ဂျန်ဇက် (NSS) - ဒီဇင်ဘာ ၁၁ 

အမေရိကန်အစိုးရဟာ ဟားမက်စ်အဖွဲ့နဲ့တိုက်ခိုက်နေတဲ့ အစ္စရေးနိုင်ငံကို တင့်ကားကျည်ဆံများ ကူညီထောက်ပံ့ပေးဖို့ ခွင့်ပြုပေးလိုက်ကြောင်း သိရပါတယ်။ 

အမေရိကန်လွှတ်တော်ဟာ အစ္စရေးနိုင်ငံကို အမေရိကန်ဒေါ်လာ ၁ဝ၆ သန်းကျော် တန်ဖိုးရှိ တင့်ကားကျည်ဆံများ ရောင်းချပေးဖို့ ပြီးခဲ့တဲ့ရက်ပိုင်းမှာ ခွင့်ပြုပေးခဲ့ပြီးနောက် အမေရိကန်အစိုးရက ထပ်မံခွင့်ပြုပေးခဲ့တာဖြစ်ပါတယ်။ အမေရိကန်အစိုးရဟာ  အစ္စရေးနိုင်ငံကို M830 တင့်ကား ကျည်ဆံ ၁၄ဝဝဝ ကျော် ရောင်းချပေးသွားဖွယ်ရှိနေကြောင်း သိရပါတယ်။

အမေရိကန်နိုင်ငံခြားရေးဝန်ကြီးဌာနက "အမေရိကန်ဟာ အစ္စရေးနိုင်ငံရဲ့လုံခြုံရေးကို ကတိပေးထားပါတယ်။ အစ္စရေးနိုင်ငံ ကိုယ့်ကိုယ်ကိုယ် ကာကွယ်နိုင်အောင် အဆင်သင့်ရှိဖို့ နဲ့ စစ်လက်နက်ပစ္စည်းတွေ ဖွံ့ဖြိုးတိုးတက် အောင် အကူအညီပေးတာတွေဟာ အမေရိကန်နိုင်ငံရဲ့အကျိုးစီးပွားအတွက် အဓိကအရေးပါနေတယ်။ ဒီလိုမျိုး ရောင်းချပေးမှုတွေဟာ အစ္စရေးနိုင်ငံဟာ အမိမြေကို ကာကွယ်နိုင်မှု ပိုမိုကောင်းမွန်စေဖို့ နဲ့ ဒေသအတွင်း ခြိမ်းခြောက်မှုတွေကို ကြိုတင်တားဆီးနိုင်ဖို့အတွက် ရည်ရွယ်ရောင်းချပေးတာမျိုးဖြစ်ပါတယ်" လို့ ပြောပါတယ်။ 

ဒါပေမယ့် အမေရိကန်လွှတ်တော်ဟာ  အမေရိကန်အစိုးရတောင်းခံထားတဲ့ အစ္စရေးနိုင်ငံကို အမေရိကန်ဒေါ်လာ ၁၄ ဘီလျံကျော် ကူညီထောက်ပံ့ပေးမယ့် အကူအညီများ အပါအဝင် လုံခြုံရေးအတွက် ဘတ်ဂျက်ငွေကြေး  အမေရိကန်ဒေါ်လာ ၁ဝ၆ ဘီလျံကို ခွင့်ပြုခြင်းမရှိသေးဘဲ ဆိုင်းငံ့ထားဆဲဖြစ်ကြောင်း သိရပါတယ်။ အဲဒီအစီအစဉ် ထဲမှာ အမေရိကန်အစိုးရဟာ အစ္စရေး နဲ့ ယူကရိန်းကို စစ်ရေးအကူအညီပေးဖို့အပြင် နယ်စပ်တံတိုင်းဆောက်လုပ် မယ့်အစီအစဉ်တွေလည်း ပါဝင်နေပါတယ်။ 

အစ္စရေးနဲ့ ဟားမက်စ်လက်နက်ကိုင်အဖွဲ့ကြား စစ်ပွဲစတင်ခဲ့ပြီးနောက်ပိုင်း အစ္စရေးရဲ့တိုက်ခိုက်မှုကြောင့် ပါလက်စတိုင်းပြည်သူ ၁၇ဝဝဝ ကျော် သေဆုံးထားသလို ပါလက်စတိုင်းပြည်သူ ၁ ဒသမ ၆ သန်းကျော် ဘေးလွှတ်ရာကို ရွှေ့ပြောင်းနေထိုင်နေရကြောင်း သိရပါတယ်။