မျိုးကြီး (NSS) - ဒီဇင်ဘာ ၇

ပြစ်ဒဏ်ကျခံနေရသော်လည်း စစ်မှုထမ်းဆောင်လိုသော စစ်သည်များကို ခံဝန်ဖြင့် ယနေ့(ဒီဇင်ဘာလ ၇ ရက်)၊ (အမျိုးသားနေ့)တွင် ပြစ်ဒဏ်လွတ်ငြိမ်းခွင့်ပေးခဲ့ကြောင်း သတင်းရရှိသည်။

ရာဇဝတ်မှု ပြစ်မှုကြီး (၁၀)မှု ကျူးလွန်ထားခြင်းမရှိသော စစ်သည်များကိုသာ ခံဝန်ဖြင့် ပြစ်ဒဏ်လွတ်ငြိမ်းခွင့်ပေးလိုက်ခြင်းဖြစ်ကြောင်း နစကပြောခွင့်ရ ဗိုလ်ချုပ်ဇော်မင်းထွန်းက NSS ကို ပြောသည်။

“ကျွန်တော်တို့ ပြောခဲ့သလိုပဲ အမိန့်စာမှာ ရာဇဝတ်မှု ပြစ်မှုကြီး (၁၀)မှု ကျူးလွန်ခြင်းမရှိဘဲနဲ့ သာမန်အမှုတွေနဲ့ပဲ စစ်မှုထမ်းဆောင်ချင်တဲ့ စစ်သည်များ ကိုယ်တိုင်လျှောက်ထားရင် ထမ်းဆောင်နိုင်တယ်ဆိုတဲ့ ခံဝန်ချက်နဲ့ ဆောင်ရွက်တာဖြစ်ပါတယ်။ လူဦးရေကတော့ ကျွန်တော်လည်း မသိပါဘူး” ဟု ဗိုလ်ချုပ်ဇော်မင်းထွန်းက ပြောသည်။

ယနေ့(အမျိုးသားနေ့)တွင် ပြစ်ဒဏ်လွတ်ငြိမ်းခွင့်ပေးလိုက်သည့် စစ်သည်အရေအတွက်အား လတ်တလောတွင် သိရှိခြင်းမရှိသေးကြောင်းလည်း ၎င်းက ထပ်မံပြောသည်။

စစ်မှုထမ်းရန် ဆန္ဒပြုသော သာမန်ပြစ်မှုကျူးလွန်ထားသည့် စစ်သည်များကို ပြစ်ဒဏ်လွတ်ငြိမ်းခွင့်ပေးသွားမည်ဟု နိုင်ငံတော်စီမံအုပ်ချုပ်ရေးကောင်စီက ဒီဇင်ဘာလ ၃ ရက်တွင် ကြေညာခဲ့သည်။

ယနေ့တွင် ပြစ်ဒဏ်လွတ်ငြိမ်းခွင့်ပြုလိုက်သော စစ်သည်များသည် အထက်ပါ ကြေညာချက်မထွက်မီအချိန် နိုင်ငံအတွင်း ဖြစ်ပေါ်နေသည့်အခြေအနေများနှင့်ပတ်သက်၍ စစ်မှုထမ်းဆောင်လိုကြောင်း ဆန္ဒပြုထားသူများဖြစ်သည်ဟု နစကပြောခွင့်ရက ပြောသည်။

“အဲဒီမှာ အဓိကတော့ နံပါတ်တစ်က ဖြစ်ပေါ်နေတဲ့အခြေအနေတွေနဲ့ ပတ် သက်ပြီး စစ်မှုထမ်းဆောင်ချင်တယ်ဆိုပြီး ကိုယ်တိုင်ဆန္ဒပြုသူများဖြစ်ပါတယ်။ ဒီအမိန့်စာမထွက်ခင်ကတည်းက ဆန္ဒပြုထားတဲ့သူတွေ ဖြစ်တယ်။ ပြီးရင် သူတို့အနေနဲ့က ယခင်ကတည်းက ရဲဘော်ရဲဖက်စိတ် ထမ်းဆောင်ချင်တဲ့ သူတွေဖြစ်တယ်”ဟု ဗိုလ်ချုပ်ဇော်မင်းထွန်းက ပြောသည်။

ပြီးခဲ့သော ရက်ပိုင်းအတွင်း၌ ထောင်နှင့်ချီသော စစ်ပြေးများအပါအဝင် စစ်မှုထမ်းဟောင်းများသည် စစ်မှုပြန်လည်ထမ်းဆောင်လိုကြောင်း ဆက်သွယ်လာသည်ဟု နစကဘက်က အသိပေးထားသည်။