သန့်ဇင် (NSS) - ဒီဇင်ဘာ ၁၂

ရန်ကုန်တိုင်း၊ စမ်းချောင်းမြို့နယ်ရှိ  အထပ်မြင့်တိုက်ခန်းတစ်ခုတွင်  ပန်ကာဝါယာရှော့ဖြစ်ရာမှ တိုက်ခန်းတစ်ခန်း မီးလောင်မှုဖြစ်ပွားခဲ့ကြောင်း အခင်းဖြစ်ပွားရာနေရာရှိ သတင်းအရင်းအမြစ်တစ်ဦးထံက သိရသည်။

မီးလောင်မှုသည် ယနေ့(ဒီဇင်ဘာ ၁၂ ရက်)၊ မွန်းလွဲ ၁ နာရီဝန်းကျင်အချိန်ခန့်က စမ်းချောင်းမြို့နယ်၊ လင်းလွန် (မြောက်) ရပ်ကွက်၊ ကြံခင်းလမ်းရှိ အထပ်မြင့်တိုက် (၄)လွှာတွင် ဖြစ်ပွားခဲ့ခြင်းဖြစ်ကြောင်း သိရသည်။

“မီးလောင်တဲ့တိုက်က (၆)ထပ်တိုက် (၄)လွှာပေါ့နော်။ တိုက်ခန်းထဲမှာရှိတဲ့ ပန်ကာကြိုးကနေ အပူလွန်ပြီး ဝါယာ့ရှေ့ဖြစ်ပြီး မီးလောင်တာ” ဟု အထက်ပါသတင်းအရင်းအမြစ်က NP News ကို ပြောသည်။

အဆိုပါမီးလောင်မှုတွင် လူထိခိုက်မှုမရှိခဲ့သော်လည်း တိုက်ခန်းအတွင်းရှိ ပစ္စည်းများမီးလောင်ဆုံးရှုံးသွားခဲ့ရကြောင်း သိရသည်။

“လူထိခိုက်မှုတော့ မရှိခဲ့ပါဘူး။ တိုက်ခန်းထဲမှာရှိတဲ့ အဝတ်တွေနဲ့ အတွင်းထဲက ပစ္စည်းတွေတော့မီးလောင်သွား တယ်။ အခြားကိုမီးကူးတာ မရှိခဲ့ပါဘူး။ Level 1 ခေါ်ပြီး မီးငြှိမ်းခဲ့ရတယ်” ဟု ၎င်းက ဆက်လက်ပြောသည်။

ထို့ကြောင့် ၎င်းမီးလောင်မှုတွင် ပျက်စီးဆုံးရှုံးမှုတန်ဖိုးအား သက်ဆိုင်ရာမီးသတ်တပ်ဖွဲ့မှ ဆက်လက်စစ်ဆေးလျက်ရှိကြောင်း သိရသည်။