ကျော်(NSS) - ဒီဇင်ဘာ ၂၃

ရှမ်းပြည်နယ်(မြောက်ပိုင်း)၊ နမ္မတူမြို့တွင် ယနေ့ (ဒီဇင်ဘာလ ၂၃ ရက်)၊ နံနက်ပိုင်းက နေအိမ်နှစ်လုံးပေါ်သို့ လက်နက်ကြီးကျည်ကျရောက်ပေါက်ကွဲမှုကြောင့် ကလေးငယ်တစ်ဦးနှင့်အမျိုးသားတစ်ဦးတို့ ထိခိုက်ဒဏ်ရာများရရှိခဲ့ကြောင်း ဒေသခံများထံမှသိရသည်။

ယနေ့၊ နံနက်အစောပိုင်းက လက်နက်ကြီးပစ်ခတ်မှုများဖြစ်ပေါ်ခဲ့ပြီးနောက် လက်နက်ကြီးကျည်များသည် နမ္မတူမြို့၊ ရပ်ကွက် (၆) နှင့် ရပ်ကွက် (၉)တို့ရှိ နေအိမ်နှစ်လုံးပေါ်သို့ ကျရောက် ပေါက်ကွဲခဲ့ကြောင်း သိရသည်။

"လက်နက်ကြီးကျည်ပေါက်ကွဲတဲ့အိမ်တွေက ပျက်စီးတာတွေဖြစ်သွားတယ်။ ရပ်ကွက်(၆)မှာ လက်နက်ကြီးထိတဲ့အိမ်က ကလေးတစ်ယောက်နဲ့အသက်(၂၀)လောက်ကောင်လေးတစ်ယောက် လက်နက်ကြီးကျည်စတွေထိပြီး ဒဏ်ရာရသွားတယ်"ဟု နမ္မတူမြို့အခြေစိုက်လူမှုကူညီရေးအသင်းဝင်တစ်ဦးကပြောသည်။

ထို့ကြောင့် ထိခိုက်ဒဏ်ရာရရှိခဲ့သူနှစ်ဦးအား တာဝန်ရှိသူများ၊ကြက်ခြေနီအသင်းဝင်များနှင့်လူမှုကူညီရေးအသင်းဝင်များက မြေပြင်ကုသမှုများပြုလုပ်ပေးပြီးနောက် ဆေးရုံသို့ပို့ဆောင်ပေးခဲ့ကြကြောင်း သိရသည်။

လက်နက်ကြီးကျည်ကျရောက်ပေါက်ကွဲမှုဖြစ်ပွားခဲ့သည့် နေအိမ်နှစ်လုံးအနက် ရပ်ကွက်(၉)ရှိနေအိမ်သည် ပျက်စီးမှုများဖြစ်ပေါ်ခဲ့သော်လည်း ထိခိုက်ဒဏ်ရာရသူမရှိခဲ့ကြောင်း သိရသည်။

ရှမ်းပြည်နယ်(မြောက်ပိုင်း)၌ ပြီးခဲ့သည့် နိုဝင်ဘာလမှစတင်ကာ တိုင်းရင်းသားလက်နက်ကိုင်အဖွဲ့များက တပ်မတော်လုံခြုံရေးစခန်းများကို စတင်ပစ်ခတ်တိုက်ခိုက်မှုများပြုလုပ်ခဲ့ရာမှ တိုက်ပွဲများဖြစ်ပွားလျက်ရှိနေကြောင်း သိရသည်။