Pika (NSS) - ဒီဇင်ဘာ ၁၃ 

ထိုင်း-မြန်မာနယ်စပ်အနီးတွင် မက်သာဖီတမင်းဆေးပြား သန်း(၅ဝ)ကို ဖမ်းဆီးမိခဲ့ကြောင်း ထိုင်းအာဏာပိုင်များက ပြောကြားခဲ့သည်။

အဆိုပါဖမ်းဆီးရမိမှုသည် ထိုင်းနိုင်ငံတွင် စံချိန်တင်ဖမ်းဆီးရမိမှုတစ်ခုဖြစ်ပြီး အာရှတွင် ဒုတိယအများဆုံး စံချိန်တင် ဖမ်းဆီးရမိမှုတစ်ခုဖြစ်ကြောင်း သိရသည်။ ထိုင်းရဲတပ်ဖွဲ့ နှင့် စစ်သားများသည် ဒီဇင်ဘာလ(၁၂)ရက်က နိုင်ငံအနောက်ပိုင်း  ကန်ချနဘူရီပြည်နယ်ရှိ လုံခြုံရေးဂိတ်တစ်ခုတွင် ခြောက်ဘီးတပ် ထရပ်ကားတစ်စီးကို ကြားဖြတ်ဟန့်တားကာစစ်ဆေးမှုများ လုပ်ဆောင်ခဲ့ပြီးနောက် ယခုကဲ့သို့ ဖမ်းဆီးရမိခဲ့ခြင်းဖြစ်ကြောင်း ရဲတပ်ဖွဲ့က ပြောကြားခဲ့သည်။

ထို့နောက် ထရပ်ကားနောက်ခန်းထဲတွင် အိတ်များဖြင့် ထုတ်ပိုးထားသော မက်သာဖီတမင်းဆေးပြားများကို တွေ့ရှိခဲ့ခြင်းဖြစ်ကြောင်း ရဲတပ်ဖွဲ့က ပြောကြားခဲ့သည်။ ထို့အပြင် ထရပ်ကားပေါ်တွင် လိုက်ပါလာသော အမျိုးသားတစ်ဦး နှင့် အမျိုးသမီးတစ်ဦးတို့ကို ဖမ်းဆီးထားကြောင်းလည်း သိရသည်။ 

အာရှတွင် မူးယစ်ဆေးဝါးဖမ်းဆီးရမိမှုများနှင့်ပတ်သက်ပြီး ရွှေတြိဂံဒေသအနီးရှိ လာအိုနိုင်ငံတွင် မက်သာဖီတမင်းဆေးပြား (၅၅)သန်း ဖမ်းဆီးရမိခဲ့ပြီးနောက် ယခုတစ်ကြိမ်ဖမ်းဆီးရမိမှုမှာ ဆေးပြားပမာဏ ဒုတိယအများဆုံး ဖမ်းဆီးရမိမှုတစ်ခုဖြစ်ကြောင်း  ကုလသမဂ္ဂမူးယစ်ဆေးဝါး နှင့် ရာဇဝတ်မှုဆိုင်ရာရုံး၏ အရှေ့တောင်အာရှဒေသ ဆိုင်ရာကိုယ်စားလှယ် ဂျယ်ရမီဒေါက်ကလပ်စ်က ပြောကြားခဲ့သည်။ 

ဂျယ်ရမီဒေါက်ကလပ်စ်က "အာရှမှာရှိတဲ့ ရာဇဝတ်ဂိုဏ်းတွေဟာ မြန်မာနိုင်ငံမြောက်ပိုင်း ရှမ်းပြည်နယ်မှာ ထုတ်လုပ်တဲ့ မက်သာဖီတမင်းဆေးပြားတွေကို မှောင်ခိုကူးဖို့အတွက် တိုင်းရင်းသားလက်နက်ကိုင်အဖွဲ့တွေနဲ့ ပူးပေါင်းဆောင်ရွက်နေပါတယ်။ ပြီးတော့ ဖြန့်ဖြူးရေးကွန်ရက်တွေဟာ ဂျပန်နဲ့ နယူးဇီလန်နိုင်ငံတို့ထိ ရောက်ရှိ သွားပါပြီ။ ဆေးပြား ထုတ်လုပ်မှုတွေက တိုးလာပါပြီ။ တိုင်းရင်းသားလက်နက်ကိုင်အဖွဲ့တွေနဲ့ ရာဇဝတ်ဂိုဏ်းတွေ ဟာ အရင်ကလည်း အတူတူပူးပေါင်းဆောင်ရွက်ခဲ့ဖူးကြပါတယ်" ဟု ပြောခဲ့သည်။

ရာဇဝတ်ဂိုဏ်းများသည် ထောက်ပံ့မှုကို ပိုမိုတိုးမြှင့်ကာ မက်သာဖီတမင်းဆေးပြားအတွက် ကုန်ကျစရိတ်များကို လျှော့ချခဲ့ခြင်းကြောင့် အာဏာပိုင်များ၏ မူးယစ်ဆေးဝါးဖမ်းဆီးရမိမှုများသည် ဒေသအတွင်းတွင် တရားမဝင် မူးယစ်ဆေးဝါးစီးဆင်းမှုများအပေါ် အကျိုးသက်ရောက်မှု အနည်းငယ်သာရှိကြောင်း ဂျယ်ရမီဒေါက်ကလပ်စ်က ပြောကြားခဲ့သည်။