌ပြောဆိုခဲ့သည်။

နယ်သာလန်အစိုးရသည် ၎င်း၏ပထမဆုံး အမေရိကန်ထုတ် F-16 တိုက်လေယာဉ်ကို ရိုမေးနီးယားနိုင်ငံရှိ ယူကရိန်းလေယာဉ် မှူးများနှင့်ဝန်ထမ်းများအတွက် လေ့ကျင့်မှုများလုပ်ဆောင်ပေးရန် ပြီးခဲ့သည့်လက စေလွှတ်ခဲ့ဖူးကြောင်းသိရသည်။